سۋرەت: ortcom.kz
بىزدە ەكىنشى دەڭگەيلى 21 بانكتىڭ 10-ى اۆتونەسيە بەرەدى. ونىڭ ىشىندە حالىققا كەڭىنەن قولجەتىمدى 7 بانك بەلسەندى تۇردە ءوز قىزمەتىن ۇسىنىپ وتىر. اۆتونەسيەنى تاڭداۋ كەزىندە ەڭ ماڭىزدى كورسەتكىشتەردىڭ ءبىرى – جىلدىق ءتيىمدى سىياقى مولشەرلەمەسى (سجتم). قارجى نارىعىن رەتتەۋ جانە دامىتۋ اگەنتتىگى بەكىتكەن ەرەجەگە سايكەس, مۇنداي نەسيەدە ماكسيمالدى سجتم 35%-دان اسپاۋعا ءتيىس. وسى شەك اياسىندا بانكتەردىڭ ۇسىنىستارىن سالىستىرىپ كورەيىك.
ەڭ تومەنگى مولشەرلەمەنى قاي بانك ۇسىنادى؟ اۋەلى كوزگە ForteBank ءتۇستى. ول ەڭ تومەنگى ماكسيمالدى مولشەرلەمەنى ۇسىنىپ وتىر. 25,3%-عا دەيىن. بۇل بانك ارقىلى جاڭا دا, قولدانىستا بولعان كولىك تە ساتىپ الۋعا بولادى. بىراق كولىكتىڭ شىققان جىلى 8 جىلدان اسپاۋعا ءتيىس. ودان كەيىنگى ورىنعا بانك تسەنتركرەديت پەن Freedom Bank جايعاسقان. بۇل ەكى بانكتە ماكسيمالدى سجتم 25,6%-دى قۇرايدى. بىراق بانك تسەنتركرەديتتە مولشەرلەمە تەك جاڭا كولىكتەرگە ارنالعان, ال قولدانىستا بولعان اۆتوموبيلگە 32,24%-عا دەيىن كوتەرىلەدى. سونىمەن قاتار بۇل بانكتە 22,4%-دىق سجتم-مەن Skoda ماركالى اۆتوكولىكتەرگە ارنالعان ارنايى ۇسىنىس بار. الايدا Skoda بىزدە اسا تانىمال ەمەس. كەلەسى Halyk Bank – جاڭا كولىك ءۇشىن ماكسيمالدى سجتم 28,3%, ال قولدانىلعان كولىك ءۇشىن 30,1%. ال Bereke Bank پەن ەۋرازيالىق بانك – بۇل ەكى بانك ماكسيمالدى رۇقسات ەتىلگەن 35%-دىق سجتم كورسەتىپ وتىر. بىراق ولاردىڭ اۆتونەسيەلەردى جاڭا جانە قولدانىستا بولعان كولىكتەر ءۇشىن دە قولجەتىمدى.
نەسيە سوماسى مەن مەرزىمى قانداي؟ ەلدەگى اۆتونەسيەلەردىڭ ەڭ ۇزاق مەرزىمى – 7 جىل. قاراستىرىلعان 7 بانكتىڭ التاۋى ءدال وسىنداي مەرزىمگە نەسيە بەرەدى. نەسيەگە قولجەتىمدى ەڭ جوعارى سوما – 18 ملن-نان 50 ملن تەڭگەگە دەيىن. بۇل كورسەتكىش بانكتەردىڭ ىشكى ساياساتى مەن كليەنتتىڭ تولەم قابىلەتىنە بايلانىستى وزگەرۋى مۇمكىن.
2024 جىلدىڭ اقپان ايىنىڭ باسىندا قازاقستاندا 5,1 ملن جەڭىل كولىك تىركەلگەن, بۇل وتكەن جىلمەن سالىستىرعاندا 7,6%-عا كوپ. الايدا ەلدەگى اۆتوپاركتىڭ ەداۋىر بولىگى ەسكى. مىسالى, 1,2 ملن كولىك – 10 جىلدان 20 جىلعا دەيىن قولدانىستا جۇرگەن, 2,2 ملن كولىك – 20 جىلدان استام ۋاقىت پايدالانىلىپ كەلە جاتىر.
