سۋرەت: baq.kz
پاۆلوداردان جىلىنا 150 مىڭ تونناداي تۇرمىستىق قالدىق شىعادى. ونى سۇرىپتاپ, وڭدەيتىن زاۋىت تاياۋ ۋاقىتتا سالىنىپ ءبىتۋى مۇمكىن. وعان دەيىن تۇرعىنداردى تۇرمىستىق قالدىقتاردى ءبولىپ جيناۋعا داعدىلاندىرۋ كوزدەلىپ وتىر.
– ءۇي ماڭىنداعى كونتەينەرلەر قوقىستى سۇرىپتاپ جيناۋ ماسەلەسىن شەشپەيدى. تۇرمىستىق قالدىقتى ۇيدە بولەكتەپ جيناۋ قاجەت. ازاماتتار قوقىستىڭ بارلىعىن ءبىر عانا ىدىستا ساقتاپ, سول قالپىمەن كونتەينەرگە اپارىپ توگەدى. جالپى, ۇيدەگى مۇنداي ىدىس ءتورت بولىكتەن تۇرسا دۇرىس بولار ەدى. بىراق بىزدە ازىرگە مۇنداي ەكولوگيالىق سانا قالىپتاسقان جوق ءارى ونى تالاپ ەتۋ دە ەرتە. سوندىقتان سۇرىپتاۋدى الدىمەن كاسىپورىنداردا, قوعامدىق تاماقتانۋ ورىندارى مەن وزگە دە ۇيىمداردا جۇرگىزۋ كەرەك. ماسەلەن, ولاردا شىنىعا, پلاستيككە, قاعازعا, بيولوگيالىق قالدىقتارعا ارنالعان كونتەينەرلەر قويىلعانى دۇرىس, – دەيدى پاۆلودار وبلىسىنىڭ اكىمى اسايىن بايحانوۆ.
اكىم وڭىردە قالدىق وڭدەيتىن زاۋىت اشىلسا, جىل سايىن توننالاپ جينالىپ قالاتىن قوقىستاردىڭ ماسەلەسىن شەشۋگە بولادى دەپ ەسەپتەيدى. بيولوگيالىق قالدىقتاردان بيوگۋمۋس وندىرۋگە بولار ەدى. زاۋىت وعان قوسا قالدىقتان مەتالدى, شىنى مەن قاعازدى ءبولىپ الىپ شىعارۋعا مۇمكىندىك بەرەدى.
وبلىستاعى كوممەرتسيالىق كاسىپورىندار قوقىستى سۇرىپتاپ جيناۋعا كىرىسە باستادى. اۋەلى مەتاللۋرگيالىق ءىرى كاسىپورىندار, ودان سوڭ قوعامدىق تاماقتانۋ ورىندارى مەن سۋپەرماركەتتەر, دۇكەندەر كوشەدى. سوڭىنان قالا تۇرعىندارىنا ۇيرەتۋ كوزدەلىپ وتىر. بولاشاقتا تۇرعىنداردى بۇل تۇرعىدا ىنتالاندىرۋ دا ويدا بار. ماسەلەن, قالدىقتى بولەك جيناعاندار قوقىستى شىعارۋ قىزمەتىنە جەڭىلدىكپەن تولەم جاساۋى مۇمكىن.
اتاپ ءوتۋ كەرەك, پاۆلودار قالاسىنىڭ اۋلالارىنداعى كونتەينەرلەردەن كۇنىنە مىڭداعان توننا قوقىس جينالادى. بيلىك تۇرمىستىق قاتتى قالدىقتاردى سۇرىپتاپ, جيناۋ تاسىلىنە كوشۋدى ويعا العالى بىرنەشە جىلدىڭ ءجۇزى بولدى. قالدىقتار توگىلەتىن پوليگوندا ارنايى زاۋىت قۇرۋ جوباسى باستالىپ تا كەتكەن. شاھاردا ەسكى قوقىس كونتەينەرلەرىن ەۋروكونتەينەرلەرگە اۋىستىرۋ جوباسى جالعاسىپ جاتىر.
قۇرىلىپ جاتقان قوقىس وڭدەۋ زاۋىتىندا بولاشاقتا ءتۇستى, قارا مەتالدار, كارتون, پوليەتيلەن, پلاستيك قالدىقتارى, رەزەڭكە, اعاش, توقىما-ماتا ونىمدەرى, شىنى قالدىقتارى جەكە-جەكە جينالادى.
پاۆلودار وبلىسى
