فوتو: ۇكىمەتتىڭ ءباسپاسوز قىزمەتى
جوبا اياسىندا 2025 جىلدان 2027 جىلعا دەيىن قۋاتتىلىعى جىلىنا 48 مىڭ توننا پرەميكس جانە 300 مىڭ توننا قۇراما جەم وندىرەتىن 3 زاۋىت, قوسىمشا-زەرتحانا مەن ترەنينگ-ورتالىق سالۋ ۇسىنىلعان.
«جوبانى ءساتتى ىسكە اسىرعان جاعدايدا قازاقستاندا پرەميكس وندىرەتىن العاشقى ءىرى زاۋىت جانە قۇراما جەم وندىرەتىن ءىرى كاسىپورىن پايدا بولادى. بۇل ەلىمىزگە 250 مىڭ توننادان استام يمپورتتالاتىن قۇراما جەم ءوندىرىسى بويىنشا يمپورتتى الماستىرۋدى قامتاماسىز ەتۋگە مۇمكىندىك بەرەدى», دەلىنگەن حابارلامادا.
ۆيتسە-پرەمەر اتاپ وتكەندەي, مال شارۋاشىلىعىن وتاندىق ءوندىرىستىڭ ساپالى جەمىمەن قامتاماسىز ەتۋ ەلىمىزدىڭ اۋىل شارۋاشىلىعىن وركەندەتۋدىڭ ستراتەگيالىق ماڭىزدى مىندەتتەرىنىڭ ءبىرى. بيىلعى جىلى اۆستراليالىق ءادىس بويىنشا مال شارۋاشىلىعىن دامىتۋ جوبالارىن قولداۋ باعدارلاماسىنىڭ باستالۋىن ەسكەرە وتىرىپ, مۇنداي جوبالار جەم-ءشوپ نارىعىنىڭ قۇرىلىمىن ساپالى وزگەرتۋ جانە ەت ءوندىرىسىنىڭ قۇنىن ارزانداتۋ ءۇشىن قاجەت.
«قازاقستان استىقتى, ەتتى, ءسۇتتى تەرەڭ وڭدەۋ بويىنشا جوبالاردى دامىتۋعا مۇددەلى. جاقىندا ءبىز بىرقاتار سالالارعا ينۆەستيتسيالارعا تاپسىرىس جاريالادىق, ولاردىڭ اراسىندا ازىق-ت ۇلىك ءوندىرىسى ەرەكشە ورىن الادى. ءبىز ەلدى ءوزىنىڭ ازىق-ت ۇلىك ونىمدەرىمەن, اسىرەسە الەۋمەتتىك ازىق-ت ۇلىكپەن, تۇرعىندار قاجەتتىلىگىنىڭ كەم دەگەندە 90%-ىن قامتاماسىز ەتۋدى كوزدەپ وتىرمىز. ءسىزدىڭ كومپانياڭىزدى وسى سالاعا ينۆەستيتسيالاۋ مۇمكىندىكتەرىن قاراستىرۋعا شاقىرامىز», دەدى سەرىك جۇمانعارين.
ءوز تاراپىنان UBM Group اكتسيونەرى ۆارگا اكوش قازاقستاندا جاڭا وندىرىستەر قۇرۋعا دايىندىعى مەن جوعارى قىزىعۋشىلىعىن ءبىلدىردى. ول ءۇشىن كاسىپورىننىڭ قاجەتتى تاجىريبەسى, قۋاتى, زاماناۋي تەحنولوگيالارى بار.
جوبا قوستاناي, قاراعاندى وبلىستارىندا جانە الماتىدا زاۋىتتار سالۋدى كوزدەيدى. اتاپ ايتقاندا, قاراعاندى وبلىسىندا بيزنەس بويىنشا سەرىكتەس جانە زاۋىت قۇرىلىسىنا ارنالعان ورىن انىقتالعان, قوستاناي مەن الماتىدا دا سەرىكتەستەر بار, بىراق زاۋىت قۇرىلىسىنىڭ ورنىنا قاتىستى ماسەلە شەشىلگەن جوق.
ماجارستاندىق ينۆەستورلاردىڭ قازاقستاننىڭ وڭتۇستىك وڭىرلەرىندە تاعى ءبىر زاۋىت سالۋ جوسپارلارى بار, بىراق ونى ىسكە اسىرۋ ءۇشىن قازاقستاندىق سەرىكتەس ءالى تابىلماعان. اكوش ۆارگا ۆيتسە-پرەمەرگە قوستاناي وبلىسى مەن الماتىدا قۇرىلىس ورنىن انىقتاي وتىرىپ, ماسەلەلەردى تەز ارادا شەشۋگە كومەك كورسەتۋ تۋرالى ءوتىنىش ءبىلدىردى.
كەزدەسۋگە قاتىسۋشىلار ىسكە قوسىلعان وڭىرلەر اكىمدەرىنىڭ ورىنباسارلارىمەن بىرلەسىپ, ۋچاسكەلەردى ءبولۋ كەزىندە تۋىندايتىن بارلىق قيىندىقتاردى جانە ونى تەزىرەك ىسكە اسىرۋ ءۇشىن جوباعا قويىلاتىن سانيتارلىق-ەپيدەميولوگيالىق تالاپتاردى تالقىلادى. جيىن قورىتىندىسى بويىنشا ۆيتسە-پرەمەر وڭىرلەرگە اشم-مەن بىرلەسىپ, ناۋرىز ايىنىڭ سوڭىنا دەيىن ينۆەستورلار جوبانى ىسكە اسىرۋدى كەشىكتىرمەي, وسى جىلدىڭ ەكىنشى توقسانىندا جەر جۇمىستارىنىڭ كەزەڭىنە كىرىسۋى ءۇشىن جەر ۋچاسكەلەرىن انىقتاۋدى تاپسىردى.
