گۇلميرا داۋلەتوۆا: شاحماتتى دامىتۋعا ەرەكشە كوڭىل بولىنەدى

– گۇلميرا بەكزاتقىزى, سۇح­با­تى­مىزدى شاحماتشى­لارى­مىز­دىڭ بىلتىرعى جەتىستىگىنەن باستاساق.

– ءبارى دە سالىستىرعاندا كورىنەدى دەگەن ءسوز بار ەمەس پە. 2023 جىلدىڭ قاڭتارىندا قوعامدىق ۇيىمنىڭ كەزەكتەن تىس سەزىندە قازاقستان شاحمات فەدەراتسياسىنىڭ (قشف) جاڭا پرەزيدەنتى بولىپ «Freedom Holding Corp.» باسشىسى تيمۋر تۋرلوۆ سايلاندى. بۇل شەشىم كوپ ۇزاماي ناتيجەسىن بەرە باستادى. 2023 جىلدىڭ وزىندە حالىقارالىق شاحمات فەدەراتسياسى (FIDE) مەن ازيا­نىڭ شاحمات فەدەراتسياسى­نىڭ (ACF) قامقورلىعىمەن وتەتىن رەسمي جارىستاردا ەلىمىزدىڭ شاحماتشىلارى 116 مەدال جەڭىپ السا, بىلتىر – 160, سونىڭ ىشىندە 55 التىن, 54 كۇمىس جانە 51 قولا مەدالدى قانجىعاسىنا بايلادى. ونىڭ ىشىندە بۋداپەشت قالاسىندا وتكەن 45-شاحمات وليم­پياداسىندا ءىى ورىندى يەلەنگەن ەلىمىزدىڭ ايەلدەر قۇراماسىنىڭ ء(بيبىسارا اساۋباەۆا, مەرۋەرت قاماليدەنوۆا, كسەنيا بالاباەۆا, الۋا نۇرمان مەن ءامينا قايىر­بەكوۆا, باس جاتتىقتىرۋشى – پاۆەل كوتسۋر, جاتتىقتىرۋشى – الەكساندر مويسەەنكو) جەتىستىگىن ەرەكشە اتاپ وتكەن ءجون.

ءۇندىستاننىڭ گانديناگار قالا­سىندا وتكەن جارىستا قازىبەك نوگەربەك 20 جاسقا دەيىنگى شاحماتشىلار اراسىندا الەم چەمپيونى اتاندى. 39 ەلدەن كەلگەن 122 قار­سىلاسىنىڭ 13-ىندە گروسسمەيستەر اتاعى بار بولاتىن. بىراق ءبىزدىڭ شاحماتشىمىز 6 پارتيادا جەڭىسكە جەتىپ, ال 5 پارتيانى تەڭ ويىنمەن اياقتاپ, بىردە-ءبىر رەت جەڭىلگەن جوق. وسىلايشا, ول التىن مەدالدى يەمدەنىپ, گروسسمەيستەر اتاعىنا يە بولدى.

ءجاسوسپىرىم ۇل-قىزدارىمىز الاننا بەرىكقىزى مەن مارك سميرنوۆ (كلاسسيكا), اليشا بيسا­ليەۆا (راپيد), ەلناز قالياحمەت پەن دانيال ساپەنوۆ (بليتس) الەم چەمپيوناتتارىندا التىن مەدال ولجالادى. بيىل دا شاحماتشىلارىمىز ودان دا زور جەتىستىكتەرگە جەتىپ, ءبىزدى ءالى تالاي قۋانتاتىنىنا سەنىمدىمىن.

– كەيىنگى جىلدارى ەلىمىز الەمدىك شاحمات ورداسىنا اينال­عانداي اسەر قالدىرادى. 2023 جىلى استانادا الەم چەمپيونى اتاعى ءۇشىن وتكەن ماتچتى ايتپاعاندا, بىلتىر دا, بيىل دا ەلىمىزدە بىرنەشە اۋقىمدى تۋرنير ۇيىم­داس­تىرىلدى. بيىل استانادا بليتس پەن راپيدتەن كوماندالىق الەم چەمپيوناتى جالاۋىن جەلبىرەتتى. مۇنداي جاھاندىق سايىستاردى وتكىزۋ زياتكەرلىك ويىننىڭ ەل ىشىندە وركەن جايۋىنا سەرپىن بەرە مە؟

KazChess/قشف – ىنتىماعى جاراسقان ۇجىم. بىرىكسەك الىنبايتىن قامال جوق

– بۇل ءىس-شارالاردى تىلگە تيەك ەتكەنىڭىز وتە ورىندى. بۇكىل عالام­شاردىڭ نازارىن وزىنە اۋدارعان كلاسسيكالىق شاحماتتان الەم چەمپيونى اتاعىن الۋعا ارنالعان ماتچ ەلىمىزدە العاش رەت ءوتتى. ەلىمىزدىڭ پرەزيدەنتى قاسىم-جومارت توقاەۆ جاھاندىق دوداعا قاتىسقان دين ليجەن مەن يان نەپومنياششي سىندى شاحمات الىپتارىنا قۇرمەت كورسەتىپ, اقوردادا قابىلدادى. قابىلداۋدا پرەزيدەنت وسىناۋ زياتكەرلىك سپورتتى قانشالىقتى باعالايتىنىن كورسەتتى.

راپيد پەن بليتستەن 2024 جىلعى كومان­­­دالىق الەم چەمپيوناتىندا  شاحمات جۇلدىزدارى استانادا باس قوستى. ساڭلاقتار اراسىندا بىرنەشە دۇركىن الەم چەمپيوندارى, ەرلەر مەن ايەلدەر رەيتينگىلەرىنىڭ كوشباسشىلارى ماگنۋس كارلسەن مەن حوۋ يفان, سونداي-اق سول كەزدەگى الەم چەمپيوندارى تسزيۋي ۆەنتسزيۋن مەن دين ليجەن بولدى.

ال الماتىدا جاستار اراسىندا ححVI ازيا چەم­پيوناتىنا قاتىس­قان 650-گە جۋىق سپورتشىنىڭ ارا­سىنان الداعى ۋاقىتتا شاحمات جۇل­دىزدارىنىڭ شىعاتىنى ءشۇباسىز. بۇل دودا قازاقستان قۇرا­ماسىنىڭ جەڭىسىمەن اياقتالدى. جاس شاح­ماتشىلارىمىز 25 مەدال, سونىڭ ىشىندە 12 التىن مەدالدى قانجىعاسىنا باي­لاپ, رەكوردتىق ناتيجەگە قول جەتكىزدى.

بىلتىر تۋريزم جانە سپورت مينيسترلىگىنىڭ قولداۋىمەن شىم­كەنت­تە ايگىلى شەتەلدىك گروسسمەيس­تەر­لەر­دىڭ قاتىسۋىمەن ايەلدەر اراسىنداعى فيدە گران-پري كەزەڭىن, ءۇش شۆەيتساريالىق جارىستى, سونداي-اق قازاقستان كۋبوگى اياسىندا نوكاۋت جۇيەسى بويىنشا فينالدى, گروسسمەيستەر مەن حالىقارالىق شەبەر نورماسى ورىندالاتىن ون جاھاندىق تۋرنير وتكىزدىك. وسىناۋ دودانىڭ بارلىعىن قشف فيليالدارى جەرگىلىكتى اكىمدىك­تەردىڭ قولداۋىمەن ءار وڭىردە: اقتوبە مەن قوستاناي, تال­دىقورعان مەن قاسكەلەڭ, قاراعاندى مەن كوكشەتاۋ, شىمكەنت پەن قىزىلوردا, وسكەمەن مەن پاۆ­لوداردا وتكىزگەنىنىڭ ماڭىزى زور. سەبەبى ەلدە شاحماتقا دەگەن قىزىعۋشىلىق كۇشەيىپ, زياتكەرلىك ويىندى ۇيرەنۋگە ىقىلاس تانىتاتىن بالالار مەن ەرەسەكتەردىڭ سانى ارتادى.

– بيىلعى جىل دا ءساتتى باس­تالىپ, شاحماتشىلارىمىز الەمدىك دودالاردان ولجالى ورالدى. ماجارستاندا وتكەن شاحمات وليمپياداسىندا ايەلدەر قۇراماسى كۇمىس مەدال ەنشىلەدى. بۇرىن-سوڭدى مۇنداي جەڭىس بۇيىرماعان ەدى بىزگە.

– وتە دۇرىس ايتاسىز. بۇعان دەيىن ايەلدەر قۇراماسىنىڭ شاحمات وليمپياداسىندا كورسەتكەن ەڭ جاقسى ناتيجەسى – 2014 جىلى ءوزىم دە قاتىسقان نورۆەگيانىڭ ترومسيو قالاسىنداعى جارىستا 6-ورىن, 2022 جىلى ءۇندىستاننىڭ چەنناي قالا­­سىندا 5-ورىن بولاتىن. ال ەندى جاستارىمىزدىڭ قۇراماسى (كوماندا مۇشەلەرىنىڭ ورتاشا جاسى – 18,5 جاس) كۇمىس مەدال جەڭىپ الدى. مەن ونى التىن جالات­قان كۇمىس دەر ەدىم, ويتكەنى مارەگە ەكى تۋر قالعاندا قىزدارىمىز كوش باستاپ كەلە جاتتى…

كەلەسى وليمپياداعا دەيىن ۋاقىت بار. بۇعان قوسا KazChess (قشف) تانىمال تالانت­تى شاحمات­شىلارىمىزعا, (قىز­دار­عا, بالا­لارعا دا) گرانت ءبولىپ, قولداۋ باع­دار­لاماسىن ىسكە اسىرىپ كەلەدى. ونىڭ شەڭبەرىندە جىل سايىن ءار قۇراما مۇشەسىنە 30 ملن, 15 ملن جانە 5 ملن تەڭگەدەن بولىنەدى, سونىڭ ارقاسىندا ولاردىڭ كاسىبي تۇرعىدا ءوسۋى, سونىڭ ىشىندە حالىقارالىق جيىندارعا بارۋى, كاسىپقوي جات­تىق­تىرۋشىلاردان ساباق الۋى, بەدەلدى تۋرنيرلەرگە قاتىسۋى ءۇشىن بىرەگەي جاعداي جاسالعان.

– بىلتىر ماقتاۋلى ورەن­دەرىمىز برازيليادا وتكەن جاس­وسپىرىمدەر مەن جاستار اراسىندا الەم چەمپيوناتىنان 3 كۇمىس, 1 قولا مەدالمەن ورالدى. جاس­تار­دىڭ اياق الىسى قالاي؟

– قازىرگى كەزدە جاسوسپىرىمدەردىڭ الەم چەمپيوناتتارى ءۇش جاس ساناتى بويىنشا وتكىزىلەدى, بۇل: 8, 10 جانە 12 جاسقا دەيىن­گىلەر – كادەتتەر, 14, 16-18 جاسقا دەيىن­گىلەر – بوزبالالار جانە 20 جاسقا دەيىنگى ويىنشىلار – جاستار دوداسى. سوڭعىسى بىلتىر ماۋسىم ايىنىڭ باسىندا گانديناگاردا ء(ۇندىستان) ءوتتى. وندا قازىبەك نوگەربەك چەمپيون اتاندى. ال العاشقى ەكى جارىس قاراشا ايىندا فلوريانوپوليس (برازيليا) جانە مونتەسيلۆانو (يتاليا) قالالارىندا ءوتتى: وندا 10 جاسار الاننا بەرىكقىزى جانە 12 جاسار مارك سميرنوۆ ءبىرىنشى ورىندار­عا شىقتى. جيىنتىعىندا ءبىزدىڭ بالالار 8 مەدالدى قانجىعا­سىنا بايلادى – بۇل رەكوردتىق جەتىس­تىك (بۇعان دەيىن جاسوسپىرىمدەرى­مىز 2022 جىلى 6 مەدال جەڭىپ العان). وسىعان وراي ەرەكشە اتاپ وتەتىنى, كوماندالىق ەسەپتە جاستارىمىز شاحمات الەمىندە مويىندالعان ءۇندىستان مەن قىتاي سياقتى الىپتاردان وزدى.

KazChess/قشف پرەزيدەنتى تيمۋر تۋرلوۆ, KazChess/قشف ءبىرىنشى ۆيتسە-پرەزيدەنتى دارمەن سادۋاقاسوۆ جانە KazChess/قشف اتقارۋشى ديرەكتورى گۇلميرا داۋلەتوۆا الماتىدا وتكەن جاستاردىڭ 26-شى ازيا چەمپيوناتىنا قاتىسۋشىلاردىڭ اراسىندا

بىراق اڭگىمە مەدال سانىندا دا ەمەس. ەڭ باستىسى, بۇل جەتىستىكتىڭ بارلىعى جاس شاحماتشىلارىمىزدى شابىتتاندىرادى, جالىقپاي وقىپ-ۇيرەنىپ, جاتتىعىپ, شىدام­دىلىق تانىتقان جاعدايدا ولاردىڭ ارقايسىسى ۇلكەن سپورت شەبەرى بولا الاتىنىن كورسەتەدى. وسىعان وراي ايتا كەتەتىنى, 2023 جىلى KazChess (قشف) پرەزيدەنتى تيمۋر تۋرلوۆتىڭ «Freedom Broker» ينۆەستيتسيالىق كومپانياسىنىڭ دەمەۋشىلىك قولداۋىمەن ەلىمىزدىڭ 8-16 جاس ارالىعىنداعى ۇزدىك شاحماتشىلارىنا ارنالعان جاس تالانت­تاردى قولداۋ باعدارلاماسىن ىسكە اسىرۋعا كىرىستى.

قازىرگى تاڭدا ەلىمىزدىڭ بالالار مەن جاس­وس­پىرىمدەر قۇراماسىنىڭ 45 مۇشەسىنە التىن, كۇمىس, قولا دەپ اتالاتىن ءۇش پاكەت بويىنشا تەگىن دەمەۋشىلىك قولداۋ كور­سەتىلەدى. پاكەتتىڭ تۇرىنە قاراي جاس شاحماتشىلارعا اي سا­يىن اقشالاي تولەم جاسالىپ (100 000 تەڭگە), قۋاتتى ويىن نوۋتبۋكتارى تابىس ەتىلەدى. سونداي-اق بۇعان ۆاۋچەرلىك جۇيە بو­يىنشا جاتتىقتىرۋشىلاردىڭ ساباق­تارىنا (توپتىق جانە جەكە-جەكە), وقۋ-جاتتىعۋ جيىندارىنا, حالىق­ارالىق جانە رەسپۋبليكالىق تۋرنيرلەرگە قاتىسۋ, فيزيكالىق جانە پسيحولوگيالىق دايىن­­دىق, شاحمات باعدارلامالارى مەن شاحمات ادەبيەتى, ياعني, جوعارى دەڭ­گەيدەگى اسا شەبەر شاحمات­شىلاردى دايارلاۋعا قاجەتتىنىڭ ءبارى قامتىلعان.

جاس تالانتتاردى قولداۋ باع­دار­­لاماسى شەڭبەرىندە دەمەۋ­شىلىك كومەك الاتىن بالالار ءار جىلدىڭ قورىتىندىسى بويىن­شا انىقتالادى. ۇپاي سانى قازاق­ستان, الەم, ازيا جانە باتىس ازيا چەمپيوناتتارىندا ۋاقىت باقىلاۋدىڭ بارلىق نۇسقاسى – كلاسسيكا, راپيد جانە بليتس بويىنشا جارىسقا قاتىسقانى ءۇشىن, سونداي-اق بەلگىلى ءبىر رەيتينگكە قول جەتكىزگەنى ءۇشىن ەسەپتەلىپ بەرىلەدى.

– قازاقستان شاحمات فەدەراتسياسى مەكتەپتەردە وسى ويىندى ۇيرەتۋدى, دامىتۋدى قولعا الدى. بۇل شارۋا قالاي جۇزەگە اسىرىلىپ كەلەدى؟

– مەملەكەت باسشىسىنىڭ قول­داۋىمەن, ەل ۇكىمەتىنىڭ 2023 جىلعى 14 شىلدەدەگى №576 قاۋلىسىمەن «قازاقستان رەسپۋب­ليكاسىندا شاح­ماتتى دامىتۋدىڭ 2023–2027 جىل­دارعا ارنالعان كەشەندى جوسپارى» دەپ اتالاتىن بىرەگەي قۇجات بەكى­تىلدى. ونىڭ «كۇتىلەتىن ناتيجە» دەگەن بولىمىندە ەڭ الدىمەن «باس­تاۋىش سىنىپ وقۋشىلارىنىڭ 20% ۇلەسىن شاحماتپەن قامتۋ (2024 جىلى – 5% – 350 مەكتەپ; 2025 جىلى – 10% – 700 مەكتەپ; 2026 جىلى – 15% – 1050 مەكتەپ; 2027 جىلى – 20% – 1400 مەكتەپ)» دەپ كورسەتىلگەن.

ء«بىلىم بەرۋدەگى شاحمات» جوباسىن KazChess (قشف) وقۋ-اعارتۋ مينيستر­لىگىمەن, سونداي-اق عىلىم جانە جوعارى ءبىلىم مينيستر­لىگى­مەن بىرلەسە ىسكە اسىرىپ جاتىر. قازىرگى كەزدە ەلىمىزدىڭ 550 مەكتەبىندە ءبىز ازىرلەگەن جانە بارلىق دەڭگەيدە كەلىسىلگەن ءبىلىم بەرۋ باعدارلاماسى بويىنشا 1 مەن 4-سىنىپتا وقي­تىن 20 مىڭنان استام بالا شاحمات ۇي­رە­نىپ ءجۇر. ساباقتى 797 مۇ­عا­لىم وتكىزەدى. كەشەندى جوسپاردا كورسەتىلگەن كۇتىلەتىن مىندەتتىڭ مەرزىمىنەن بۇرىن ارتىعىمەن ورىندالاتىنىنا سەنىمدىمىز.

– تامىز ايىندا ەلىمىز بەن الەمنىڭ ءبىلىم بەرۋ سالاسى­نىڭ ۇزدىك ساراپشىلارى, حا­لىق­­ارالىق شاحمات فەدەرا­تسياسىنىڭ وكىلدەرى جينالعان ء«بىلىم بەرۋدەگى شاحمات» حالىق­ارالىق كونفەرەنتسياسى ءوتتى. اۋقىمدى شارادا قانداي تۇيت­كىل­دىڭ ءتۇيىنى شەشىلىپ, نەندەي جوسپار ءتۇزىلدى؟

– 2023 جىلدىڭ ءساۋىر ايىندا ءبىز شاحماتتى ۇيرەتۋ ماسەلەلەرى بويىنشا تۇڭعىش كونفەرەن­­تسيا­­­نى وتكىزىپ, وعان شاقىرىلعان بىر­نەشە ەلدىڭ ساراپشىلارى تاجى­ري­بە­لەرىن ءبولىستى. سودان سوڭ 21-22 تامىزدا استانادا ء«بىلىم بەرۋ­دەگى شاحمات» اتتى ءىى حالىقارا­لىق كونفەرەنتسيا دا ناتيجەلى ءوتتى. جيىندا تالقىلانعان نەگىزگى تاقىرىپتارعا كەلسەك, بۇل – XXI عاسىر ادامىنىڭ بىلىك-قۇزىرەتىنە شاحمات ءبىلىمىنىڭ تيگىزەتىن اسەرى ايتىلدى. جاپپاي تسيفرلاندىرۋ مەن جاساندى ينتەللەكت زامانىندا ءبىلىم سالاسىنىڭ دامۋى, شاحماتتى مەكتەپتەرگە ەنگىزۋدىڭ قيىن­دىعى مەن ونى تالداۋدىڭ وزەكتى­لىگى سىندى ماسەلەلەر قامتىلدى. ايتا كەتەتىنى, فيدە ۇيىمىنىڭ «Chess in education» كوميسسياسىنىڭ جوعارى لاۋازىمدى قىزمەتكەرلەرى دجەرري نەش (اقش), ريتا اتكينس (ماجارستان) جانە لەونچو گارسيا (يسپانيا), سونداي-اق يسپانيا, تۇركيا, ارمەنيا مەن باسقا ەلدەردىڭ الەمدىك دەڭگەيدەگى ساراپشى ماماندار ءوز ويلارىن ءبولىسىپ, ورتاعا سالدى.

– 2025 جىل دا ساتىمەن باستالدى. ەڭ الدىمەن جاسوسپىرىمدەر اراسىندا ەل چەمپيوناتى جوعارى دەڭگەيدە ۇيىمداستىرىلدى.

– راسىندا دا, 15-25 قاڭتار ارالىعىندا الماتىدا شاحماتتان 6-18 جاس ارالىعىن­داعى ويىنشىلار قاتىسقان 7 جاس ساناتىندا 2025 جىلعى ەل چەمپيوناتى ءوتتى. ەلىمىزدىڭ بارلىق 17 وبلىسى مەن رەسپۋبليكالىق ماڭىزى بار 3 قالاسىنان كەلگەن 1000-عا جۋىق قاتىسۋشى ۋاقىتتى باقىلاۋدىڭ بارلىق نۇسقاسى – ستاندارتتى (كلاسسيكالىق), جىلدام (راپيد) جانە شاپشاڭ (بليتس) شاحمات بويىنشا جۇلدەلى ورىنداردى ساراپقا سالدى. وسى دودا بارىسىندا ءار جاس ساناتىندا اسا دارىندى بالالارىمىزدىڭ بار ەكەنىنە تاعى دا كوزىمىز جەتتى. سوندىقتان فەدەراتسيانىڭ مىندەتى – ەلىمىزدىڭ داڭقىن اسقاقتاتۋ ءۇشىن شاحماتتىڭ شىڭىنا جەتۋ جولىندا ولارعا قولداۋ كورسەتۋ.

حالىقارالىق شاحمات فەدەراتسياسى (FIDE) مەن ازيا شاحمات فەدەراتسياسىنىڭ (ACF) بارلىق ساناتتار – جاسوسپىرىمدەر (7 جاس­تان 20 جاسقا دەيىنگىلەر), ەرەسەكتەر, سەنورلار (50 جاستان اسقان) جانە اۋەسقويلار (رەيتينگى 2300 ەلو تارماعىنان جوعارى ەمەس ويىنشىلار) ءۇشىن رەسمي حالىقارالىق جا­رىس­تاردىڭ جاقسى قۇرىلىمدالعان جۇيە­سىن قۇرعانىن ايتا كەتۋ كەرەك. مىنە, وسى ءىس-شارانىڭ بار­لى­عىندا ءبىزدىڭ شاحماتشىلار مەن قۇرامالارىمىز مەدال ءۇشىن جارىسقا تۇسەدى.

– شاحمات فەدەراتسياسى الەۋ­مەتتىك سالاعا دا ەرەكشە كوڭىل ءبولىپ, بىرقاتار اۋقىمدى جوبا­لاردى جۇزەگە اسىردى. كەلە­شەكتە تە مۇنداي يگى باستاما جالعاسىن تابا ما؟

– ارينە, ءبىز فەدەراتسيانىڭ ەل ىشىندەگى, سول سياقتى حالىقارا­لىق الاڭداعى الەۋمەت­تىك جاۋاپ­كەر­شىلىگىنىڭ وتە ماڭىزدى ەكەنىن تۇسىنەمىز.

بىلتىر سەناتتىڭ كوپ ساتىلى اشىق كۋبوگىن وتكىزدىك. وعان وب­لىس­تار مەن رەسپۋبليكالىق ماڭى­زى بار قالالار ءماسليحاتتارىنىڭ بار­لىق شاقىرىلىم دەپۋتات­تارى, وبلىستىق جانە قالالىق قوعام­دىق كەڭەس مۇشەلەرىنىڭ اراسىنان شىققان 2000-عا جۋىق شاحماتشى قاتىستى. قاتارىنان ەكىنشى جىل ىشكى ىستەر ءمينيسترىنىڭ كۋبوگىن الۋ­عا رەسپۋبليكالىق شاحمات ءتۋرنيرى ۇيىمداستىرىلىپ ءجۇر. وعان دايىندىق اياسىندا ءتارتىپ ساقشى­لارىنا ارناپ شاحماتتان جۇيەلى وقۋ-جات­تىعۋ جانە ايماقتىق ىشكى ىستەر دەپارتامەنتتەرىنىڭ ءارتۇرلى قىزمەتتەرى مەن بولىمشەلەرىنىڭ قىزمەتكەرلەرى اراسىندا ىرىك­تەۋ دودالارى وتەدى. KazChess (قشف) سىرتقى ىستەر ءمينيسترىنىڭ قول­داۋىمەن ۇيىمداستىرىپ جۇر­گەن «Diplomatic Chess Cup 2024» – ديپلوماتيا قىزمەتىنىڭ قىز­مەت­كەرلەرىنە ارنالعان شاحمات ءتۋرنيرى داستۇرگە اينالادى. «قوس ەلوردانىڭ 2024 جىلعى كۋبوگى» – باق قىزمەتكەرلەرى مەن بلوگەرلەر بەتپە-بەت جانە ونلاين قاتىسقان شاحمات ءتۋرنيرى قىزىقتى فورماتىمەن ەستە قالدى.

حالىق­ارالىق جوبالارعا كەلسەك, KazChess (قشف) وتكەن جىلدان بەرى «Freedom Holding Corp.» كورپوراتسياسىنىڭ قارجىلىق قولداۋىمەن فيدە جانە ACF ۇيىمىمەن سەرىكتەستىكتە ىسكە اسىرىپ جاتقان «Freedom Asian Chess Initiatives» ءىس-شاراسىن ەرەكشە اتاپ وتكەن ءجون. بۇل جوبا شاحمات ويناۋ ءالى جەتكىلىكتى دامىما­عان كامبودجا, نەپال, ومان, تاجىكستان, شري-لانكا سياقتى ازيا ەلدەرىنە بىرەگەي ءبىلىمىمىز بەن ماشىعىمىزدى وڭتايلى ۇي­رە­تە الاتىنىمىزدى كورسەتتى. وسى ەلدەرگە بارعان قازاقستان­نىڭ جاتتىقتىرۋشىلارى بالا­لار-جاسوسپىرىمدەر مەن ەرەسەكتەر قۇرامالارىنىڭ مۇشەلەرىمەن ساباق, جاتتىقتىرۋشىلارعا ارنال­عان وقۋ سەمينارلارىن جانە اۋەس­قويلارمەن ءبىر مەزگىلدەگى ويىن سەانستارىن وتكىزدى. ودان كەيىن ساباق ونلاين رەجىمىندە جالعاستى. ولاردىڭ اتقارعان جۇمىسى ءۇشىن وسى ەلدەردىڭ فەدەراتسيالارى دا, فيدە دە العىسىن ءبىلدىردى.

ءسوزىمدى قورىتا كەلە, ارىپتەس­تە­رىمنىڭ ەڭبەگىن اتاپ وتكىم كەلە­دى. قازىرگى ۋاقىتتا KazChess (قشف)-نىڭ استانا مەن الماتى قالا­لارىندا ورتالىق كەڭسەلەرى, بار­لىق وبلىس ورتالىقتارى مەن رەس­پۋ­ب­ليكالىق ماڭىزى بار قالا­لاردا فيليالدارى جۇمىس ىستەيدى. بۇل – جارىس پەن ءىس-شارالاردى ۇيىمداستىرۋ مەن وتكىزۋ, وپەرا­تسيالىق قىزمەت, قارجى, لوگيستيكا, ماركەتينگ پەن پيارعا قاتىستى بارلىق سالادا جوعارى بىلىگى بار مامانداردىڭ ۇلكەن كومانداسى. بىراق ەڭ باستىسى, ولار – ىنتىماعى جاراسقان پىكىرلەستەر ۇجىمى ەكەنىن دالەل­دەپ كەلەدى.

اڭگىمەلەسكەن –

قۋانىش نۇردانبەك ۇلى,

«Egemen Qazaqstan»