پالاتا سپيكەرى سپورتشىلارعا ءىلتيپات بىلدىرە كەلىپ, Astana Indoor Meet for Amin Tuyakov Prizes جارىسىمەن World Athletics Indoor Tour Gold سايىستار سەرياسىنىڭ بيىلعى كەزەڭى باستالاتىنىن اتاپ ءوتتى. ىرگەلى ءتۋرنيردىڭ وزگە كەزەڭدەرى سەربيا, اقش, چەحيا, گەرمانيا, فرانتسيا, پولشا, يسپانيا سياقتى ەلدەردەگى توعىز قالادا وتكىزىلەدى. الەمدەگى ەڭ ۇزدىك جەڭىل اتلەتتەر باق سىنايتىن بۇل باسەكەنى ناعىز سپورت مەرەكەسى دەۋگە تولىق نەگىز بار.
سونىمەن قاتار م.اشىمباەۆ ايگىلى چەمپيوندار مەن كەلەشەگى زور جاس تالانتتار قاتىسىپ جاتقان مۇنداي دودادا الدىڭعى بۋىندى ۇلىقتاۋ ساباقتاستىقتىڭ سيمۆولى ەكەنىن تىلگە تيەك ەتتى. ول مۇنداي قادام سپورتتى الەمدىك دەڭگەيدە دارىپتەۋگە ايتارلىقتاي ىقپال ەتەتىنىنە جانە جاس بۋىندى ۇلكەن ماقساتتارعا جەتەلەپ, ىنتالاندىرا تۇسەتىنىنە نازار اۋداردى. سونداي-اق سەنات توراعاسى قازاقستاندا بۇقارالىق سپورتتى دامىتۋعا مەملەكەت باسشىسى باسا ءمان بەرىپ وتىرعانىن ايتتى.
«قازىرگى تاڭدا مەملەكەت باسشىسى قاسىم-جومارت توقاەۆتىڭ باستاماسىمەن ەلىمىزدە كاسىپقوي, اۋەسقوي, بۇقارالىق جانە ينكليۋزيۆتى سپورت تۇرلەرىن دامىتۋ جولىندا ماڭىزدى جوبالار ىسكە اسىرىلىپ جاتىر. قازاقستاندا Astana Indoor Meet for Amin Tuyakov Prizes سياقتى حالىقارالىق بەدەلدى سايىستاردى وتكىزۋ سول كەشەندى جۇمىستىڭ ناقتى ناتيجەسى ەكەنى ءسوزسىز. اتالعان جارىس ايگىلى جەلاياق, بىلىكتى باپكەر, وتاندىق جانە الەمدىك جەڭىل اتلەتيكا تاريحىندا ەرەكشە ورىن الاتىن داڭقتى سپورتشى ءامين تۇياقوۆ جۇلدەسىنە ارنالىپ وتىر. وسى كەزەڭمەن الەمدەگى ەڭ ۇزدىك جەڭىل اتلەتتەر سىنعا تۇسەتىن World Athletics Indoor Tour Gold 2025 سايىستار سەرياسى باستالادى. قاتىسۋشىلار اراسىندا وليمپيادا جانە الەم چەمپيوندارى بار. سوندىقتان وسىنداي بايراقتى باسەكەگە قازاقستاندىق سپورتشىلاردىڭ دا قاتىسۋى – ءبىز ءۇشىن زور ماقتانىش. الداعى ۋاقىتتا بۇل حالىقارالىق تۋرنير قازاقستاندا جەڭىل اتلەتيكانىڭ دامۋىنا تىڭ سەرپىن بەرەدى دەپ سەنەمىز», دەپ م.اشىمباەۆ ۇيىمداستىرۋشىلارعا العىس ءبىلدىردى.
جارىستىڭ اشىلۋ راسىمىنە تۋريزم جانە سپورت ءمينيسترى ەربول مىرزابوسىنوۆ, استانا قالاسىنىڭ اكىمى جەڭىس قاسىمبەك, ەڭبەك سىڭىرگەن سپورت شەبەرى, ەۋروپا چەمپيونى, ەۋروپا كۋبوگىنىڭ يەگەرى جانە كوپتەگەن ءدۇبىرلى دودالاردا توپ جارعان ارداگەر سپورتشى ءامين تۇياقوۆ, سونداي-اق جەڭىل اتلەتيكا فەدەراتسياسىنىڭ پرەزيدەنتى, وليمپيادا چەمپيونى ولگا رىپاكوۆا قاتىستى. باسەكەگە 40 ەلدەن كەلگەن 110 سپورتشى قاتىسىپ جاتىر. تۋرنيردە ەل نامىسىن 44 اتلەتىمىز قورعايدى. ولاردىڭ قاتارىندا ۇلتتىق قۇرامانىڭ كوشباسشىلارى دا بار.
باعدارلاماعا سايكەس ايەلدەر – جەتى (60 م, كەدەرگىلەر ارقىلى 60 م, 400 م, 3000 م, بيىكتىككە سەكىرۋ, ءۇش قارعىپ سەكىرۋ, يادرو لاقتىرۋ), ال ەرلەر التى سايىس بويىنشا (60 م, كەدەرگىلەر ارقىلى 60 م, 400 م, 1500 م, بيىكتىككە سەكىرۋ, ۇزىندىققا سەكىرۋ) ءوزارا مىقتىنى انىقتايدى.
