«ارناۋلى اۆتوبازا» جشس-نىڭ مەنەدجەرى ولەگ يانۋشكونىڭ ايتۋىنشا, جاڭا كەشەن يسپانيانىڭ «IMABE Innovaciones» كومپانياسىنىڭ زاماناۋي تەحنولوگياسىمەن جابدىقتالعان. كەشەننىڭ جىلدىق قۋاتى – 150 مىڭ توننا قوقىس سۇرىپتاۋ. قازىر كۇنىنە 100 توننا قوقىس سۇرىپتالىپ جاتىر. ونىڭ ىشىندە كارتون مەن ماكۋلاتۋرا, پەت ماتەريالدارى, اليۋميني, پوليەتيلەن, پلاستيكتەن جاسالعان بۇيىمدار قالدىعى بار.
«كەشەنگە اكەلىنگەن قوقىس الدىمەن باستاپقى سۇرىپتاۋدان وتكىزىلەدى. مۇندا سۇرىپتاۋ جەلىسىندە كەپتەلىپ قالۋى مۇمكىن ماتەريالدار تاڭدالادى. كەيىن بارلىعى ءىرى كولەمدى سۇرىپتاۋ اۋماعىنا جىبەرىلەدى. وندا ءىرى كولەمدى قوقىستاردىڭ قايتا وڭدەۋگە جارامدىسى ىرىكتەلەدى. كەلەسى, «ەلەكتەن وتكىزۋ» كەزەڭىندە قوقىستىڭ ەڭ ۇساق بولىكتەرى الىنادى. ودان كەيىنگى كابينادا جۇمىسشىلار ماتەريالداردى پلاستيك, مەتالل, كارتون نە قاعازعا ءبولىپ سۇرىپتايدى. سوڭعىسى – قوقىستى بۋىپ-ءتۇيۋ», دەيدى و.يانۋشكو.
كەشەندە جەلىدە قوقىستى بۋىپ-تۇيەتىن ارنايى جەلى بار. وندا ءدال قازىر سۇرىپتاۋعا جاتپايتىن قالدىقتار بۋىلىپ-تۇيىلەدى. سۇرىپتاۋدان وتكەن دايىن قوقىستار ارنايى وڭدەۋ ورىندارىنا جىبەرىلەدى.
اتىراۋ وبلىسى
