ناۋرىزداعى ۇبت-عا شارتتى تۇردە اقىلى نەگىزدە كۇندىزگى وقۋ نىسانى بويىنشا جوعارى وقۋ ورىندارىنا قابىلدانعان, وتكەن جىلعى مەكتەپ جانە كوللەدج تۇلەكتەرى, ەل ازاماتتىعى جوق, ۇلتى قازاق تۇلعالار, سونداي-اق مەكتەپ بىتىرەتىن تۇلەكتەر جوعارى وقۋ ورىندارىنا اقىلى نەگىزدە ءتۇسۋ ءۇشىن قاتىسادى.
ۇبت بارىسىندا كالكۋلياتور, حيميالىق ەلەمەنتتەردىڭ پەريودتىق جۇيەسى (مەندەلەەۆ كەستەسى) جانە تۇزداردىڭ ەرىگىشتىك كەستەسى تەستىلەۋ باعدارلاماسىندا قولجەتىمدى بولادى. تەست تاپسىرۋشىلار تەستىلەۋ اياقتالعاننان كەيىن 30 مينۋت ىشىندە اپەللياتسياعا ءوتىنىش بەرە الادى. سەرتيفيكات اپەللياتسيالىق كوميسسيانىڭ شەشىمىنەن كەيىن تالاپكەردىڭ جەكە كابينەتىندە شىعادى.
ۇبت-داعى پاندەردىڭ سانى وزگەرىسسىز قالادى, ياعني ۇشەۋى مىندەتتى جانە ەكەۋى تاڭداۋ بويىنشا بولادى. ۇبت تاپسىرمالار سانى – 120. ونىڭ ىشىندە «قازاقستان تاريحىنان» 20 تاپسىرما, «وقۋ ساۋاتتىلىعىنان» 10 تاپسىرما, «ماتەماتيكالىق ساۋاتتىلىقتان» 10 تاپسىرما جانە ەكى بەيىندى ءپان بويىنشا 40 تاپسىرمادان. جوعارى بالل دا 140 بولىپ وزگەرمەي قالدى. تەستىلەۋ ۋاقىتى – 4 ساعات (240 مينۋت). بۇل رەتتە ەرەكشە ءبىلىم بەرۋ قاجەتتىلىكتەرى بار بالالار ءۇشىن ۇسىنىلاتىن قوسىمشا 40 مينۋت ۋاقىت ساقتالاتىنىن ايتا كەتۋ كەرەك. ءبىر ەسكەرەرلىگى, تالاپكەرلەر ءوتىنىش بەرۋ بارىسىندا ولار تەستىلەۋ كۇنىن, ۋاقىتىن جانە پۋنكتىن وزدەرى تاڭدادى.
ەستەرىڭىزگە سالا كەتسەك, 10 اقپاندا قاڭتار ۇبت-سى اياقتالدى, بۇل تەستىلەۋگە 164 مىڭعا جۋىق ادام, سونىڭ ىشىندە ەرەكشە ءبىلىم بەرۋ قاجەتتىلىكتەرى بار 392 تالاپكەر قاتىستى. تالاپكەرلەردىڭ 76,8%-ى قازاق تىلىندە, 23,1%-ى ورىس تىلىندە, 89 ادام اعىلشىن تىلىندە تەستىلەۋدەن ءوتتى. ۇبت-دا شەكتى بالدى 70,4%-عا جۋىق تالاپكەر جينادى. ورتاشا بالل 65,8-ءدى قۇرادى. ەڭ جوعارى بالل – 139. جالپى, 186 تالاپكەر 130-دان جوعارى بالل جينادى. تەستكە قاتىسۋشىلاردىڭ باسىم بولىگى «ماتەماتيكا-فيزيكا» كومبيناتسيالارىن تاڭداعان, اتاپ ايتقاندا, 17,5%-ى تاپسىردى. «بيولوگيا-حيميا» پاندەرىن 17,27% تاڭداعان. سونداي-اق توپ-3 قاتارىنا تالاپكەرلەردىڭ 10,29% تاڭداعان «ماتەماتيكا-ينفورماتيكا» كومبيناتسياسى كىردى. ەڭ از تاڭدالعان كومبيناتسيا – «حيميا-فيزيكا», ونى 197 ادام تاپسىرعان. قاڭتاردا تەستىلەۋدەن وتكەن تالاپكەرلەر «وقۋ ساۋاتتىلىعى» ءپانىن جوعارى دەڭگەيدە تاپسىردى. ورتاشا ەسەپپەن سۇراقتاردىڭ 75,43%-ىنا دۇرىس جاۋاپ بەرىلگەن. ال «فيزيكانى» تاپسىرعان تالاپكەرلەردىڭ تەك 32,32% تاپسىرمانى دۇرىس ورىنداعان, ولارعا «ەلەكتروماگنيتتىك يندۋكتسيا» تاقىرىبى قيىن بولدى. وسىلايشا, ۇبت ناتيجەلەرى بويىنشا ۇلتتىق تەستىلەۋ ورتالىعى تەك ساندار ەمەس, سونىمەن قاتار تاقىرىپتار بويىنشا جان-جاقتى, تولىق تالداۋدى دا ۇسىنادى.
ۇبت وتكىزۋ بارىسىندا 197 رەت ەرەجە بۇزىلعانى بەلگىلى بولدى. ونىڭ ىشىندە 101 تالاپكەر سمارتفون جانە شپارگالكا سياقتى تىيىم سالىنعان زاتتاردى الىپ ءوتۋ ارەكەتى سالدارىنان تەست تاپسىرۋ مۇمكىندىگىنەن ايىرىلدى, ال تەستىلەۋ كەزىندە ەرەجەلەردى بۇزعانى ءۇشىن اۋديتوريادان 96 ادام شىعارىلدى. وزگە تۇلعالار انىقتالعان جوق. 2025 جىلعى ۇبت اياقتالعاننان كەيىن كۇنتىزبەلىك جىلدىڭ 31 قازانىنا دەيىن تەستىلەۋدىڭ بەينەجازبالارىنا تالداۋ جۇرگىزىلەتىنىن, تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا ءتۇسۋشىنىڭ ۇبت ناتيجەلەرى جويىلدى.
