اۋىلدا وسكەن باعدات كىشكەنتاي كەزىنەن تابيعاتقا, وسىمدىكتەرگە قىزىققان. كەيىننەن م.ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ توپىراقتانۋ فاكۋلتەتىنە وقۋعا ءتۇسىپ, ونى ۇزدىك اياقتاعان.
«ۋنيۆەرسيتەتتە جۇرگەنىمدە-اق لاندشافت ديزاينىنا ەرەكشە قىزىعاتىنمىن. دالالىق تاجىريبە كەزىندە تابيعاتتىڭ وزىندىك ۇيلەسىمىن باقىلاۋ قيالىما قانات ءبىتىردى. ويتكەنى تابيعات تۇستەر مەن فورمالاردى تاماشا ۇيلەستىرەدى», دەيدى.
جۇبايىنىڭ جۇمىسىنا بايلانىستى لوندونعا قونىس اۋدارعان كەزدە باعدات وزىنە تانىس سالادا جۇمىس ىستەيمىن دەپ شەشەدى. گۇل كومپانياسىنا قىزمەتكە ورنالاسىپ, بريتاندىق گۇل نارىعىن تەرەڭىرەك زەرتتەي باستايدى. ءبىر جىل وتكەن سوڭ ءوز بيزنەسىن باستاۋعا بەل بۋعان:
«بارلىعىن نولدەن باستادىم. العاشقى ينۆەستيتسيام بىرنەشە مىڭ فۋنت قانا بولدى. ول قارجى كەڭسە جالداۋعا, كومەكشىلەردىڭ جالاقىسىنا, قۇرال-جابدىقتار مەن العاشقى تاپسىرىستارعا ارنالعان گۇلدەر مەن ماتەريالداردى ساتىپ الۋعا كەتتى».
ول العاشقى كۇننەن-اق جوعارى ساپا مەن دارالىقتى باستى نازارعا الدى. لوندون نارىعىندا باسەكەلەستىك جوعارى بولعانىمەن, كليەنتتەردىڭ قالاۋىن ءدال ورىنداۋ ءارى قىزمەت كورسەتۋ ساپاسىن ارتتىرۋ ارقىلى تابىسقا جەتۋگە بولاتىنىن ءتۇسىندى.
«كليەنتتەرىمىز گۇل شوقتارىن مەيرامحاناعا بەلگىلەنگەن ۋاقىتتا نەمەسە ءتىپتى ءتۇن ورتاسىندا ۇيگە جەتكىزۋدى سۇرايدى. لوندوندا مۇنداي قىزمەت سيرەك كەزدەسەتىندىكتەن, ءبىز بۇل باعىتتا سەنىمدىلىك قالىپتاستىردىق. العاشقى جىلىمىزدىڭ قورىتىندىسى بويىنشا سالىق ەسەبىندە پايدا كورسەتتىك. جىل سايىن تابىسىمىزدى 30-35%-عا ارتتىرۋدى جوسپارلاپ وتىرمىز», دەيدى باعدات.
ونىڭ كومپانياسىندا گۇل شوقتارىنىڭ باعاسى 100 فۋنتتان باستالادى. كليەنتتەرى – جەرگىلىكتى جۇلدىزدار, تانىمال سپورتشىلار مەن جوعارى تابىستى ادامدار. گۇل ساتۋمەن قاتار كاسىپكەردىڭ كومپانياسى ءساندى ءىس-شارالاردى بەزەندىرۋمەن دە اينالىسادى. ولاردىڭ جوبالارىنىڭ اراسىندا الەمدىك IT-كومپانيالاردىڭ لوندون سارايلارىندا وتكەن سالتاناتتى كەشتەرى دە بار.
«بىزگە XVIII عاسىردا سالىنعان اددينگتون سارايىنىڭ ۇلكەن زالدارىن بەزەندىرۋ مارتەبەسى بۇيىردى. بۇل ساراي ءبىر كەزدەرى انگليانىڭ كەنتەربەري ارحيەپيسكوپتارىنىڭ رەزيدەنتسياسى بولعان. وسىنداي اۋقىمدى جوبالار تىنىسىمىزدى اشتى. بريتاندىقتار تابيعي كورىنىستى ۇناتقانىمەن, لوندون – الەمنىڭ تۇكپىر-تۇكپىرىنەن كەلگەن ءتۇرلى مادەنيەتتەر توعىسقان قالا. سوندىقتان اراب, قىتاي جانە شىعىس ستيلىندەگى گۇل شوقتارىن دا ازىرلەيمىز. ءبىز اۆتورلىق گۇل شوقتارىمەن جۇمىس ىستەۋدى ۇناتامىز. مىسالى, دجەيمس بوند ستيلىندەگى نەمەسە تيم بەرتون فيلمدەرىنىڭ سيۋجەتتەرىنە نەگىزدەلگەن ەرەكشە كومپوزيتسيالار جاسايمىز», دەيدى كاسىپكەر.
