وسى ءبىلىم شاڭىراعىنا ارنايى كەلگەن وقۋ-اعارتۋ ءمينيسترى عاني بەيسەمباەۆ پروفەسسور-وقىتۋشىلار جانە ستۋدەنتتەرمەن كەزدەسىپ, ساپالى كادرلار دايارلاۋ, ءبىلىم باعدارلامالارىن جەتىلدىرۋ, سونىمەن قاتار ۇزدىكسىز پەداگوگيكالىق ءبىلىم سالاسىن دامىتۋ بارىسىن تالقىلادى.
مينيستر سوزىندە پەداگوگيكالىق ماماندىقتارعا بولىنەتىن مەملەكەتتىك گرانت سانىنىڭ جىل سايىن ارتىپ كەلە جاتقانىن ايتتى.
«مەملەكەت تاراپىنان پەداگوگ كادرلاردىڭ ساپاسىن ارتتىرۋعا ەرەكشە ءمان بەرىلىپ وتىر. سونىڭ ءبىر دالەلى, كەيىنگى ۋاقىتتا ءۇش بىردەي ۇستاز قازاقستاننىڭ ەڭبەك ەرى اتاندى. بۇل – مەملەكەت پەن پرەزيدەنتتىڭ ۇستازدارعا دەگەن جوعارى سەنىمىنىڭ ايعاعى. پەداگوگتىڭ باستى ۇستانىمى – شاكىرتتەرىنە ساپالى ءبىلىم مەن سانالى تاربيە بەرۋ دەيتىن بولساق, ەلىمىزدىڭ ءبىلىم وشاقتارىندا ەڭبەك ەتىپ جاتقان مۇعالىمدەر وسى ۋنيۆەرسيتەت تۇلەكتەرى اياگۇل ميرازوۆا مەن گۇلجانار نۇرپەيىسوۆاداي پەداگوگيكالىق قىزمەتتىڭ بيىك شىڭىنا جەتكەنىن قالايمىز», دەدى ع.بەيسەمباەۆ.
ايتالىق, كەيىنگى جىلدارى زەرتتەۋ جۇمىستارىمەن اينالىساتىن پەداگوگتەردىڭ ۇلەسى 1,6 ەسەگە ءوسىپ, ماگيستر دارەجەسى بار مۇعالىمدەر سانى 25 مىڭنان اسقان.
كەزدەسۋ بارىسىندا ستۋدەنتتەر مينيسترگە اۋىلدىق جەرلەردە پەداگوگتەردى قولداۋ, جۇمىسقا ورنالاسۋ, اتا-انالار قاۋىمداستىعىمەن بايلانىس, ء«بىرتۇتاس تاربيە» باعدارلاماسى اياسىنداعى تاربيە جۇمىسىنا قاتىستى سۇراقتار قويدى.
سونداي-اق وسى كەزدەسۋ اياسىندا قازاق ۇلتتىق قىزدار پەداگوگيكالىق ۋنيۆەرسيتەتىندە ەلىمىزدىڭ ۇزدىك پەداگوگتەرىنىڭ قۇرمەتىنە «ۇلت كەلبەتى – ۇستازدار» اتتى فوتوگالەرەيا اشىلدى. وندا وتاندىق ءبىلىم سالاسىنا زور ۇلەس قوسقان كورنەكتى ۇستازداردىڭ شىعارماشىلىعى ايشىقتى بەينەلەنگەن. ولاردىڭ قاتارىندا سوتسياليستىك ەڭبەك ەرى, قازاق ءتىلى مەن ادەبيەتى ءپانىنىڭ مۇعالىمى مارجان تاسوۆا, قازاقستاننىڭ ەڭبەك ەرى, بيولوگيا ءپانىنىڭ مۇعالىمى الينا سولوۆەۆا, سونداي-اق قازاقستاننىڭ تۇڭعىش ەڭبەك ەرى اياگۇل ميرازوۆا بار.
«فوتوگالەرەيا – بارلىق ۇستازعا دەگەن قۇرمەتتىڭ بەلگىسى. ءبىز وتكەنىمىزدى بىلمەسەك, بولاشاعىمىزدى باعدارلاي المايمىز. مۇعالىمنىڭ جۇرەگى دە, ءسوزى دە جىلى بولۋى كەرەك. ۇستاز بولۋ – ۇلكەن جاۋاپكەرشىلىك. سول جاۋاپكەرشىلىكتى ابىرويمەن اتقارعان جان عانا ناعىز ۇستاز بولادى», دەدى اياگۇل ميرازوۆا.
ءىس-شارا سوڭىندا وقۋ-اعارتۋ ءمينيسترى عىلىم مەن ۇرپاق تاربيەسى جولىندا جەمىستى ەڭبەك ەتىپ جۇرگەن ءبىر توپ ۇستازدى ماراپاتتادى.
الماتى
