سۋرەتتى تۇسىرگەن – ەرلان ومار, «EQ»
سونداي-اق ەكى ەل بانكتىڭ بۇكىل الەمدەگى ينۆەستيتسيالىق باعىتىندا بەسىنشى جانە التىنشى ورىنداردى الىپ وتىر. ەقدب تاجىكستانعا – 52 ملن, قىرعىزستانعا 52 ملن جانە موڭعولياعا 264 ملن ەۋرو سالعان.
«بانك قاراجاتىنىڭ 61%-ى ورنىقتى ينفراقۇرىلىمدىق جوبالاردى قولداۋعا باعىتتالعان. 24% كرەديت شاعىن جانە ورتا بيزنەستى, ايەلدەر مەن جاس كاسىپكەرلەردى قارجىلاندىرۋ ماقساتىندا جەرگىلىكتى بانكتەرگە بەرىلگەن. سونىمەن قاتار رەسۋرستاردى ءتيىمدى پايدالانۋ جانە كليمات وزگەرىسىنە ورنىقتىلىق بويىنشا دا نەسيە ۇسىنىلعان. قالعان 15% نەسيە كورپوراتيۆتى سەكتور كليەنتتەرىنىڭ ەنشىسىنە ءتيدى», دەپ مالىمدەيدى بانك.
2024 جىلى بانكتىڭ قازاقستانداعى جيىنتىق ينۆەستيتسياسى 10 ملرد ەۋرودان اسىپ تۇسكەن. وزبەكستاندا 5 ملرد ەۋروعا جەتكەن. تاجىكستان مەن قىرعىزستان بانكتەن 1 ملرد دوللاردان استام قارجى تارتقان.
ەقدب ينۆەستيتسيا قۇيعان ەلىمىزدەگى اۋقىمدى جوبالار قاتارىندا اقتوبە قالاسىنداعى جاڭا تازارتۋ قۇرىلىستارى جانە سوعان بايلانىستى ينفراقۇرىلىمدى سالۋ بار. وعان بانك 96,4 ملن ەۋرو تاۋەلسىز نەسيە ۇسىندى. سونىمەن بىرگە قاراعاندى وبلىسىنداعى گرافيت كەن ورنىندا جۇمىس ىستەيتىن جانە اكتسياسى اۋستراليا قور بيرجاسىندا ساۋدالاناتىن «Sarytogan Graphite Limited» كومپانياسىنىڭ 17,36% اكتسياسىن يەلەندى. اكتسيالاردى باستاپقى ورنالاستىرۋ اياسىندا «Air Astana» اۋە كومپانياسىنىڭ اكتسيالارىنا 42 ملن دوللار قارجى قۇيدى.
ەقدب-نىڭ جاڭا قاراجاتى قازاقستان مەن وزبەكستانداعى ۇلتتىق جەلى وپەراتورلارىنىڭ تۇراقتىلىعىن ارتتىرۋعا جانە جاڭارتىلاتىن ەنەرگيا كوزدەرىن بىرىكتىرۋگە جاردەمدەسۋ ءۇشىن پايدالانىلدى. بانك 252 ملن ەۋرو كولەمىندە قارجى ۇسىندى. KEGOC 500 كۆ-عا نەگىزدەلگەن 600 كم ينفراقۇرىلىم جەلىسىنىڭ قۇرىلىسىنا جانە باتىس قازاقستاننىڭ ەنەرگوجۇيەسىن بىرىڭعاي ەنەرگوجۇيەمەن ينتەگراتسيالاۋعا 66,4 ملن دوللار بولگەن.
ال الەۋمەتتىك ينفراقۇرىلىم سەكتورىندا بانك ءبىزدىڭ ەلدەگى العاشقى ءىرى مەملەكەت-جەكەشەلىك ارىپتەستىگى جوباسىنىڭ نەگىزگى دەمەۋشىسى بولدى. ونىڭ اياسىندا 365 ملن ەۋرونى التى بىردەي قارجى ينستيتۋتى كوكشەتاۋ قالاسىندا 630 ورىنعا لايىقتالعان كوپپروفيلدى اۋرۋحانانى سالۋ جانە پايدالانۋعا بەرۋگە جۇمساۋى قاجەت.
سونداي-اق بانك ورتالىق ازياداعى ءىرى ينستيتۋتسيونالدىق ينۆەستور بولىپ سانالادى. قازىرگە دەيىن 1 163 جاسىل جانە ينكليۋزيۆتىك جوبالارعا 21,5 ملرد ەۋرو قارجى بولگەن.
