سۋرەت «ەگەمەن قازاقستاننىڭ» ارحيۆىنەن الىندى
كوكتەمگى تاسقىننىڭ سالدارىنان 3,9 مىڭ تۇرعىن ءۇي, 100-دەن استام كاسىپكەرلىك سۋبەكتىسى, 5 ءبىلىم بەرۋ نىسانى سۋعا كەتتى. شىعىندى قالپىنا كەلتىرۋگە بارلىعى 87 ملرد تەڭگە بيۋدجەتتەن, ءتۇرلى قورلاردان دەمەۋشىلىك قاراجات ءبولىندى. ونىڭ ىشىندە پرەزيدەنت ق.توقاەۆتىڭ باستاماسىمەن ەلىمىزدىڭ اسا ءىرى كومپانيالارى مەن قورلارى 63 ملرد تەڭگە دەمەۋشىلىك جاسادى.
پەتروپاۆل قالاسىندا «بىرلىك» اتتى شاعىن اۋدان بوي كوتەرىپ, 700 تۇرعىن ءۇي سالىندى, سونىمەن بىرگە 1394 پاتەر ساتىپ الىندى. 1899 ءۇي قالپىنا كەلتىرىلدى. بارلىق تۇرعىندارعا ۇكىمەت بەلگىلەگەن كولەمدە وتەماقى تولەندى.
قازىر سۋ بۇزىپ كەتكەن دامبالاردى, قۇرىلىستاردى, گيدروتەحنيكالىق جاراقتاردى قالپىنا كەلتىرۋ جۇمىستارى قارقىندى جۇرگىزىلىپ جاتىر. بيىلعى قارعىن سۋدىڭ دا قاۋىپتى بولاتىن ءتۇرى بار. مامانداردىڭ ايتۋىنشا, ەسىل وزەنىنىڭ دەڭگەيى قالىپتاعىداي تۇسپەدى, ونىڭ ۇستىنە جەراستى سۋلارى كوتەرىلگەن, قاردىڭ كولەمى دە از ەمەس. سوندىقتان وبلىس بارلىق مۇمكىندىكتەردى پايدالانىپ, بىلتىرعىداي توپان سۋعا جول بەرمەۋدىڭ قامىن جاساپ جاتىر.
وتكەن جىلى ەكونوميكانىڭ بارلىق سالالارى, ونىڭ ىشىندە اۋىل شارۋاشىلىعى 140, ونەركاسىپ 103,3, قۇرىلىس 131,4, ساۋدا 109,6 كولىك 124,1% وسىمگە قول جەتكىزدى. ەگىن شارۋاشىلىعىندا 6,2 ملن توننا استىق جينالىپ, رەكوردتىق كورسەتكىش تىركەلدى. مال شارۋاشىلىعىندا 17 تاۋارلى-ءسۇت كەشەنى ىسكە قوسىلدى.
وبلىس ەكونوميكاسىن ساراپتاعان ماماندار ايماقتىق جالپى ءونىم ء(اجو) قۇرامىندا ونەركاسىپ ونىمدەرىنىڭ جىل سايىن ءوسىپ كەلە جاتقانىن ايتادى. مىسالى, ونىڭ ۇلەسى ءاجو كولەمىندە 2022 جىلى – 16 پايىز, 2023 جىلى 19 پايىز بولسا, بىلتىر ءتىپتى ارتتى. بۇل – ەكونوميكانى ءارتاراپتاندىرۋدىڭ ناقتى كورىنىسى. ءبىر جىلدىڭ وزىندە عانا پانەلدەر شىعاراتىن «Nord Panels», ماي ەكستراكتسيالايتىن «ماسلو-دەل» زاۋىتى, كەبەكتى بولشەكتەيتىن «BioOperations» تسەحى, «قىزىلجار جولدارى كز» اسفالت زاۋىتى ىسكە قوسىلدى.
ەكونوميكاعا قۇيىلعان ينۆەستيتسيا جوسپارى تولىق ورىندالىپ, 556 ملرد تەڭگە بولدى. ءبىر جىلدا 1002 شاقىرىم جول جوندەلدى, ونىڭ 208 شاقىرىمى رەسپۋبليكالىق ماڭىزى بار, 630 شاقىرىمى جەرگىلىكتى ماڭىزى بار جولدار. ەلدى مەكەندەردىڭ 164 شاقىرىمدىق ىشكى جولدارى جوندەلدى. قازىر وبلىس جولدارىنىڭ 84%-ى جاقسى, قاناعاتتانارلىق جاعدايدا دەپ باعالانىپ وتىر.
وتكەن جىلى 281 شاقىرىمدىق سۋ قۇبىرىن تارتۋدىڭ ارقاسىندا سولتۇستىكقازاقستاندىقتاردىڭ 97,5%-ى تازا اۋىزسۋعا قول جەتكىزدى. سونىمەن قاتار 1,5 مىڭ شاقىرىم ەلەكتر جۇيەلەرىنىڭ سىمدارى مەن 10,5 شاقىرىم جىلۋ جۇيەلەرىنىڭ قۇبىرلارى جاڭالاندى.
تۇرعىن ءۇي قۇرىلىسى دا وبلىستا قارقىن الىپ كەلەدى. بىلتىر 7 مىڭنان ارتىق وتباسى جاڭا تۇرعىن ۇيگە قول جەتكىزدى. 17 كوپقاباتتى ۇيلەردىڭ قۇرىلىسى اياقتالدى, 1200 ورىندىق ءبىر جاتاقحانا پايدالانۋعا بەرىلدى.
وبلىس بيۋدجەتىنىڭ كىرىس بولىگى الدىڭعى جىلدان 6,2%-عا ارتىپ, 127,1 ملرد تەڭگەگە جەتتى. شىعىس بولىگى دە بەلگىلەگەن جوسپار شەڭبەرىندە ورىندالدى. بيىلعى جوسپارلار اراسىندا جاڭا جۇمىس ورىندارىن قۇرۋ, جۇمىسسىزدىقتى, اتاۋلى الەۋمەتتىك كومەك الۋشىلاردىڭ ۇلەسىن ازايتۋ جونىندەگى جۇمىستى جالعاستىرۋ باسىم باعىتتار رەتىندە بەلگىلەنگەن.
مەملەكەت باسشىسىنىڭ اۋىل شارۋاشىلىعى ءونىمىن ەكى جىلدا ەكى ەسەگە ارتتىرۋ جونىندەگى مىندەتىن ورىنداۋدا سقو كوش باستاپ كەلەدى. 2023 جىلى بارلىق اۋىل شارۋاشىلىعى ءونىمىنىڭ يندەكسى 756 ملرد تەڭگە بولسا, 2024 جىلى 936 ملرد تەڭگەگە ارتتى. 2025 جىلدىڭ كوكتەمگى ەگىس جۇمىستارىنا دايىندىق قالىپتى, بۇگىنگە دەيىن 470 مىڭ توننا تۇقىم قۇيىلدى.
ونەركاسىپ سالاسىندا «رادۋگا» كومپانياسى «تەحنوەكوپارك» قۇرۋ ينۆەستيتسيالىق جوباسىن ىسكە اسىرادى. جاڭا جوبالاردىڭ قولعا الىنۋىنا وراي «قىزىلجار» ارنايى ەكونوميكالىق جانە يندۋستريالدىق ايماعى 150 گەكتارعا ۇلعايتىلدى. وندا «ۋلترادەكور», «ىكەا» كومپانيالارى اعاش وڭدەۋ, جيھاز جاساۋ تسەحتارىن اشپاقشى. رەسەيلىك «بەيكەرتون» كومپانياسى كونديتەرلىك بۇيىمدار, قىتايدىڭ اۋىلشارۋاشىلىق جاراقتارىن شىعاراتىن كومپانياسى تراكتورلار مەن تىركەمەلەر قۇراستىرۋ تسەحىن اشۋ جوبالارىن قولعا الىپ جاتىر.
سولتۇستىك قازاقستان وبلىسى
