دانەكەرلەۋشى – شەبەرلىكتى, توزىمدىلىكتى قاجەت ەتەتىن كۇردەلى جۇمىس. قوسىلاتىن تەمىرلەردىڭ قاتتىلىعىنا, بەرىكتىگىنە قاراي ەلەكترودتىڭ تۇرلەرى, تىگىستىڭ قالىڭدىعى مەن بەرىكتىگى دە اۋىسىپ وتىرادى. دانەكەرلەۋشى سونىڭ ءبارىن سارالاي ءبىلۋى كەرەك. قۇبىردىڭ ىشىنە كىرىپ, ەتبەتىنەن جاتىپ, دانەكەرلەگەن كەزدە گازدىڭ كۇشتىلىگىنەن ادام تۇنشىعىپ قالا جازدايدى. سوندىقتان دانەكەرلەۋشى ءجيى-ءجيى دالاعا شىعىپ, تىنىستاپ وتىرادى.
كەزىندە دانەكەرلەۋشىلەرگە وكپەدەگى گازدىڭ ۋىتىن الۋعا تەگىن ءسۇت بەرەتىن. سونىمەن بىرگە زەينەت دەمالىسىنا دا باسقالاردان 5 جىل بۇرىن شىعاراتىن. بۇل – دانەكەرلەۋشىنىڭ اۋىر ەڭبەگىن باعالاعاندىق.
دانەكەرلەۋشىلەردىڭ ىشىندەگى ەڭ كۇردەلىسى – گازەلەكتر دانەكەرمەن جۇمىس ىستەۋشىلەر. بۇل – دانەكەرلەۋشىلەر كاسىبىنىڭ جوعارى ساتىسى. وعان ارنايى وقۋ مەن دايىندىقتان وتكەندەر عانا قابىلدانادى. مۇنداعى جارقىل مەن گازدىڭ ۋىتى قاراپايىم دانەكەرلەۋدەن الدەقايدا جوعارى.
ۆلاديمير گريگورەۆيچ ماماندىعىن بۇگە-شىگەسىنە دەيىن يگەرىپ, شەبەرلىك شىڭىنا جەتكەن, ەڭ جوعارعى – 6-رازريادتى جۇمىسشى. ءبىر كەزدە جوعارى ءبىلىم الماق بولىپ, ينستيتۋتتا دا وقىعان ەكەن. الايدا ينجەنەرلەردىڭ تابىسى از ەكەنىن ەسكەرىپ, وسى, جۇمىسشى ماماندىعىنا ءوز قالاۋىمەن اۋىسىپتى.
«وسى جۇمىستى قالاعانىما ەش وكىنبەيمىن. تابىسىم وتە جاقسى. ءبىزدىڭ تسەحتا جوعارى شەبەرلىكتى تالاپ ەتەتىن دانەكەرلەۋ ءىسى مەنىڭ قولىمنان عانا كەلەدى. اسىرەسە جىلىتۋ قۇبىرلارىن دانەكەرلەۋ ۇلكەن جاۋاپكەرشىلىكتى تالاپ ەتەدى. قۇبىرلاردىڭ دانەكەرى دۇرىس بولماسا ايرىلىپ كەتىپ, قانشاما ادام ساقىلداعان سارى ايازدا جىلۋسىز قالۋى مۇمكىن. ازىرگە مەنىڭ دانەكەرلەگەن قۇبىرلارىمنىڭ ايرىلعانى بولعان ەمەس. سونى ماقتان ەتەمىن», دەيدى ول.
ء وز باسىڭىزعا قاۋىپ ءتونىپ, جۇمىستان زيان شەككەن كۇندەرىڭىز بولدى ما دەگەن سۇراققا ۆ.بەلوبروۆەنكو ويلانىپ جاۋاپ بەردى: «قاۋىپسىزدىك ەرەجەسىن ساقتاۋ وزىڭە عانا بايلانىستى ەمەس. كەيدە بيىكتىكتە دانەكەرلەۋ جۇمىسىن جۇرگىزگەندە قوسالقى جۇمىسكەرلەر اسىعىستىق جاساپ, باسىپ شىعاتىن اعاش سورەلەردى دۇرىس بەكىتپەيدى. سوندايلاردىڭ كەسىرىنەن ءسۇرىنىپ, قۇلاپ كەتۋىڭ مۇمكىن. سوندىقتان بيىككە شىعاردا باسپالداقتاردى مۇقيات تەكسەرەمىن. ويتپەسەڭ بولمايدى».
كاسىبي مامان جۇمىستان بوس ۋاقىتىندا كوركەم دانەكەرلەۋمەن دە اينالىسادى. تەمىر بولشەكتەرىنەن, قاتتى قاڭىلتىرلاردان ءتۇرلى فيگۋرالار, گۇلدەر, ەرتەگى كەيىپكەرلەرىن جاسايدى. «بوس ۋاقىتىمدا وسىنداي بۇيىمدار جاساۋعا ابدەن داعدىلانىپ كەتتىم. جاساعان دۇنيەلەرىم حالىققا, اسىرەسە بالالارعا ۇناپ, قۋانا قاراپ, تاماشالاپ جاتادى», دەيدى ول.
بۇل كۇندە ۆ.بەلوبروۆەنكو ءوز ءىسىنىڭ مامانى عانا ەمەس, سونىمەن قاتار شىعارماشىل ادام رەتىندە دە تانىمال. ونىڭ ەڭبەكقورلىعى, شەبەرلىگى, ماماندىعىنا ادالدىعى ارىپتەستەرىن دە قاناتتاندىرىپ, وعان ەلىكتەۋشىلەر, ۇلگىسىن الۋعا ۇمتىلۋشىلار قاتارى كوبەيىپ كەلەدى.
پەتروپاۆل
