حالىقارالىق ينجەنەرلىك-تەحنولوگيالىق ۋنيۆەرسيتەتىنىڭ (METU ۋنيۆەرسيتەتى) رەكتورى, ۇلتتىق ينجەنەرلىك اكادەميانىڭ كوررەسپوندەنت-مۇشەسى گۇلنار سارسەنبەكوۆا فورۋمعا ستۋدەنتتىك ءوزىن-ءوزى باسقارۋ ينستيتۋتتارىنىڭ كوشباسشىسى بولعان, بۇگىندە جەتىستىككە جەتكەن جاس ماماندار, عالىمدار, بيزنەس وكىلدەرى شاقىرىلعانىن جەتكىزدى. رەكتوردىڭ ايتۋىنشا, ستۋدەنتتىك كوشباسشىلىق بولاشاققا ۇمتىلىستى بىلدىرەدى. ال حالىقارالىق كەڭىستىكتە سۇرانىسقا يە كاسىبي مامان بولۋ ءۇشىن ءبىلىمدى جەتىلدىرۋمەن قاتار رۋحاني قۇندىلىقتاردى يگەرۋ, ەكولوگيالىق تۇراقتىلىق, «جاسىل ەكونوميكا», جاساندى ينتەللەكت سياقتى باسىمدىققا يە سالالاردى يگەرۋ قاجەت. بيىل ۋنيۆەرسيتەتتىڭ بەلسەندى ستۋدەنتتەرى ۇسىنىسىمەن ء«وزىن-ءوزى باسقارۋ جىلى» جاريالاندى. وسى باعىتتا ەڭبەك ادامدارىن قولداۋ جانە ستۋدەنتتەر باستاماسىنا دەمەۋ كورسەتەتىن جوبالار باستالعان.
قازىرگى تاڭدا اتالعان وقۋ ورنىندا مىسىر, موڭعوليا, قىتاي, تۇركيا, رەسەي, ماروككو, وزبەكستان, قىرعىزستان سياقتى 10-نان استام ەلدىڭ ستۋدەنتتەرى ءبىلىم الادى. جىلدان-جىلعا حالىقارالىق ىقپالداستىق نىعايىپ, ءبىلىم الماسۋ جوبالارىنا باسىمدىق بەرىلىپ وتىر.
فورۋمعا وڭتۇستىك كاليفورنيا لوس-اندجەلەس ۋنيۆەرسيتەتىنەن رەسپۋبليكالىق «جاس ۇلان» بالالار جانە جاسوسپىرىمدەر ۇيىمىنىڭ العاشقى جەتەكشىسى, PhD نازيرا بولتىرىكوۆا قاتىسىپ, كوشباسشىلىق تاجىريبەسىمەن ءبولىستى. «ستۋدەنت كەزىمدە ەرتەڭگى كۇن بۇگىننەن باستالاتىنىنا ءمان بەرمەپپىن. وقۋىمدى ءبىتىرىپ الايىن, جۇمىسقا تۇرايىن دەپ كوشباسشىلىقتى كەيىنگە قالدىرا بەرەتىن ەدىم. قانداي ورتادا جۇرسەڭىز دە, سول ورتانى جاقسارتۋعا تىرىسۋ ماڭىزدى ەكەنىن كەيىن ءتۇسىندىم. ءبىزدىڭ ستۋدەنت كەزىمىزدە دە ءوزىن-ءوزى باسقارۋ ۇيىمى بولدى. كوپتەگەن تالقىلاۋ ناتيجەسىز قالاتىن سياقتى كورىنەتىن. بىراق ۋاقىت وتە كەلە تۇسىنگەنىم, ءدال وسى ۇيىم بولاشاعىمىزعا ۇلكەن اسەر ەتتى. ءبىز ۋنيۆەرسيتەتتىڭ شەشىمىنە ىقپال ەتۋدى ۇيرەندىك. ماسەلەن, كوپتەگەن ستۋدەنتتىڭ الەۋمەتتىك ماسەلەلەرىنە جاڭاشىلدىق اكەلدىك. ۇلكەن جەتىستىك وسىلايشا قاراپايىم ادەتتەردەن باستالادى», دەدى ول. ونىڭ ايتۋىنشا, وزىق تەحنولوگيانى يگەرە وتىرىپ, ءوز ورتاڭدى جاعىمدى وزگەرىستەرگە باستاۋدا باتىلدىق قاجەت.
ادام كاپيتالى تاقىرىبىن زەرتتەپ جۇرگەن جاس عالىم, PhD اليا قاراقوجاەۆا جۇمىس ونىمدىلىگى, جاھاندىق باسەكەگە قابىلەتتى تۇلەك اتريبۋتتارىنا توقتالىپ, ءوز تاجىريبەسىن ايتتى. ونىڭ پىكىرىنشە, كاسىبي جەتىستىكتەر ىرگەتاسى ۋنيۆەرسيتەتتە, ءوزىن-ءوزى باسقارۋ ۇيىمىندا قالىپتاسقان. ال باسەكەگە قابىلەتتىلىك ءتىل تابىسۋعا بەيىم, جاڭاشا ويلاۋمەن تىعىز بايلانىستى.
سونىمەن بىرگە جيىندا ستۋدەنت مەتي-كورلي يسااك وپار (گانا مەملەكەتى), گلازگو ۋنيۆەرسيتەتى «ادام سميت» بيزنەس مەكتەبىنىڭ وقىتۋشىسى, PhD باقىت تولەگەنوۆ, رەسەي بيوتەحنولوگيا ۋنيۆەرسيتەتىنىڭ پروفەسسورى تاتيانا دانيلچۋك, الماتى وبلىسى كەگەن اۋداندىق ءماسليحاتىنىڭ توراعاسى الماسبەك نۇعمان, الماتى قالاسى جاستار ساياساتى ءبولىمىنىڭ باستىعى ديدار دىلدابەك, تاعى دا باسقالار كوشباسشىلىق تۋرالى وي-پىكىرلەرىمەن ءبولىسىپ, ۇسىنىستارىن ورتاعا سالدى.
سونداي-اق فورۋمدا ستۋدەنتتەر باستاماسىمەن جارىق كورگەن, ۋنيۆەرسيتەت ومىرىنەن اقپارات تاراتاتىن «METU life» جۋرنالى تانىستىرىلىپ, ءبىلىم الۋشىلاردى جان-جاقتى دامىتۋ جانە قۇزىرەتتىلىگىن قالىپتاستىراتىن الەۋمەتتىك GPA باعالاۋ قۇرالى تانىستىرىلدى. وعان ستۋدەنتتەردىڭ بارلىق جەتىستىگى مەن كورسەتكىشى ەنگىزىلىپ, جىل سوڭىندا ۇزدىك ستۋدەنتتەر ماراپاتتالادى.
ال جيىن بارىسىندا اشىلعان كىتاپ الماسۋ بۇرىشىنا رەكتوردان باستاپ وقىتۋشىلار مەن ستۋدەنتتەر كىتاپ سىيلادى. مۇنىمەن قوسا ستۋدەنتتەردىڭ ويىن ەركىن جەتكىزۋگە مۇمكىندىك بەرەتىن امبەباپ «Home Reading» كىتابى ۇلەستىرىلدى. سونداي-اق «مETU» ۋنيۆەرسيتەتىنىڭ 10-نان اسا ۇزدىك ستۋدەنتىنە كاسىپورىندار «جۇمىسقا شاقىرۋ» سەرتيفيكاتىن تابىستاپ, ۇزدىك ستۋدەنتتەرگە «Propanel» كاسىپورنى شاكىرتاقى ۇلەستىردى. سونىمەن قاتار فورۋم اياسىندا ۋنيۆەرسيتەتتىڭ ستۋدەنتتىك قۇرىلىس جاساعى قۇرىلىپ, قاتىسۋشىلار ارنايى كورمەنى تاماشالادى.
الماتى
