سۋرەت: irbistv.kz
ساۋلەت سالاسىنىڭ مامانى نازار جۇمابەكوۆ وبلىس ورتالىعىنداعى عيماراتتاردا بىركەلكى ساۋلەت ۇلگىسى ساقتالماي وتىرعانىنا قىنجىلادى. ونىڭ پىكىرىنشە, شاھاردا كورىكتى نىساندار جەتكىلىكتى, سونىڭ ىشىندە بۇكىل ەلىمىزگە تانىمال ءماشھۇر ءجۇسىپ مەشىتى مەن بلاگوۆەششەنسكي سوبورى بار.
ەلىمىزدە بىرىڭعاي ساۋلەتتىك كەلبەت ۇعىمىن ەنگىزۋدىڭ تاجىريبەسى بار. الماتىدا 2023 جىلى ديزاين-كود دەپ اتالاتىن قۇجات قابىلداندى. مامانداردىڭ ويىنشا, ۇساق-تۇيەك ماسەلەلەر تۇگەلدەي قامتىلعان مۇنداي قۇجاتتى بارلىق قالالاردا قابىلداۋعا بولادى.
– ساۋلەت قايداعى ءبىر جەكە ۇستانىم, كوزقاراستاردان باستاۋ الماۋعا ءتيىس. ديزاين-كود – قۇجات. باس تارتىلعان شەشىمدەردىڭ بارلىعىن كاسىپكەرلەر پالاتاسى, پروكۋراتۋرا, تاعىسىن-تاعىلار تەكسەرەدى. ديزاين-كودتا بارلىعى جازىلادى: توسەلەتىن كەسپە تاستار, جول جابىنىنان باستاپ قاسبەتتىڭ ءتۇسى مەن ءوڭى, قاپتاما ماتەريالدارى, ماڭدايشالار, كوگالداندىرۋ, شاعىن پىشىندەر دە بار, – دەيدى ن.جۇمابەكوۆ.
پاۆلودار بيلىگى ديزاين-كود تۋرالى 2022 جىلى ويلاي باستاعان ەدى. مەملەكەتتىك ساتىپ الۋلار پورتالىندا قۇجاتتى ازىرلەۋگە قاتىستى لوت پايدا بولدى. بىراق كونكۋرس وتكىزىلمەدى.
– قازىردە قالانىڭ ديزاين-كودى بار, الايدا ول قانداي دا ءبىر قۇقىقتىق قۇجاتپەن بەكىتىلمەگەن. ءبىز ونى باسشىلىققا الا المايمىز, سەبەبى زاڭ جۇزىندە بەكىتىلمەگەن سوڭ بەلگىلى ءبىر ءىس-شارالار قابىلداۋعا قۇقىمىز جوق. قولدانىستاعى زاڭناما مۇمكىندىگىمىزدى شەكتەيدى. استانا مەن الماتى ايرىقشا قالا مارتەبەسىنە يە بولعاندىقتان, ولار زاڭناما اياسىندا ارەكەت ەتىپ وتىر, – دەپ ءتۇسىندىردى پاۆلودار قالاسىنىڭ ساۋلەت جانە قالا قۇرىلىسى ءبولىمىنىڭ باس مامانى تيمۋر سەيىتقاليەۆ.
بىلتىر قالاداعى ورتالىق كوشەلەردىڭ ءبىرىن قايتا جاڭارتۋعا شەشىم قابىلداندى. لەرمونتوۆ كوشەسىنىڭ جاڭا كەلبەتىن الماتى ۋربانيستەرى ۇسىندى. مۇندا اۆتوبۋستار مەن ۆەلوسيپەدشىلەرگە ارنالعان جول, جاياۋ جۇرگىنشىلەر جولدارىندا دەمالىس ايماقتارى, سۋبۇرقاقتار قاراستىرىلدى. جالپى, شاھارداعى كوشەلەردىڭ سىرتقى كەلبەتىن تۇتاستاي وزگەرتۋ مۇمكىن ەمەس. كاسىپكەرلىك نىساندارداعى جارنامالىق ءتۇرلى ماڭدايشالار, باننەرلەر, ءتۇستى پاليترالار ءبارىبىر وزگەرىسسىز قالىپ وتىر.
2023 جىلى الماتىنىڭ اتاۋلى قۇجاتى بەكىتىلىپ, كەيىن شاھارداعى ديزاين-كودقا سايكەس كەلمەيتىن ماڭدايشالار مەن باننەرلەر الىندى. بىلتىر جازدا استانا قالاسىنىڭ ديزاين-كودى ازىرلەندى. پاۆلودارلىق ساۋلەتشىلەر مۇنداي قۇجات ءاربىر ايماقتا, كەمى وبلىس ورتالىعىندا بولۋى كەرەك دەپ ەسەپتەيدى.
پاۆلودار وبلىسى
