«اتىراۋ» الەۋمەتتىك-كاسىپكەرلىك كورپوراتسياسى» اق-نىڭ اكتيۆتەردى باسقارۋ جانە ەنشىلەس تاۋەلدى ۇيىمدار دەپارتامەنتىنىڭ باسشىسى رۋسلان قابيەۆتىڭ ۇسىنعان اقپاراتىنا سۇيەنسەك, فابريكانىڭ قۇرىلىسى 2014 جىلى باستالعان. جوبا ەكى كەزەڭمەن ىسكە اسىرىلىپتى.
«بۇل جوبا جەڭىل ونەركاسىپتى دامىتۋ ءۇشىن قولعا الىندى. قوي جانە تۇيە ءجۇنىن باستاپقى وڭدەپ, كەيىن ودان دايىن ءونىم شىعارۋ ماقساتى كوزدەلدى. قازىر توقىما فابريكاسىنا «Caspiy Lana Atyrau» جشس يەلىك ەتەدى. اتالعان كاسىپورىننىڭ جارعىلىق كاپيتالىنىڭ 49 پايىزى «اتىراۋ» الەۋمەتتىك-كاسىپكەرلىك كورپوراتسياسى» اق-عا تيەسىلى», دەيدى ر.قابيەۆ.
ونىڭ دەرەگىنە سۇيەنسەك, جوبا قۇنى 2 432,5 ملن تەڭگەنى قۇرايدى. «اتىراۋ» اكك» اق تاراپىنان جوباعا جارعىلىق كاپيتال رەتىندە 76,44 ملن تەڭگە, ماقساتتى زايم تۇرىندە 1 576,1 ملن تەڭگە سالىنعان. ال جوبا باستاماشىسى بولعان ينۆەستور 829,5 ملن تەڭگە قۇيعان.
«جوبانىڭ وندىرىستىك قۋاتى – جىلىنا تۇيەنىڭ 100 توننا, قويدىڭ 350 توننا ءجۇنىن وڭدەۋ. العاشقى وڭدەۋدەن وتكىزىلگەن جۇننەن 400 مىڭ قۋما مەتر جامىلعى شىعارۋ جوسپارلاندى. كاسىپورىندا 2015–2017 جىلدارى 122 967 كيلو شيكىزاتتىق ءجۇن وڭدەلدى. ودان 65 289 توننا وڭدەلگەن ءجۇن الىندى. بۇل – جوبادا كوزدەلگەن جىلدىق قۋاتتىڭ 27,4 پايىزى. شيكىزاتپەن قامتۋ جوبالىق قۋاتىنىڭ 10 پايىزىنان اسپادى. سوعان قاراماستان 2016–2018 جىلدارى 31,658 توننا ءجىپ ءيىرىلدى. وسى جىلدارى 24 391 قۋما مەتر ماتادان 4 591 جامىلعى شىعارىلدى. وعان 18 توننا ءجىپ قولدانىلدى», دەپ مالىمدەدى كورپوراتسيا وكىلى.
الايدا 2018 جىل باستالىسىمەن اتالعان كاسىپورىننىڭ باسىنا بۇلت ءۇيىرىلدى. كوۆيد پاندەمياسى ورشىگەن 2019–2020 جىلدارى جۇمىسى تىپتەن شاتقاياقتادى. مۇنىڭ سالدارى فابريكا ءوندىرىسىنىڭ توقتاۋىنا سەبەپ بولدى.
«فابريكانىڭ جۇمىسىن توقتاتۋىنا بىرنەشە سەبەپ اسەر ەتتى. بىرىنشىدەن, اينالىم قارجىسى بولمادى. ەكىنشىدەن, ىستەن شىققان كەيبىر تەحنولوگيالىق قوندىرعىلار مەن ستانوكتاردى جوندەۋ ماسەلەسى شەشىمىن تاپپادى. ۇشىنشىدەن, جوبانى ىسكە اسىرۋعا بايلانىستى تۇراقتى ءونىم شىعارىلمادى. تورتىنشىدەن, شيكىزاتتى دايىنداۋ, نارىققا ماركەتينگتىك تالداۋ سەكىلدى وندىرىستىك ۇدەرىس جوسپارلانبادى. بەسىنشىدەن, دايىن ءونىمدى وتكىزۋگە بايلانىستى ماركەتينگتىك ستراتەگيا تۇزىلمەدى. التىنشىدان, ماركەتولوگ, قوندىرعى جونىندەگى تەحنيك, توقىما ونەركاسىبىنىڭ تەحنولوگى سەكىلدى مامانداردىڭ تاپشىلىعى تۋىندادى», دەيدى ر.قابيەۆ.
كورپوراتسيا وكىلىنىڭ پىكىرىنە قاراعاندا, باستى تۇيتكىل شيكىزاتتىق ساپالى ءجۇننىڭ تاپشىلىعىنان تۋىنداعان. اسىرەسە وبلىس اۋماعىنان تابىلعان ءجۇننىڭ ساپاسى تومەن بولىپ شىققان.
«ويتكەنى اتىراۋ وبلىسىندا ەدىلباي تۇقىمداس قوي وسىرىلەدى. قويدىڭ بۇل تۇقىمى ەت باعىتىندا وسىرىلەتىندىكتەن, ونىڭ ءجۇنىنىڭ تالشىعى ءىرى بولىپ كەلەدى. مۇنداي ءجۇندى توقىما سالاسىنا قولدانۋ مۇمكىن ەمەس. ال جىڭىشكە جانە جارتىلاي جىڭىشكە تالشىقتى ءجۇن مەرينوس, تسەگاي جانە كروسبرەد تۇقىمدى قويدان الىنادى. قويدىڭ بۇل تۇقىمدارى قازاقستاندا, رەسەيدىڭ قالماق جانە داعىستان رەسپۋبليكاسىندا بار», دەيدى ر.قابيەۆ.
بۇل فابريكانىڭ جۇمىسى قاشان جانداناتىنىن ءدوپ باسىپ ايتۋ قيىن. دەگەنمەن «اتىراۋ» الەۋمەتتىك-كاسىپكەرلىك كورپوراتسياسى» اق ءجۇن فابريكاسىن قايتا جانداندىرۋ ءۇشىن ينۆەستور ىزدەپ جاتىر. جوباعا قوسىمشا قارجى سالۋ قاجەتتىگى تۋىنداپ وتىر.
«ينۆەستورلارعا قويىلاتىن بىرنەشە تالاپ بار. بىرىنشىدەن, قىزىعۋشىلىق تانىتقان ينۆەستوردىڭ توقىما ونەركاسىبىندە تاجىريبەسى بولۋى قاجەت. ەكىنشىدەن, شىعارىلاعان ونىمدەردەن بارىنشا تابىس تاباتىنداي ءتيىمدى تەحنيكالىق-ەكونوميكالىق مودەل ەنگىزۋ كەرەك. ۇشىنشىدەن, كاسىپورىن ءونىمىنىڭ وزىندىك قۇنىن تومەندەتىپ, ىقشامداۋ جولىمەن شىعىندى ازايتقانى ءجون. تورتىنشىدەن, اۋدانداردا جانە رەسەيدىڭ كورشىلەس وڭىرلەرىندە شيكىزاتتىق ءجۇن جينايتىن پۋنكتتەر اشۋ كەرەك. بەسىنشىدەن, ءونىم وتكىزۋگە بايلانىستى ماركەتينگتىك باعدارلاما ازىرلەپ, ۇزاقمەرزىمدى كەلىسىمشارت جاساۋىن تالاپ ەتەمىز», دەيدى دەپارتامەنت ديرەكتورى.
«Caspiy Lana Atyrau» جشس-ءنىڭ ءجۇن فابريكاسىندا بۇرىن 40 ادام جۇمىس ىستەسە, قازىر تەك ديرەكتور عانا قالىپتى. مۇندا باسشىدان وزگە جۇمىس ىستەيتىن بىردە-ءبىر ادام جوق.
اتىراۋ وبلىسى
