سۋرەت وڭىرلىك قورعانىس ىستەرى جونىندەگى دەپارتامەنتىنەن الىندى
پاۆلودار وبلىسىنىڭ قورعانىس ىستەرى جونىندەگى دەپارتامەنتىنىڭ اسكەري قىزمەتشىلەرى مەن جەرگىلىكتى اتقارۋشى ورگانداردىڭ وكىلدەرى سوعىس ارداگەرى ۆاسيلي ءيۆانوۆيچتى 99 جاسقا تولعان كۇنىمەن قۇتتىقتادى.
وڭىرلىك قورعانىس ىستەرى جونىندەگى دەپارتامەنتىنىڭ باستىعى, مايور بەكزات ورازوۆ مايدانگەرگە سوعىستا كورسەتكەن ەرلىگى, جاۋىنگەرلىك رۋحى مەن جەڭىسكە قوسقان ۇلەسى ءۇشىن العىسىن ءبىلدىردى.
– ءسىز ادام ايتقىسىز قيىندىقتى باستان وتكەرىپ, جاۋدىڭ الاپات كۇشىنە ءوز قارۋلاستارىڭىزبەن بىرگە قارسى تۇردىڭىز. سىزدەردىڭ تاباندى ەرلىكتەرىڭىزدىڭ ارقاسىندا وتانىمىزعا كوزىن الارتقان جاۋدىڭ بەتى قايتىپ, جەڭىس تۋىن تىكتىك. سوعىس جىلدارى جاساعان ەرلىك الەمدىك تاريح شەجىرەسىندە التىن ارىپتەرمەن جازىلىپ قالدى. بەيبىت بولاشاعىمىز ءۇشىن جاساعان جاۋىنگەرلىك ىستەرىڭىز ءۇشىن ۇرپاق سىزگە ءدان ريزا, – دەدى ول.
دەپارتامەنت باسشىسى قورعانىس ءمينيسترى گەنەرال-پولكوۆنيك رۋسلان جاقسىلىقوۆتىڭ اتىنان قارت مايدانگەرگە العىسحات تابىس ەتتى.
ۆاسيلي گريگوراش 1926 جىلى 21 اقپاندا رەسەي فەدەراتسياسى, التاي ولكەسىنىڭ گۋرلينكا اۋىلىندا دۇنيەگە كەلگەن. مەكتەپتى بىتىرگەننەن كەيىن 17 جاسىندا جاس جاۋىنگەر اسكەر قاتارىنا قىزمەت ەتۋگە اتتاندى. اعا سەرجانت ۆاسيلي گريگوراش بايكال اسكەري وكرۋگى 293-ديۆيزياسىنىڭ قۇرامىندا سوعىسىپ, ءبولىم كومانديرى بولدى. II دارەجەلى «وتان سوعىسى» وردەنىمەن, «جاپونيانى جەڭگەنى ءۇشىن» مەدالىمەن جانە باسقا دا مەرەيتويلىق ناگرادالارمەن ماراپاتتالعان.
1951 جىلى ول پاۆلودارعا كوشىپ كەلىپ, لوكوموتيۆ دەپوسىنا جۇمىسقا تۇردى. 1988 جىلى زەينەتكە شىققاندا ەڭبەك كىتاپشاسىندا ءبىر عانا جازۋ – دەپودا ەڭبەك ەتكەنى تۋرالى باياندالعان.
– جاستارىمىز اۋىرماسىن, كوڭىلدەرى قارتايماسىن. وتانى مەن تۋعان وتباسىن ايالاسىن. بارلىق وتانداسىما ۇزاق عۇمىر تىلەيمىن, – دەيدى ۆاسيلي اتاي.
قازىرگى ۋاقىتتا ەرتىس-بايان وڭىرىندە ەكىنشى دۇنيەجۇزىلىك سوعىستىڭ التى ارداگەرى تۇرىپ جاتىر.
پاۆلودار
