بىلتىر سولتۇستىك كاسپي جوباسىنىڭ وپەراتورى – NCOC كومپانياسى اتالعان كەنىشتەن 17,4 ملن توننا مۇناي ءوندىردى. دەمەك «قارا التىنمەن» بىرگە ىلەسىپ شىققان گاز كولەمى از ەمەس. سول سەبەپتى, اتىراۋ وبلىسىندا «كوگىلدىر» ءونىمدى ەل يگىلىگىنە جاراتۋ ماقساتىندا گاز وڭدەۋ زاۋىتىنىڭ قۇرىلىسى باستالدى. «QazaqGaz» ۇك» اق باسقارما توراعاسى سانجار جاركەشوۆتىڭ ايتۋىنشا, جاڭا ءوندىرىس ورنى كەستەگە سايكەس 2026 جىلدىڭ اياعىندا پايدالانۋعا بەرىلۋى ءتيىس. قازىر زاۋىت قۇرىلىسىندا ىلگەرىلەۋشىلىك بار. قۇرىلىس الاڭىندا 58 مىڭ تەكشە مەتر بەتون قۇيۋ جۇمىستارى اياقتالدى. مەتالل كونسترۋكتسيالار مەن مەحانيكالىق جابدىقتاردىڭ مونتاجى باستالىپ, 2 مىڭ 300 تونناسى اتقارىلعان. قۇرىلىس الاڭىندا 200 تونناعا دەيىنگى جۇكتى كوتەرەتىن ەكى كران بار. ەندى 400 توننالىق اۋىر جۇكتى كوتەرەتىن كرانداردى اكەلۋ جوسپارلانىپتى.
گاز وڭدەۋ زاۋىتىنىڭ قۇرىلىسىن جۇرگىزەتىن باس مەردىگەرگە «KCG» جانە «Integra» جشس تاڭدالعان. وسى كەزگە دەيىنگى جوبا قارقىنى 42%-دى قۇرايدى. جابدىقتاردىڭ 90%-ى قۇرىلىس الاڭىنا جەتكىزىلىپتى. ۋچاسكەدەگى جۇمىسقا 945 ادام تارتىلعان. ونىڭ 70%-ى – جەرگىلىكتى تۇرعىندار. ولارعا جۇمىستى ءۇزىلىسىز جۇرگىزۋ ءۇشىن 75 تەحنيكا بولىنگەن.
«قازىر قۇرىلىس الاڭىندا جۇمىس قارقىنى ارتا ءتۇستى. كوكتەمدە ءىرى كولەمدى تەحنولوگيالىق قۇرال-جابدىقتاردىڭ مونتاجى جاسالادى. الداعى مامىر ايىندا قۇرىلىس جۇمىسى شارىقتاۋ كەزەڭىنە تاياپ, سول كەزدە جۇمىسشىلار سانى 2 ادامعا جەتەدى», دەيدى س.جاركەشوۆ.
مامانداردىڭ تۇسىندىرۋىنشە, زاۋىت ىسكە قوسىلعان سوڭ وڭدەلگەن گازدان ءتورت ءتۇرلى ءونىم شىعارۋ كوزدەلىپ وتىر. بۇل – جىلىنا شامامەن 727 ملن تەكشە مەتر تاۋارلىق گاز, 115,5 مىڭ توننا سۇيىتىلعان مۇناي گازى, 17 مىڭ توننا كومپوزيتتىك گاز جانە 218,5 مىڭ توننا تۇيىرشىكتەلگەن كۇكىرت. بولاشاقتا گاز زاۋىتىن باسقارۋدىڭ باسىم بولىگىنە كاتار ەلىنىڭ كومپانياسى يەلىك ەتۋى مۇمكىن. ويتكەنى بىلتىر قاراشانىڭ سوڭىندا گاز وڭدەۋ زاۋىتىنىڭ 75% اكتسياسىن اتالعان ەلدىڭ كومپانياسىنا ساتۋ جونىندە كەلىسسوز جۇرگىزىلدى. وسىعان وراي دوحا قالاسىندا «QazaqGaz», «Power International Holding», KCG, HBP باسشىلارى قاشاعان گازىن وڭدەۋ زاۋىتىنىڭ قۇرىلىسىن جەدەلدەتۋ ماسەلەسى تالقىلاندى.
«اتالعان كومپانيا-مەردىگەرلەردىڭ اكتسيونەرلەرى جوبانى جۇزەگە اسىرۋ مارتەبەسى, تاپسىرمالار مەن قۇرىلىستى جەدەلدەتۋ بويىنشا قابىلدانىپ جاتقان شەشىمدەر تۋرالى ەسەپ بەردى. قازىر «Power International Holding» كومپانياسىنىڭ ەنشىلەس كاسىپورنى «UCC Holding» تاراپىنان گاز وڭدەۋ زاۋىتىنىڭ 75% اكتسياسىن ساتىپ الۋ تۋرالى كەلىسسوزدەر اياقتالدى. ترانزاكتسيا شارتتارىن كەلىسۋ ۇدەرىسى باستالدى», دەپ حابارلادى ۇلتتىق كومپانيانىڭ ءباسپاسوز قىزمەتى.
كاتارلىق «UCC Holding» كومپانياسى اتىراۋ وبلىسىنداعى گاز وڭدەۋ زاۋىتى جوباسىنا وپەراتسيالىق باقىلاۋ جۇرگىزۋدى قولعا الدى. بۇل كومپانيا اتالعان جوبا وپەراتورى – «GPC Investment» جشس-نىڭ كۇردەلى قۇرىلىس جونىندەگى اتقارۋشى ديرەكتورى قىزمەتىنە مۇعال ماقىمعاليدى تاعايىندادى. ول بۇرىن اتىراۋ مۇناي وڭدەۋ زاۋىتىندا, «ادجيپ قكو», «نورت كاسپيان پروكون ساليۋشنس» جانە «SNC-Lavalin» كومپانيالارىندا جۇمىس ىستەگەن. وسى تاعايىنداۋعا دەيىن كاتارلىق «UCC Holding» كومپانياسىندا باسشىلىق لاۋازىمدا قىزمەت اتقارعان.
سونداي-اق تاراپتار بىرلەسكەن ءۇش جوبانى جۇزەگە اسىرۋدى جەدەلدەتۋ ماسەلەسىن قاراستىرعان. ءبىرىنشىسى – قۋاتى 2,5 ملرد تەكشە مەتر بولاتىن قاشاعان گازىن وڭدەيتىن ەكىنشى زاۋىتتىڭ جوباسى. ەكىنشىسى – بەينەۋ – بوزوي – شىمكەنت ماگيسترالدى گاز قۇبىرىنىڭ ەكىنشى تارماعىنىڭ قۇرىلىسى. ءۇشىنشىسى – اقتوبە – قوستاناي كس-14 جوباسى.
اتىراۋ وبلىسى
