پاۆلودار قالاسىنىڭ تۇرعىنى مۇرات يمانعازينوۆتىڭ ساۋد ارابياسىنداعى جيددا قالاسىنان الماتىعا ۇشقان اۋە كەمەسىندە كەلە جاتىپ, اياق استىنان دەنساۋلىعى كۇرت ناشارلايدى. تۇماۋعا قارسى ءدارىنىڭ بىرنەشەۋىن ءىشىپ, ۇيىقتاپ كەتكەن وتاعاسى ارادا ءبىر ساعات وتكەندە بەت-اۋزى ادام تانىماستاي ءىسىپ ويانادى.
– اللەرگيالىق اۋرۋ پايدا بولعانىن بىردەن سەزىندىم. بەتىم, مويىن تۇسىم ءىسىنىپ كەتكەن. جەردەن 10 مىڭ مەتر بيىكتىكتە كەلە جاتقان سوڭ با, تىنىسىم تارىلىپ, قان قىسىمىم كوتەرىلىپ, احۋالىم ناشارلاپ بارا جاتتى. بورتسەرىك قىرعىز قىزى جاعدايىمدى ۇشاق ىشىندەگى جولاۋشىلارعا حابارلاپ, شۇعىل تۇردە دارىگەر قاجەت ەكەنىن ايتتى. ابىروي بولعاندا بىزبەن بىرگە جەتىسۋ وبلىسىنىڭ دارىگەرى جاننۇر سىرىموۆ دەگەن ازامات ۇشىپ كەلە جاتىر ەكەن. بىردەن جانىما كەلىپ, ءدارىحانا قوبديشاسىن الىپ شىقتى دا, ماعان ەكپە جاساپ, ەم قولدانا باستادى. بۇل ۋاقىتتا شامامەن قاپ تاۋلارىنىڭ ۇستىندە ۇشىپ كەلە جاتقانبىز. ەكيپاج شۇعىل جاعداي بولسا, ۇشاقتى جاقىن ماڭداعى اۋەجايدىڭ بىرىنە قوندىرامىز دەگەن شەشىم قابىلداعان ەكەن. بىراق جاننۇر ماۋلەن ۇلى ءوز ءىسىنىڭ كاسىبي مامانى ەكەنىن تانىتىپ, الماتىعا امان ءتۇسىردى. ابزال جانعا شەكسىز ريزاشىلىعىمدى جەتكىزگىم كەلەدى, – دەيدى م.يمانعازينوۆ.
ج.سىرىموۆ بۇگىندە جەتىسۋ وبلىسى, كوكسۋ اۋداندىق اۋرۋحاناسىنىڭ باس دارىگەرى بولىپ قىزمەت اتقارادى. ونىڭ دا مەككەگە اكەسىن قاجىلىققا اپارىپ, قايتىپ كەلە جاتقان بەتى ەكەن. «ناۋقاسقا ومىرىمدە اۋەدە مەدتسينالىق كومەك كورسەتەم دەگەن وي بولماپتى. اكەمە ۇنەمى ەم-دوم جاساپ جۇرەتىندىكتەن, جانىمدا ءدارى-دارمەك قوبديشاسىن ۇستايتىنمىن. بورتسەرىك قىزدىڭ حابارلاۋىنان سوڭ ناۋقاس اعانىڭ جانىنا جەدەل بارىپ قاراسام, كوزىنىڭ اينالاسى مەن بەتى ىسىنە باستاعان. انافيلاكتيكالىق شوك بايقالدى. مۇنى مەديتسينا تىلىندە «كۆينكە ءىسىنۋى» دەپ اتايدى. ەگەر 15–20 مينۋت ىشىندە ادامعا مەديتسينالىق كومەك كورسەتىلمەسە, ءولىپ كەتۋى ىقتيمال. بىردەن «اللەرگوپرەسس» جانە «پرەدنيزولون» پرەپاراتتارىن ەكتىم. قان قىسىمىن ولشەپ, ءتىلىنىڭ استىنا تابلەتكا سالدىم. سيستەما سالۋدى دا باستاپ كەتتىم», دەدى تەلەفون ارقىلى تىلدەسكەنىمىزدە ج.سىرىموۆ.
ابزال جاننىڭ گيپپوكراتتىڭ انتىن قابىلداپ, مەديتسينا سالاسىنا ارالاسقانىنا 15 جىلدىڭ ءجۇزى بولعان. ۋرولوگ-ترانسپلانتولوگ ماماندىعىن مەڭگەرگەن. كوكسۋ اۋدانىنداعى قىزمەتىنە دەيىن الماتىداعى سىزعانوۆ اتىنداعى ۇلتتىق عىلىمي حيرۋرگيا ورتالىعىندا بۇيرەك ترانسپلانتولوگياسى, ۋرولوگيا جانە ەكستراكورپورالدى دەتوكسيكاتسيا بولىمشەسىنىڭ مەڭگەرۋشىسى, تالدىقورعان قالاسىندا اۋرۋحانا باسشىسىنىڭ ورىنباسارى بولىپ ەڭبەك ەتكەن. مەديتسينا سالاسىنداعى العاشقى قىزمەتىن سانيتارلىق فەلدشەر بولىپ باستاعان. «مۇنداي شۇعىل ساتتەردە نە ىستەۋ كەرەك ەكەنىن بىلەمىن», دەيدى ول. ءارى بورتسەرىك قىز دا كومەكتەسىپ جانىندا جۇرگەنىن جەتكىزدى.
جاننۇر ماۋلەن ۇلىنىڭ جۇبايى دا مەديتسينا سالاسىندا, ساۋلەلىك دياگنوستيكا دارىگەرى بولىپ جۇمىس ىستەيدى. ەرلى-زايىپتىلار شاڭىراعىندا بەس بالانى ءوسىرىپ-ءوربىتىپ, كوپبالالى ءارى ۇلگىلى وتباسى اتانىپ وتىر. سىرىموۆتار وتباسى 2023 جىلى جەتىسۋ وبلىستىق «كوشباسشى» بايقاۋىندا «ۇزدىك جاس وتباسى» نوميناتسياسىن يەلەنگەن.
Flynas اۋە كومپانياسىنىڭ بورتسەرىگى ۇلكەلسىن وسۋباليەۆا مۇنداي وقىس جاعدايدى العاش رەت كەزدەستىرىپ وتىرعانىن اڭگىمەلەدى.
– ءوزىم قىرعىز ەلىنىڭ ازاماتىمىن. ءبىراز جىلدان بەرى ساۋد ارابياسىنىڭ اۋە كومپانياسىندا ەڭبەك ەتىپ ءجۇرمىن. الماتىعا ايىنا كەم دەگەندە ءبىر مارتە كەلىپ كەتەمىز. جولاۋشى م.يمانعازينوۆتىڭ جاعدايى ناشارلاعان العاشقى ساتتە كاپيتانىمىز ۇشاقتى كەرى بۇرىپ, جيددا قالاسىنىڭ اۋەجايىنا قونۋعا شەشىم قابىلداعان. بىراق كەيىن بىلگەنىمىزدەي, كەرى ورالىپ, جەرگە قونعانشا ونىڭ ءومىرىن امان ساقتاپ قالۋعا ۋاقىت جەتپەيدى ەكەن. دارىگەر ج.سىرىموۆتىڭ بۇل رەيسكە وتىرعانى دا كەزدەيسوقتىق ەمەس, ءبىر قۇدىرەتتى كۇشتىڭ ىقپالى دەپ ويلايمىن. ءسويتىپ, ادامدى ءولىم اۋزىنان الىپ قالعان دارىگەردىڭ ەرلىگىنە تۇڭعىش رەت كۋا بولدىم, – دەدى بورتسەرىك قىز اعىنان جارىلىپ.
الماتى اۋەجايى Flynas اۋە كومپانياسىنىڭ ۇشاعىن اۋەجايعا قوندىرىپ, م.يمانعازينوۆتى جەدەل جاردەممەن كۇتىپ العان. وتاعاسىنىڭ جاعدايى بۇگىندە قالىپتى, پاۆلودارداعى وتباسىنا ورالدى.
پاۆلودار وبلىسى
