اراعا ەكى اي سالىپ الگى پروفەسسور كابينەتىنە شاقىردى. ۇستەلىنىڭ ۇستىندە «اڭىزدىڭ اقىرىنىڭ» اعىلشىنشا نۇسقاسى تۇر. ءسوزدى الدىمەن ءوزى باستادى: «ماعان وسىنداي كەرەمەت شىعارمانى وقۋعا ۇسىنعانىڭا العىس ايتامىن. ءبىر ايدان اسا ۋاقىت ىشىندە, بۇل روماندى وقىپ شىقتىم. ماعان اۆتوردىڭ كەڭ تىنىسى, ءار كەيىپكەرىن ءساتتى سۋرەتتەگەنى ۇنادى. ءبىز شىنى كەرەك, ورتالىق ازيانىڭ, ونىڭ ىشىندە قازاقستان قالامگەرلەرىنىڭ شىعارماشىلىعىمەن تانىس ەمەسپىز. ءبارىمىز ءبىر الەمدە ءومىر ءسۇرىپ جاتىرمىز, سول ءۇشىن دە ءبىر-ءبىرىمىزدى بىلۋگە قۇشتار بولعانىمىز ءجون. مەن وسى كىتاپتى قولعا العاندا, ىشىنەن وزىمە كەرەكتى مادەنيەتتەر توعىسىن, ءوزىم ەشقاشان كورمەگەن ەلدىڭ جاعدايىمەن تانىسارمىن دەگەن ءۇمىتىم بولعان ەدى. سول ءۇمىتىم اقتالدى. ءابىش كەكىلباي ۇلى ءبىر عانا ءامىرشىنىڭ ءومىرى ارقىلى بۇكىل ادامزاتتىق ماسەلەنى قوزعاپ وتىر. ءبىز, قوعامتانۋشىلار, ءار وقىعان كىتابىمىزدان وسىلاي ماڭىزدى ماسەلەلەردى سەزىنەمىز. وسىدان ءبىراز بۇرىن ءوزىڭ بەرگەن مۇحتار اۋەزوۆتىڭ «امەريكا اسەرلەرىنەن» كوپ اقپارات الدىم. مىنە, قازاق ادەبيەتىنەن ەكىنشى كىتاپتى ءبىتىردىم. ەندى قازاق قالامگەرلەرىنىڭ اعىلشىنشاعا اۋدارىلعان كىتاپتارى بولسا, ماعان بەرەرسىڭ», دەگەن ويىن ءبىلدىردى. وسىلاي از بولسا دا, جاقسى رومانداردى اۋدارىپ, شەتەلدىك زيالى قاۋىمعا وقۋعا بەرۋدى داستۇرگە اينالدىرساق, ادەبيەتىمىز بەن مادەنيەتىمىزدى ناسيحاتتاۋعا سەپ بولار ەدى.
پروفەسسوردىڭ جىلى سوزىنەن كەيىن مەنىڭ بويىمدى قۋانىش كەرنەدى. كەلەسى كۇنى وعان ءانۋار ءالىمجانوۆتىڭ «ۇستازدىڭ ورالۋى» اتتى رومانىن اپارىپ بەردىم. ونى دا وقىپ, پىكىرىن ايتاتىن بولىپ كەلىسكەن. ەلەكتروندى پوشتاما اندا-ساندا كوز سالىپ, حابار كۇتىپ ءجۇرمىن. ءبىر كۇنى «ۇستازدىڭ ورالۋى» تۋرالى دا جاقسى لەپەسىن جازىپ جىبەرەتىن شىعار.
