قازاقستاننىڭ دەربەس بىتىمگەرلىك كونتينگەنتى سيريا اراب رەسپۋبليكاسىنداعى گولان جوتالارىنداعى اتىستى توقتاتۋ رەجيمىن قامتاماسىز ەتۋ جونىندەگى مىندەتتەردى ورىنداي وتىرىپ, فاۋار بازاسىندا قىزمەت اتقارۋدا. بارلىق 139 اسكەري قىزمەتشى مەن ءتورت شتاب وفيتسەرى بۇۇ-نىڭ ماراپاتىن الدى.
قازاقستاندىق اسكەري قىزمەتشىلەر ۇيىمنىڭ بازالارىنداعى قورعانىستى كۇزەتۋدى جانە نىعايتۋدى قامتاماسىز ەتىپ, جەرگىلىكتى تۇرعىندارمەن ءوزارا قارىم-قاتىناس جاسايدى. 11 ايدىڭ ىشىندە بىتىمگەرلەر 200-گە جۋىق جارىلماعان سناريادتى زالالسىزداندىردى جانە مەديتسينالىق كومەككە مۇقتاج بۇۇ-نىڭ قىزمەتكەرىن ەۆاكۋاتسيالادى. وتكەن جىلدىڭ جەلتوقسان ايىندا ومىرىنە جانە دەنساۋلىعىنا قاۋىپتى ايماقتان بۇۇ پەرسونالىن ەۆاكۋاتسيالاۋ كەزىندە كونتينگەنتتىڭ جەكە قۇرامى كاسىبي دايارلىق, كەلىسىم جانە جەدەل ءىس-قيمىل جاساپ, جوعارى دەڭگەيىن كورسەتتى.
– بۇۇ باس حاتشىسىنىڭ بىتىمگەرلىك وپەراتسيالار جونىندەگى ورىنباسارى جان-پەر لاكرۋا جانە بۇۇ-نىڭ بولىنگەن ايماقتى باقىلاۋ ميسسياسىنىڭ (UNDOF) قولباسشىسى گانا رەسپۋبليكاسى ارمياسىنىڭ گەنەرال-مايورى انيتا اسما اسكەري قىزمەتشىلەرىمىزدىڭ جاۋىنگەرلىك داعدىسى, ءتارتىبى جانە مورالدىق-ەرىك كۇشى جوعارى ەكەنىن اتاپ ءوتتى. بۇل ءبىزدىڭ بەيبىتشىلىك پەن حالىقارالىق قاۋىپسىزدىكتى ساقتاۋعا قوسقان ۇلەسىمىز, – دەدى بىتىمگەرلىك روتاسىنىڭ كومانديرى پودپولكوۆنيك جىگەر ايپوۆ.
ەستەرىڭىزگە سالا كەتسەك, 2024 جىلدىڭ ناۋرىز ايىندا قازاقستان گولان جوتالارىندا تۇڭعىش دەربەس بىتىمگەرلىك كونتينگەنتىن اشىپ, تاريحي قادام جاسادى. قازاقستان اسكەري قىزمەتشىلەرىنىڭ بىتىمگەرلىك ميسسيالارعا قاتىسۋ گەوگرافياسىنىڭ كەڭەيۋى ەلىمىزدىڭ اسكەري جانە گۋمانيتارلىق داعدارىستاردان زارداپ شەگەتىن ادامدارعا قولداۋ كورسەتۋگە دەگەن نيەتىن ايعاقتايدى.
