ولجاس بەكتەنوۆ تسيفرلىق تەحنولوگيالار مەن جاساندى ينتەللەكتتى الەۋمەتتىك قولدانىسقا كەڭ اۋقىمدا ەنگىزۋدىڭ ماڭىزدىلىعىن جەتكىزدى.
«جاساندى ينتەللەكتتىڭ «KazLLM» العاشقى تىلدىك مودەلىن جاساپ شىعاردىق. بۇگىندە ونى ۇزدىكسىز ماشىقتاندىرۋ جالعاسىپ جاتىر.
سونىمەن قاتار پرەزيدەنت تاپسىرماسىنا سايكەس 2025-ءشى جىلى Alem.AI حالىقارالىق جاساندى ينتەللەكت ورتالىعى اشىلادى.
«AI-Sana» باعدارلاماسى اياسىندا بيىل 100 مىڭ ستۋدەنت ەكونوميكا سالالارىنا جاساندى ينتەللەكتتى ەنگىزۋدىڭ قولدانبالى داعدىلارىنا وقيتىن بولادى.
20 جوعارى وقۋ ورنىنىڭ بازاسىندا جاساندى ينتەللەكت بويىنشا ماماندار دايارلاۋ قولعا الىندى. «بولاشاق» باعدارلاماسى بويىنشا جەكە كۆوتا ەنگىزىلدى.
Astana Hub تابىستى ستارتاپ-جوبالاردى دايىندايتىن ءتيىمدى الاڭعا اينالدى. بۇگىندە مۇندا 1600 IT-كومپانيا تىركەلگەن», دەدى و. بەكتەنوۆ.
بۇعان قوسا ۇكىمەت باسشىسى «Alaqan» اتتى باعدارلامانىڭ قۇرىلىم جۇيەسىن مىسالعا كەلتىردى. ول قولدانۋشىلاردى الاقان ءىزى بويىنشا انىقتاۋعا مۇمكىندىك بەرەدى. ايتۋىنشا, اتالعان جوبا قازىر 300 مەكتەپتە قولدانىسقا ەنگىزىلگەن, جۋىردا ۇكىمەت عيماراتىندا ورناتىلاتىن بولادى. سونداي-اق ونى 6 ەلگە: ساۋد ارابياسى, سينگاپۋر, كۋۆەيت جانە باسقا دا مەملەكەتتەرگە ەكسپورتقا شىعارۋ جوسپارلانىپ جاتقانىن مالىمدەدى.
«تاعى ءبىر ستارتاپ – جاساندى ينتەللەكت نەگىزىندە ماتىننەن ۆيدەو جاساۋعا جانە وڭدەۋگە ارنالعان Higgsfield AI جوباسى. جوبا 100 ملن. دوللارعا باعالانىپ وتىر.
بالالاردى باعدارلامالاۋعا ۇيرەتەتىن Codiplay جوباسى قازىردىڭ وزىندە الەمنىڭ 13 ەلىندەگى مەكتەپتەردە قولدانىلۋدا.
ولاردىڭ ىشىندە وڭتۇستىك كورەيا, تۇركيا, ۇلىبريتانيا, كاتار جانە تاعى باسقا ەلدەر بار. اتالعان جوبا دا 100 ملن. دوللارعا باعالاندى.
وسى جانە Grand Mobile, CITIX, CEREBRA, OGames, Parqour, ApartX سياقتى باسقا دا تابىستى قازاقستاندىق جوبالار بۇل باعىتتا ءبىزدىڭ زور الەۋەتىمىزدىڭ بارىن كورسەتەدى», دەدى و. بەكتەنوۆ.
