ايتا كەتەيىك, بيىل ۇلتتىق كينونى قولداۋ ورتالىعى جانىنداعى ساراپتاما كەڭەسىنىڭ قۇرامى جاڭارتىلدى. وعان كينو, ادەبيەت, مادەنيەت سالاسىنداعى ماماندار, سونداي-اق ءماجىلىس دەپۋتاتتارى كىردى.
كەزدەسۋ بارىسىندا كينوجوبالاردى كونكۋرستىق ىرىكتەۋ ەرەجەلەرى تالقىلاندى. مينيستر ۇلتتىق كينونى قولداۋ ورتالىعىنىڭ قىزمەتى تۋرالى ەگجەي-تەگجەيلى ايتىپ, ساراپتاما كەڭەسى مۇشەلەرىنە ۇلكەن جاۋاپكەرشىلىك جۇكتەلەتىنىن اتاپ ءوتتى. وتكەن جىلى قابىلدانعان ىرىكتەۋ كونكۋرسى ەرەجەلەرىندەگى وزگەرىستەر بۇل ۇدەرىستىڭ اشىق ءارى جەڭىل وتۋىنە باعىتتالعان ەدى.
جاڭا ەرەجەلەرگە سايكەس, ىرىكتەۋ ەكى كەزەڭنەن تۇرادى. العاشقى كەزەڭدە ساراپتاما كەڭەسى تەك ستسەناريلەر مەن ستسەناري جوسپارلارىن سارالايدى. ءبىرىنشى كەزەڭنەن ءساتتى وتكەن ستسەناريلەردىڭ اۆتورلارى ەكىنشى كەزەڭدە تولىق قۇجاتتارىن ۇسىنۋى كەرەك. ۇمىتكەرلەر قاجەتتى قۇجاتتاردى تاپسىرعاننان كەيىن وندا انىقتالعان قاتەلەردى تۇزەتۋگە ءۇش كۇن ۋاقىت بەرىلەدى. قۇجاتتاردى قابىلداۋ اياقتالعان سوڭ, ورتالىق ساراپتاما كەڭەسىنىڭ قاراۋىنا ءوتىنىم جىبەرەدى. سودان كەيىن پيتچينگ كۇنى بەلگىلەنەدى.
«كەڭەس مۇشەلەرى جاۋاپكەرشىلىكتى تەرەڭ سەزىنىپ, كونكۋرستىڭ بارلىق كەزەڭدەرىندە ءادىل شەشىم شىعارىپ, اشىق كونكۋرس وتكىزۋگە ءتيىس. كينوجوبالاردىڭ بەلگىلەنگەن تالاپتارعا سايكەس بولۋىنا باسا نازار اۋدارىلادى. بۇل ءىس-شارالار وتاندىق كينو سالاسىن دامىتۋعا, سونداي-اق ۇلتتىق مۇددە مەن يدەولوگياعا ساي كەلەتىن جوبالار سانىن ارتتىرۋعا كومەكتەسەدى», دەدى ايدا بالاەۆا.
بيىل ۇلتتىق قۇندىلىقتار, وتباسى, قورشاعان ورتانى قورعاۋ, زاڭ مەن ءتارتىپ, تاريحي ەلەۋلى وقيعالار, دوس قادىرى, ايەل قۇقىعى, بالا قاۋىپسىزدىگى, قازىرگى زاماننىڭ قاھارماندارى, ەل بىرلىگى جانە باسقا دا باسىم تاقىرىپتاردا كينوجوبالار دايىنداۋعا بولادى. سونداي-اق بيىل مينيسترلىكتىڭ جانە ۇلتتىق كينونى قولداۋ ورتالىعىنىڭ قولداۋىمەن 10 جاڭا فيلم جارىق كورەدى. «كاپيتان بايتاسوۆ», لۋدومانيا تاقىرىبىن قوزعايتىن «يگرومانكا» اتتى دراما, فۋتبول تۋرالى «90+1» سپورتتىق دراماسى, سونداي-اق «كۇزگى سامال», «فەيكوۆىي ارمان», «Qaitadan», «تەزەك», «قارا قىز», «التىن ادام», «حوش ءيىستى جۇرەك» جانە «اۆەل» فيلمدەرى جارىققا شىعادى.
