فوتو: pxhere
مۇنايلى شاھار ماڭىنداعى قايىرشاقتى اۋىلدىق وكرۋگىندە تىركەلگەن «ابدۋللا» شارۋا قوجالىعىنىڭ وكىلى نۇربەك ەسەنقۇلوۆتىڭ ايتۋىنشا, شارۋاشىلىقتا 105 سيىر بار. قوجالىقتىڭ مالى سوكولوك كانالىنان سۋ ىشەدى.
ء«بىزدىڭ شارۋاشىلىقتا ءمۇيىزدى ءىرى قاراداعى قوتىر اۋرۋى بىلتىرعى قازان, قاراشا ايلارىندا انىقتالدى. سودان بەرى 15-20 سيىردان قوتىر شىقتى. بۇل اۋرۋعا نەگىزىنەن سيىردىڭ اتالىق ءتۇرى شالدىقتى. ءمۇيىزدى ءىرى قارانىڭ ءجۇنى ءتۇسىپ قالدى. ورنى قىزارىپ, قانى شىعىپ تۇردى. سوعان بايلانىستى ۆەتەرينار شاقىرىپ, ەكپە سالدىردىق. سودان كەيىن توقتاعانداي بولدى. بىراق ءالى تولىق جويىلعان جوق», دەيدى نۇربەك ەسەنقۇلوۆ.
ونىڭ ايتۋىنشا, باستاپقىدا كانالداعى سۋدان كۇدىكتەنگەن. ويتكەنى قازىر كانالدا اعىس جوق. سۋ ازايعان.
«الايدا ۆەتەرينارلار بۇل اۋرۋدىڭ شىعۋىنا كانال سۋىنىڭ اسەرى جوق دەپ وتىر. قاڭتاردان بەرى شارۋاشىلىعىمىزداعى ءمۇيىزدى ءىرى قارا ەكى رەت ەگىلدى. ۇلكەندەردىڭ ايتۋىمەن موتوردىڭ پايدالانىلعان مايىن جاقتىق», دەدى نۇربەك ەسەنقۇلوۆ.
ۆەتەريناريالىق باقىلاۋ جانە قاداعالاۋ كوميتەتى اتىراۋ وبلىستىق اۋماقتىق ينسپەكتسياسىنىڭ باسشىسى نۇرجان ۇسەنباەۆتىڭ پىكىرىنشە, قوتىر اسا قاۋىپتى اۋرۋلار قاتارىنا جاتپايدى.
«سول سەبەپتەن الاڭدايتىنداي نەگىز جوق. ال اۋرۋدىڭ شىعۋىنا مالعا مەزگىلىندە ەكپە سالدىرماۋ سەبەپ بولادى. قورانى قىس مەزگىلىنە دەيىن تازالاپ, دەزينفەكتسيالاۋ قاجەت. مىنە, وسىنداي جۇمىستار جاسالماسا, مال قوتىرعا شالدىعۋى مۇمكىن. ەندى اۋىرعان مالعا شارۋا قوجالىعىنىڭ يەلەرى ءوز ەسەبىنەن ەكپە سالدىرۋى كەرەك. ويتكەنى مەملەكەت تاراپىنان قوتىرعا شالدىققان مالدى ەمدەۋگە قولداۋ كورسەتىلمەيدى», دەپ مالىمدەدى نۇرجان ۇسەنباەۆ.
اتىراۋ وبلىستىق اۋىل شارۋاشىلىعى جانە جەر قاتىناستارى باسقارماسىنىڭ باسشىسى امانگەلدى سالاماتتىڭ ايتۋىنا قاراعاندا, جەرگىلىكتى اۋا رايىنىڭ جىلىلىعى دا قوتىردىڭ شىعۋىنا اسەر ەتۋى مۇمكىن.
«قوتىر اتىراۋ قالاسىنىڭ ماڭىنداعى شارۋا قوجالىقتارىندا عانا انىقتالىپ وتىر. قازىر باسقارمانىڭ ماماندارى شارۋا قوجالىقتارىندا تەكسەرۋ جۇرگىزۋدى, فەرمەرلەرگە كەڭەس بەرۋدى قولعا الدى. اۋا رايىنىڭ قولايلى كەزەڭىندە مالدى قوراعا قاماماۋ قاجەت. مۇنى شارۋا قوجالىعىنىڭ جەتەكشىلەرى ەسكەرۋى كەرەك», دەيدى امانگەلدى سالامات.
