پاۆلودارداعى قازاقستان ەلەكتروليز زاۋىتى «قاناتتى» مەتالل ءوندىرىسىن باستاعاننان بەرى باستاپقى ءاليۋمينيدىڭ مەرەيلى 4 ميلليوندىق تونناسىن ءوندىردى.
«4 ميلليونىنشى توننا ءونىمدى شىعارۋ – كاسىپورنىمىزدىڭ جىلناماسىنداعى ەرەكشە وقيعا. بۇل مەرەيلى مەجە – ءبىزدىڭ قىزمەتكەرلەرىمىزدىڭ ەڭبەگى. ولاردىڭ ارقايسىسى وندىرىسكە ءوز ۇلەسىن قوسىپ ءجۇر. ءبىزدىڭ ۇجىمنىڭ ءاربىر مۇشەسىنىڭ ارقاسىندا وسى جىلدار ىشىندە ءوندىرىس تابىستى دامىپ, ءتيىمدى بولا ءتۇستى. قازىرگى تاڭدا كاسىپورىندا ءوندىرىس داستۇرلەرىن لايىقتى جالعاستىرىپ, جاڭا جەتىستىكتەرگە قول جەتكىزىپ جۇرگەن 2 مىڭنان اسا قىزمەتكەر جۇمىس ىستەپ جاتىر», دەيدى «قازاقستان ەلەكتروليز زاۋىتى» اق ءوندىرىس جونىندەگى ديرەكتورى مۇرات جۇماباەۆ.
مەتاللۋرگتەر ءۇشىن العاشقىدا ءتورت ميلليون توننا ءاليۋمينيدى ەلەستەتۋدىڭ ءوزى عاجايىپقا تەڭ ەدى. ەگەر 4 ميلليون پاكەتتى ءبىر قاتارعا قويساڭىز, پاۆلوداردان ماسكەۋگە دەيىنگى ارالىققا جول سالۋعا بولار ەدى. ال ەگەر مۇنداي كولەمدى تەمىرجولمەن تاسىمالدار بولسا, وندا 65 مىڭ ۆاگوننان تۇراتىن قۇرام قاجەت بولادى.
17 جىلدا ەلەكتروليز زاۋىتى حالىقارالىق ستاندارتتاردىڭ بارلىق تالابىنا ساي وتاندىق اليۋميني شىعارىپ كەلەدى. زاۋىت – ەلىمىزدەگى جالعىز باستاپقى اليۋميني ءوندىرۋشى. ونىڭ ونىمدەرى بۇكىل الەمدە سۇرانىسقا يە. بىزدە وندىرىلگەن باستاپقى ءاليۋمينيدى كوپتەگەن وتاندىق كاسىپورىن, سونداي-اق جاقىن جانە الىس شەتەلدەردىڭ كومپانيالارى ساتىپ الادى.
ماڭىزدى وقيعانىڭ قۇرمەتىنە وراي ءوندىرىس ۇدەرىسىنە ۇزبەي ارالاسىپ, ءتورت ميلليونىنشى توننا اليۋميني قۇيۋعا تىكەلەي قاتىسقان قىزمەتكەرلەر العىسحاتتارمەن ماراپاتتالدى. سولاردىڭ ءبىرى – اليۋميني وندىرىسىندەگى اۆتوماتتاندىرىلعان ۇدەرىستىڭ وپەراتورى ادىلبەك جاڭاباەۆ.
«مەن ءاربىر ميلليوندىق توننانى قۇيۋعا قاتىستىم. وسىمەن ءتورتىنشى رەت ميلليونىنشى توننانى جونەلتىپ وتىرمىن. ءوز قولىمىزبەن جانە كوز الدىمىزدا كاسىپورىننىڭ تاريحى جازىلىپ جاتىر. بۇل ءسات – ءبىز ءۇشىن اۋقىمدى مەرەكە, زور ماقتانىش. مەنىڭ اۋىسىمىمداعى ارىپتەستەرىممەن مەرەيتويلىق ءىس-شاراعا قاتىسۋ قۇرمەتىنە يە بولدىق. مەتاللۋرگ رەتىندە ەرەكشە تولقىپ تۇرمىن. ويتكەنى ءبىز ءوز قولىمىزبەن ەلدىڭ مەتاللۋرگيا ونەركاسىبىنىڭ تاريحىن جاساپ جاتىرمىز», دەيدى ول.
ايتىپ وتەيىك, زاۋىتتىڭ ءبىرىنشى كەزەگى ىسكە قوسىلعان 2007 جىلدىڭ سوڭىنا قاراي مەتاللۋرگتەر 11 مىڭ توننا باستاپقى اليۋميني وندىرگەن. 2010 جىلى ءوندىرىستىڭ ەكىنشى كەزەگى ىسكە قوسىلعان كەزدە كاسىپورىن جوبالىق قۋات – 250 مىڭ تونناعا جەتتى. جىل سايىن ءوندىرىس ديناميكاسى ءوسىپ, زاۋىت قازىردىڭ وزىندە 264,5 مىڭ توننا «قاناتتى» مەتالل بەرۋگە قابىلەتتى.
پاۆلودار وبلىسى
