ەڭبەك جاعدايى زەردەلەنەدى

سەناتورلار اۋەلى «قازاقستان ءاليۋمينيى» اق گلينوزەم الۋ تسەحىنىڭ جۇمىس ۇردىسىمەن تانىسىپ, سودان سوڭ «پاۆلودار مۇناي-حيميا زاۋىتى» جشس باسقارۋ ورتالىعىنا باردى. پاۆلودار حيميا-مەحانيكالىق كوللەدجى مەن جوعارى ءتۇستى مەتاللۋرگيا كوللەدجىن ارالاپ كوردى.

وبلىس اكىمدىگىندە «ەڭبەك ادامى – ۇلتتىق ەكونوميكانىڭ ءوسۋى مەن ۇلت­تىڭ وركەندەۋىنىڭ نەگىزى» تاقىرى­بىن­دا وتەتىن پارلامەنتتىك تىڭداۋ­عا دايىن­د­ىققا, مەملەكەت باسشىسى­نى­ڭ «ادى­لەتتى قازاقستان: زاڭ مەن ءتارتىپ, ەكونو­ميكالىق ءوسىم, قوعامدىق وپتيميزم» اتتى جولداۋىن ىسكە اسىرۋعا ارنالعان الەۋمەتتىك-مادەني دامۋ جانە عىلىم كوميتەتىنىڭ كوشپەلى وتىرىسى ءوتتى.

جۇمىسشى ماماندىقتار جىلى اياسىندا مەملەكەت باسشىسىنىڭ تاپسىر­مالارىن ىسكە اسىرۋعا قاتىستى ماسەلە­لەردى تالقىلاۋعا كوميتەت مۇشەلەرى اينۇر ارعىنبەكوۆا, تالعات ءجۇنىسوۆ, التىنبەك نۇح ۇلى, اسەم راحمەتوۆا, رۋسلان رۇستەموۆ, امانگەلدى تولاميسوۆ, جەرگىلىكتى اتقارۋشى ورگانداردىڭ باسشىلارى مەن كاسىپوداقتاردىڭ وكىلدەرى قاتىستى. ءىس-شاراعا توراعالىق ەتكەن كوميتەت توراعاسى نۇرتورە ءجۇسىپ نەگىزگى ماقسات جۇمىسشىلاردىڭ ەڭبەك جاعدايلارىن زەردەلەۋ, پاۆلودار وبلىسىندا تەحنيكالىق, ورتا كاسىپتىك ءبىلىم بەرۋ جۇيەسىندە ماماندار دايارلاۋ ەكەنىن ءمالىم ەتتى.

ءوڭىر اكىمى اسايىن بايحانوۆ اتاپ وتكەندەي, وبلىستا كەشەندى ءىس-شارا­لار جوسپارى تۇزىلگەن, ول 3 باعىتتى قامتيدى. ەڭ اۋەلى كوللەدجدەردى كەزەڭ-كەزەڭىمەن جاڭعىرتۋ كوزدەلىپ وتىر. بۇعان وبلىستىق بيۋدجەتتەن كاسىپتىك-تەحنيكالىق ءبىلىم بەرۋ ۇيىمدارىن جاراقتاندىرۋعا, جاڭعىرتۋعا شامامەن 500 ملن تەڭگە باعىتتالادى. الەۋمەتتىك ارىپتەستىك اياسىندا ERG, Kazminerals كاسىپورىندارى 6 كوللەدجگە زاماناۋي جابدىقتار ساتىپ الۋعا 500 ملن تەڭگە قاراجات ءبولدى. ەكىنشى باعىت – جۇمىس ىستەيتىن جاستار قاتارىنداعى ستۋدەنتتەر ءۇشىن 100 ملن تەڭگەگە جاڭا ىنتالاندىرۋشى سىياقىلار مەن گرانتتار تاعايىنداۋ. سوڭعىسى – جۇمىسشى ماماندىقتارىنىڭ بەدەلىن ارتتىرۋ, كاسىپورىن قىزمەتكەرلەرىن ىنتالاندىرۋ.

ايماقتا ەكونوميكالىق بەلسەندى دەپ سانالاتىن 405 مىڭ ادام بار بولسا, ونىڭ 60%-دان استامىن جۇمىس­شى ماماندىقتار وكىلدەرى يەلەنەدى. تالداۋ كورسەتكەندەي, كەلەشەكتە جۇ­مىس كۇشىنە دەگەن قاجەتتىلىك ارتا تۇسە­دى. الداعى 5 جىلدا وبلىستا 140-تان اس­تام ينۆەستيتسيالىق جوبانى ىسكە اسىرۋ جوسپارلانعان. ونىڭ ىشىندە ءۇش فەر­روقورىتپا زاۋىتىن اشۋ, ۇستا­لىق-بانداج كەشەنىن ىسكە قوسۋ, ءىرى ەلەكترو­مەتاللۋرگيالىق زاۋىتتىڭ قۇرىلىسى, قۇرامىندا التىنى بار كونتسەنتراتتاردى قايتا وڭدەۋ كاسىپورنىن ىسكە قوسۋ كوزدەلىپ وتىر. ناتيجەسىندە, 11 مىڭنان اسا تۇراقتى جۇمىس ورنى قۇرىلادى.

– سلەسارلار, مونتاجداۋشىلار, ەلەكتريكتەر, قۇرىلىسشىلار, جۇرگىزۋشى­لەر, مەحانيكتەر سياقتى جۇمىسشى ماما­ن­دىقتار – قۇرىلىستان باستاپ وندىرى­سكە دەيىنگى ەكونوميكانىڭ كوپتەگەن سالالارىنا قاجەت. ولاردىڭ جۇمىس­تارى ماڭىزدى بولعانىنا قاراماستان, نازار­عا ءجيى ىلىنبەي قالادى. مانساپ­تىق ءوسۋ كەلەشەگى مەن لايىق­تى جالاقى تۋرالى اقپاراتتاردى جەتكىزۋ ارقىلى جۇمىسشى ماماندىقتاردىڭ مارتەبەسىن ارتتىرۋعا مۇمكىندىك بار, – دەدى ا.بايحانوۆ.

وسى ماقساتتا قالا قۇراۋشى كاسىپ­ورىنداردىڭ باسشىلارىمەن بىرقاتار كەزدەسۋ وتكىزىلدى. ولار ءوز كەزەگىندە قىز­مەتكەرلەردى ماتەريالدىق, الەۋ­مەت­تىك قامتاماسىز ەتۋ جونىندەگى باستامالار­عا قولداۋ ءبىلدىردى. ولار – تۇرعىن ۇيمەن قامتاماسىز ەتۋ, اۆتوكولىك ساتىپ اپەرۋ, جالاقىنى ءوسىرۋ, باسقا دا الەۋمەتتىك ىنتالاندىرۋ. ماسەلەن, ERG توبى وسى ماقساتتارعا 1,5 ملرد تەڭگە ءبولۋدى جوس­پارلاپ وتىر. بۇعان قوسا, بيىلعى جىلى ءوڭىر كاسىپورىندارىندا جالاقىنى ارتتىرۋ بولجامى بار.

سەناتتىڭ الەۋمەتتىك-مادەني دامۋ جانە عىلىم كوميتەتىنىڭ توراعاسى ن.ءجۇسىپ كەزدەسۋ بارىسىندا ايتىلعان بارلىق ۇسىنىستار الداعى ۋاقىتتا ەسكەرىلەتىنىن اتاپ ءوتتى.

پاۆلودار وبلىسى