جارىستىڭ العاشقى كۇنى بۇركىت باسەكەسىمەن باستالدى. قۇسبەگىلەر بۇركىتتى قولعا شاقىرۋ, شىرعاعا سالۋ كەزەڭدەرىندە شەبەرلىكتەرىن كورسەتتى. جارىس قورىتىندىسىندا ۇزدىك شىققان 18 قۇسبەگى اقتىق مارەگە جولداما الدى.
سايىستىڭ ەكىنشى كۇنى قارشىعا مەن يتەلگىلەردىڭ سىنعا تۇسۋىمەن جالعاستى. بۇل جارىستاردا دا قۇستاردىڭ العىرلىعى, ۇشۋعا دايىندىعى, اڭ مەن قۇستى الۋ قابىلەتى جانە قۇسبەگىنىڭ باپتاۋ شەبەرلىگى ساراپقا سالىندى.
چەمپيونات قورىتىندىسىندا بۇركىت قۇسى ساناتىندا باس جۇلدەنى اقمولا وبلىسىنىڭ وكىلى ەرلان كەنجەتاەۆ جەڭىپ الدى. ەكىنشى ورىندى اباي وبلىسىنىڭ بۇركىتشىسى ەرزات بايقاداموۆ ەنشىلەدى. جۇلدەلى ءۇشىنشى ورىن اقمولا وبلىسىنىڭ تاعى ءبىر وكىلى رۋسلان تۋمىرزينگە بۇيىردى. قارشىعانىڭ العىرلىعى مەن ەپتىلىگى سىنالعان جارىستا ءبىرىنشى ورىندى تۇركىستان وبلىسىنىڭ وكىلى ارشاباي داۋرەن الدى. ودان كەيىنگى ورىنداردى جامبىلدىق سەرىكبولسىن جالعاس ۇلى جانە تاعى ءبىر تۇركىستاندىق زاكي ماحمۇتحان قانجىعالارىنا بوكتەردى.
«يەگى يتەلگىنىڭ تاماعىنداي» دەپ سۇلۋ قىزدىڭ يەگىن سۋرەتتەگەندە قولدانىلاتىن شاعىن تۇرىقتى يتەلگىلەردىڭ سايىسىندا قاراعاندىلىق تاڭات وسپانقۇلوۆتىڭ قۇسى الدىنا جان سالمادى. ەكىنشى ورىندى پاۆلودارلىق ەرمەك يمانزايىپ جانە جۇلدەلى ءۇشىنشى ورىندى الماتىلىق سۇلتانسەرى ەسەنتاەۆتىڭ قۇستارى يەلەندى.
جارىس كۇندەرىندە قىزىلجار ءوڭىرىنىڭ اسپانى جارقىراپ, ناعىز «قار اپپاق, بۇركىت قارا, تۇلكى قىزىل» دەپ سيپاتتالاتىن قانسونارداعى اسەم سۋرەت تۇردى. بۇل قۇسبەگىلەر مەن كورەرمەندەردىڭ دە دەلەبەسىن قوزدىردى. «ەشكىمگە زيانى جوق ءوزىم كورگەن, ءبىر قىزىق ءىسىم ەكەن سۇم جالعاندا» دەپ ۇلى اباي ايتقانداي, ۇلتىمىزدىڭ كەرەمەت ونەرىنىڭ ءبىرى حالىققا رۋحاني ءلاززات سىيلادى.
چەمپيوناتتى وتكىزۋگە رەسپۋبليكالىق قۇسبەگىلىك فەدەراتسياسىنىڭ باس سەرىكتەسى – «سامۇرىق قازىنا» ۇاق» اق, سونداي-اق تۋريزم جانە سپورت مينيسترلىگى, سولتۇستىك قازاقستان وبلىسىنىڭ اكىمدىگى, «تۋريزم يندۋسترياسى مەن سپورتتى قولداۋ قورى» كق جانە ۇلتتىق سپورت قاۋىمداستىعى دەمەۋشىلىك جاسادى.
