جۋىردا وبلىس اكىمى عاۋەز نۇرمۇحامبەتوۆ جاڭا زاۋىتقا بارىپ, ونىڭ وبلىس ونەركاسىبىنە قوساتىن ۇلەسىنەن حاباردار بولىپ, وندىرىستىك قۋاتىمەن تانىستى. تولىق قۋاتىنا كىرىسكەندە زاۋىت مەملەكەتتىك بيۋدجەتكە اي سايىن 3,4 ملرد تەڭگەگە دەيىن سالىق تولەۋ مۇمكىندىگى بارى ايتىلدى. زاۋىت وبلىستىڭ اگروقۇرىلىمدارىنان مايلى داقىلداردى جيناپ, ولاردان دايىن ونىمدەر شىعارادى. ال مايلى داقىلدار ءوسىرۋ كولەمى وبلىستىڭ ەگىس القاپتارىندا جىل سايىن ارتىپ كەلەدى. شارۋاشىلىقتار دا كۇنباعىس, راپس, زىعىر, باسقا دا داقىل كولەمىن ارتتىرۋ پايدالى ەكەنىنە كوزى جەتە تۇسكەن. ەندى ولار ءوز داقىلدارىن وڭدەۋگە بەرەتىن وسى قوسىمشا كاسىپورىنعا دا قول جەتكىزىپ وتىر. بۇل زاۋىت مايلى داقىلداردى وڭدەپ, جىلىنا 400 مىڭ تونناعا دەيىن دايىن ءونىم شىعارادى.
زاۋىتتىڭ بارلىق تەحنولوگياسى – الىس شەتەلدەردەن جەتكىزىلگەن جوعارى ءونىمدى اۆتوماتتاندىرىلعان تەحنيكا. سونىڭ ىشىندە گەرمانيا, بەلگيا, تۇركيا سياقتى ازىق-ت ۇلىك ءوندىرىسى جەتىك دامىعان ەلدەردەن اكەلىنگەن. تەحنولوگيا كومەگىمەن وسىمدىكتەردى سۋىقتاي سىعىپ, ءونىم الۋعا بولادى. بۇل وسىمدىك مايىنىڭ ساپاسىن ارتتىرا تۇسەدى. ءسويتىپ, جاقىن شەتەلدەردەگى وسىنداي ونىمدەرگە باسەكەلەستىك كورسەتە الادى دەگەن ءۇمىت بار.
ءوندىرىستى باسقارۋ جۇيەسى كومپيۋتەر ارقىلى ىسكە اسىرىلادى. ولار مايلى داقىلداردان قالدىقسىز, ەۋروپالىق ستاندارتتارعا ساي جوعارى ساپالى ءونىم شىعارۋعا قابىلەتتى. بۇگىنگە دەيىن 10 مىڭ توننا رافينادتالماعان كۇنباعىس مايىن شىعارىپ ۇلگەرگەن. ونىڭ ساپاسىنا تۇتىنۋشىلار جوعارى باعا بەرەدى.
جىل اياعىنا دەيىن وسىمدىك مايىن تەرەڭدەتىپ وڭدەيتىن تەحنولوگيالار دا ىسكە قوسىلماق. سول كەزدە ءتىپتى «لەتسيتين» دەگەن ءونىم شىعارۋعا قول جەتكىزۋدى جوسپارلاپ وتىر. بۇل گرەك تىلىنەن اۋدارعاندا جۇمىرتقانىڭ «سارى ۋىزى» دەگەندى بىلدىرەدى. ويتكەنى ونى العاش رەت 1845 جىلى فرانتسۋز حيميگى گوبلي جۇمىرتقانىڭ سارى ۋىزىنان العان ەكەن. ول قازىر ازىق-ت ۇلىك ونەركاسىبىندە شوكولاد, كونديتەر جانە ماكارون ونىمدەرىن, مارگارين, مايونەز جاساۋدا كەڭىنەن قولدانىلادى. حيميا ونەركاسىبىندە ول كوسمەتيكالىق بوياۋلار مەن مايلار جاساۋدا, ءتىپتى تىڭايتقىشتار وندىرۋدە دە, سونداي-اق مەديتسينادا پايدالانىلادى. سوندىقتان بۇل ءونىم جوعارى سۇرانىسقا يە.
«زاۋىت شارۋالاردىڭ مايلى داقىلدارىن ەشقانداي كەدەرگىسىز وتكىزەتىن قوسىمشا وڭدەۋ ورنى بولىپ وتىر. بىلتىر ءبىزدىڭ شارۋاشىلىقتار مايلى داقىلدار ەگىسىن 85 مىڭ گەكتارعا ۇلعايتىپ, 760 مىڭ گەكتارعا جەتكىزگەن. 780 مىڭ توننا ءونىم الىندى. ال قازىر مايلى داقىلدار وڭدەيتىن كاسىپورىندارىمىزدىڭ وندىرىستىك قۋاتى جىلىنا 813 مىڭ تونناعا جەتىپ وتىر. بۇل شارۋالارىمىزدى ەگىس القاپتارىن ودان ءارى ارتاراپتاندىرۋعا ىنتالاندىرادى», دەدى زاۋىتتى ارالاپ شىققان سوڭ وبلىس اكىمى عاۋەز تورسان ۇلى.
سولتۇستىك قازاقستان وبلىسى
