فوتولار: Oqu-agartu ministrligi
سالتاناتتى شاراعا پرەمەر-ءمينيستردىڭ ورىنباسارى تامارا دۇيسەنوۆا, وقۋ-اعارتۋ ءمينيسترى عاني بەيسەمباەۆ, سونداي-اق ءىرى كومپانيالاردىڭ, كاسىپورىندار مەن ۇيىمداردىڭ وكىلدەرى, كوللەدج ستۋدەنتتەرى, ساراپشىلار قاتىستى.
وقۋ-اعارتۋ مينيسترلىگى ءباسپاسوز قىزمەتىنىڭ مالىمدەۋىنشە فەستيۆال قوناقتارىن قارسى الا وتىرىپ, مينيستر تەحنيكالىق جانە كاسىپتىك ءبىلىم بەرۋ جۇيەسىن ترانسفورماتسيالاۋدىڭ ماڭىزىن اتاپ ءوتتى. 2025 جىلدىڭ 1 قىركۇيەگىنەن باستاپ كوللەدجدەردى جان باسىنا شاققانداعى قارجىلاندىرۋ كولەمى ەكى ەسەگە ۇلعايادى. قازىرگى ۋاقىتتا كوللەدجدەرگە 518 كاسىپورىن شەفتىك قامقورلىق كورسەتەدى, ال بولاشاقتا ولاردىڭ سانىن 4 مىڭعا دەيىن ارتتىرۋ جوسپارلانىپ جاتىر.
«جۇمىسشى ماماندىقتار جىلىندا ىسكە اسىرىلاتىن نەگىزگى ءىس-شارالاردىڭ ءبىرى ەلىمىزدىڭ 10 كوللەدجىن ينتەرناتسيونالداندىرۋ بولماق. نەگىزگى ماقسات – ولاردىڭ جاھاندىق دەڭگەيدە باسەكەگە قابىلەتتىلىگىن ارتتىرۋ جانە ءبىلىم بەرۋ باعدارلامالارىن حالىقارالىق ستاندارتتارعا سايكەستەندىرۋ. اتوم ەنەرگەتيكاسى بويىنشا مامانداردى دايارلاۋدا ۆەنگريانىڭ تاجىريبەسىن ەنگىزۋ, سونداي-اق قىتايدىڭ IT, درون قۇراستىرۋ جانە ماشينا جاساۋ سالاسىنداعى تاجىريبەسىن قولدانۋ جوسپارلانىپ», دەدى عاني بەيسەمباەۆ.
سونىمەن قاتار استانادا تەحنيكالىق جانە كاسىپتىك ءبىلىم بەرۋ ۇيىمدارىنىڭ ستۋدەنتتەرىن قولداۋ جانە دامىتۋ ماقساتىندا ۇلتتىق قۇزىرەتتىلىك ورتالىعى قۇرىلادى. مۇنداي ورتالىق قىتايدا, وڭتۇستىك كورەيادا جانە ءباا-دە تابىستى جۇمىس ىستەپ جاتىر. ال وسى كۇزدە اقتاۋدا TurkicSkills - تۇركىتىلدەس ەلدەر اراسىندا I-ءشى كاسىبي شەبەرلىك چەمپيوناتى وتەدى.
ايتا كەتەيىك, «جۇمىسشى ماماندىقتار قالاسى» فەستيۆالى — جۇمىسشى ماماندىقتارىنىڭ جىلىن رەسمي تۇردە اشاتىن العاشقى ءىس-شارا. بۇل بولاشاق مامانداردىڭ, جۇمىس بەرۋشىلەردىڭ, تەحنيكالىق جانە كاسىپتىك ءبىلىم بەرۋ ۇيىمدارىنىڭ ءوزارا ىنتىماقتاستىعى ءۇشىن قۇرىلعان الاڭ. فەستيۆالدىڭ بىرەگەي فورماتى قوناقتارعا ءارتۇرلى كاسىپتەردىڭ ەرەكشەلىكتەرىمەن تانىسۋعا جانە ينتەراكتيۆتى الاڭدار مەن مامانداندىرىلعان جابدىقتاردىڭ كومەگىمەن ەكونوميكانىڭ ءتۇرلى سالاسىندا وزدەرىن سىناپ كورۋگە مۇمكىندىك بەرەدى.
«جۇمىسشى ماماندىقتارى قالاسىندا» سەگىز تاقىرىپتىق كوشە اشىلدى: تاۋ-كەن ءىسى جانە مەتاللۋرگيا, ماشينا جاساۋ جانە كولىك, ەنەرگەتيكتەر مەن مۇنايشىلار, اۋىل شارۋاشىلىعى, سۋ شارۋاشىلىعى ماماندارى, قۇرىلىسشىلار, سونداي-اق قۇتقارۋشىلار, ءورت سوندىرۋشىلەر, مەديتسينا كوشەلەرى, سونداي-اق بولاشاق ماماندىقتارىنا ارنالعان كوشەلەر دە بار. سونىمەن قاتار كاسىبي دامۋدىڭ ءتۇرلى سالالارى مەن باعىتتارىن كورسەتەتىن 40 كرەاتيۆتى ءۇي ۇسىنىلعان.
بىرنەشە كۇن ىشىندە قالا اۋماعىندا ءتۇرلى سەمينارلار مەن ماستەر-كلاسستار, مۇناي جانە ەنەرگەتيكا ونەركاسىبى تاقىرىپتارى بويىنشا حاكاتون, كاسىپتەر شەرۋى, بوس ورىندار جارمەڭكەسى, ستارتاپتاردىڭ تۇساۋكەسەرلەرى, كونتسەرتتەر مەن ترەنينگتەر وتەدى.
فەستيۆالدى ۇيىمداستىرۋشى – وقۋ-اعارتۋ مينيسترلىگى, وعان ونەركاسىپ جانە قۇرىلىس, كولىك, ەنەرگەتيكا, اۋىلشارۋاشىلىعى, ەكولوگيا جانە تابيعي رەسۋرستار, سۋ رەسۋرستارى جانە يرريگاتسيا, تسيفرلىق دامۋ, يننوۆاتسيالار جانە اەروعارىش ونەركاسىبى, توتەنشە جاعدايلار, دەنساۋلىق ساقتاۋ مينيسترلىكتەرى, سونداي-اق ۇلتتىق كومپانيالار مەن ەلىمىزدىڭ كاسىپورىندارى قولداۋ كورسەتتى.
ايتا كەتەيىك, قازاقستاننىڭ كاسىپتىك-تەحنيكالىق ءبىلىم بەرۋ جۇيەسىندە 772 كوللەدج جۇمىس ىستەيدى, وندا 556 مىڭ ستۋدەنت وقيدى. مەملەكەت باسشىسىنىڭ قولداۋىنىڭ ارقاسىندا 2 جىل ىشىندە كوللەدج ستۋدەنتتەرىنىڭ ستيپەندياسى ەكى ەسە ءوستى. 2025 جىلى ستۋدەنتتەردى سۇرانىسقا يە ماماندىقتار بويىنشا تەگىن تەحنيكالىق جانە كاسىپتىك بىلىممەن قامتۋ 153 مىڭدى قۇرايدى, بۇل وتكەن جىلمەن سالىستىرعاندا 10 مىڭعا ارتىق. مەملەكەتتىك تاپسىرىستىڭ 70% - ى ماشينا جاساۋ, كولىك, ەنەرگەتيكا, IT, قۇرىلىس جانە ت. ب. قوسا العاندا, تەحنيكالىق ماماندىقتارعا باعىتتالاتىن بولادى.
