اتاپ ايتساق, فرانتسيا مەن گەرمانيا اراسىنداعى مادەني جانە اقپاراتتىق ىنتىماقتاستىقتىڭ ناتيجەسىندە 1990 جىلى قۇرىلعان «Arte france» اتتى ەۋروپالىق قوعامدىق تەلەارنادا اقپان ايىنان باستاپ ۇلى جازۋشى مۇحتار ومارحان ۇلى اۋەزوۆ تۋرالى ارنايى دەرەكتى فيلم كورسەتىلىپ جاتىر. اتالعان جوبانىڭ اۆتورى – بەلگىلى جۋرناليست اننا لۋسسۋارن. فيلم اۆتورلارى 2023 جىلى ارنايى ساپارمەن ەلىمىزگە كەلىپ, جازۋشىنىڭ تۋعان مەكەنى اباي اۋدانىنا ات باسىن بۇرىپ, قالامگەردىڭ كىندىك قانى تامعان جەرىمەن تانىسقان. سونىمەن بىرگە الماتى قالاسىنداعى «اۋەزوۆ ءۇيى» عىلىمي-مادەني ورتالىعىن ءتۇسىرىپ, ماتەريالدار جيناعان. سول ساپارى ورتالىق ديرەكتورى ديار اسقار ۇلى قوناەۆتان مۇحتار اۋەزوۆ تۋرالى سۇحبات تا جازىپ العان.
اتالعان قىسقا دەرەكتى ءفيلمدى عالامتوردان تاۋىپ كوردىك. ءتۇسىرۋ توبى اتى الىسقا جەتكەن قالامگەر شىعارماشىلىعىنىڭ كەڭگە قانات جايعانى – «اباي جولى» رومان-ەپوپەياسىنان باستاۋ الاتىنىن نىقتاپ ايتادى. كەڭ جايلاۋ, اۋىل ءومىرى, سالت پەن ءداستۇر, ۇلتتىق ستيلدەگى ءان مەن كۇي – ءبارى-ءبارى وسى فيلمدە كورىنىس تابادى. بۇل فيلم اتالعان تەلەارنادا ءبىر اي بويى تۇراقتى تۇردە كورسەتىلەدى ەكەن.
