ورتالىقتىڭ اشىلۋى بيىل ەلىمىزدە وتەتىن «قىتاي – ورتالىق ازيا» ەكىنشى سامميتىندەگى ماڭىزدى وقيعاعا اينالماق. مۇندا ەكى ەل عالىمدارى اراسىنداعى وڭىرلىك عىلىمي-تەحنيكالىق يننوۆاتسيالاردى دامىتۋدا, ونەركاسىپ سالاسىنداعى باسەكەگە قابىلەتتىلىگىن ارتتىرۋعا ىقپال ەتەتىن جوبالار جۇزەگە اسادى.
ۇعا پرەزيدەنتى, اكادەميك اقىلبەك كۇرىشباەۆ بىرلەسكەن ورتالىقتىڭ زاماناۋي مۇمكىندىكتەرىن تانىستىرىپ, تاياۋ كەلەشەكتە ەلىمىزدىڭ كەڭىستىك-ۋاقىتقا قاتىستى دەرەكتەردى تالداۋ جانە تۇراقتى دامۋ سالاسىندا وڭىرلىك كوشباسشىعا اينالۋىنا مۇمكىندىك بەرەتىنىن اتاپ ءوتتى. ونىڭ ايتۋىنشا, ورتالىق چجەتسزيان تەحنولوگيالىق ۋنيۆەرسيتەتىمەن مەموراندۋم اياسىندا قۇرىلعان «كەڭىستىك-ۋاقىتتىق جاساندى ينتەللەكت جانە تۇراقتى دامۋ جونىندەگى حالىقارالىق بىرلەسكەن زەرتحاناسىن» دامىتۋعا ىقپال ەتىپ, قازاقستان, قىتاي جانە ورتالىق ازيا ەلدەرى اراسىنداعى حالىقارالىق عىلىمي ىنتىماقتاستىقتى نىعايتۋ جانە وزىق تەحنولوگيالاردى دامىتۋ باعىتىنداعى ماڭىزدى قادامعا اينالماق.
جاساندى ينتەللەكت, قاشىقتىقتان زوندتاۋ, گەواقپاراتتىق جۇيەلەر جانە بولجامدى مودەلدەۋ سالاسىنداعى وزىق تەحنولوگيالاردى بىرىكتىرەتىن زەرتحانا قازىرگى زامانعى سىن-تەگەۋرىندەر كەزەڭىندە, ونىڭ ىشىندە كليماتتىڭ وزگەرۋى, تابيعي رەسۋرستاردى باسقارۋ, تابيعي اپاتتار جانە ەكونوميكانى تسيفرلاندىرۋدا يننوۆاتسيالىق تاسىلدەر ارقىلى تىڭ شەشىمدەر, زاماناۋي قادامداردى انىقتاۋعا مۇمكىندىك بەرەدى.
زەرتحانانى جابدىقتاپ, قاجەتتى جيھاز, سەرۆەرلەرمەن قامتاماسىز ەتۋدى قىتاي تارابى ءوز مىندەتىنە الىپ وتىر. مامانداردى وقىتىپ, سەمينارلار وتكىزۋمەن دە Zhejiang university پروفەسسورى چەن سي باستاعان عالىمدار ىسكە اسىرماق.
جاساندى ينتەللەكت جانە گەواقپاراتتىق جۇيەلەر تەحنولوگيالارىن قولدانۋ ارقىلى سۋ رەسۋرستارىنا مونيتورينگ جاساۋ مەن باسقارۋ, سۋ تاسقىنى, كوشكىن سياقتى تابيعي اپاتتاردى ەرتە ەسكەرتۋ جۇيەلەرىن ازىرلەۋ, ەنەرگەتيكالىق رەسۋرستاردى وڭتايلاندىرۋ, اۋىل شارۋاشىلىعىن تسيفرلاندىرۋ جانە «اقىلدى ەگىنشىلىك» بويىنشا زەرتتەۋلەردى ەكى ەلدىڭ عالىمدارى بىرلەسىپ, ىسكە اسىرادى.
الماتى
