بىلتىر ورتالىق تاراپىنان 200-دەن اسا زياتكەرلىك وليمپيادا مەن بايقاۋلار ۇيىمداستىرىلىپ, وعان 250 مىڭنان استام وقۋشى قاتىسقان. 30-دان اسا حالىقارالىق وليمپيادا مەن بايقاۋعا قاتىسقان 894 وقۋشىنىڭ 604-ءى جەڭىمپاز بولعان.
بۇگىندە قالا وقۋشىلارىنىڭ حالىقارالىق وليمپيادالارداعى جەتىستىگىن ەرەكشە اتاپ وتۋگە بولادى. بىلتىر ەل قۇراماسى ساپىندا الماتىدان 4 وقۋشى ونەر كورسەتىپ, كۇمىس مەدال يەلەندى. ال رەسپۋبليكالىق جارىستاردا قالا كومانداسى 63 مەدالدى ەنشىلەپ, «ۇزدىك وليمپيادالىق كوماندا – 2024» اتاعىن جەڭىپ الدى.
بۇگىندە الماتىلىق وقۋشىلار حالىقارالىق وليمپيادالاردا عانا ەمەس, روبوتتەحنيكا سالاسىندا دا جوعارى جەتىستىكتەرگە جەتىپ ءجۇر. بىلتىر قالا كومانداسى اقش-تىڭ داللاس قالاسىندا وتكەن چەمپيوناتتا ۇزدىك وندىققا ەندى. ولار الداعى جىلداردا جەنەۆا, سينگاپۋر جانە افينادا ءۇش مارتە الەم چەمپيونى اتانعان.
№140 گيمنازيا-مەكتەبىنىڭ «Uly Dala» مۇشەسى ايعانىم شامشادين روبوتتەحنيكاداعى كوماندانىڭ العاشقى جەڭىسى 2022 جىلى «First Lego League» تۋرنيرىنەن باستالعانىن ايتتى. كەيىننەن «First Tech Challenge» دەڭگەيىنە وتكەن كوماندا ءار جارىسقا تاباندىلىقپەن دايىندالىپ, قادامداردى, باعدارلامالاردى تۇراقتى جەتىلدىرىپ وتىراتىنىن اتاپ ءوتتى.
«Sana Team» كاپيتانى سمايل دارىن ەكى جىلدان اسا ۋاقىتتا روبوتتەحنيكانىڭ الىپپەسىن تەرەڭ مەڭگەرىپ, ناتيجەسىندە, اۋستراليا, كيپر, ءۇندىستان جانە قىرعىزستاندا ەلىمىزدىڭ نامىسىن قورعاپ, كوماندانىڭ جوعارى ماراپاتتارعا يە بولعانىن جەتكىزدى. قازىر كوماندا حيۋستوندا وتەتىن الەمدىك جارىسقا دايىندالىپ جاتىر.
الماتى
