سۋرەتتى تۇسىرگەن – اۆتور
قۇرىلعىعا تۇتىك ارقىلى سپيرت قۇيىلىپ, تۇتاتىلعان. سونىڭ اسەرىنەن ۇتىك تابانى تەز قىزادى.
كيىم تەگىستەۋگە ارنالعان ۇتىكتىڭ ەجەلگى تۇرلەرى ءالى كۇنگە كورگەن جانداردى تامساندىرماي قويمايدى. دەسە دە, العاشقى ۇتىكتى اۋەلدە كىم جاساعانى تۋرالى دەرەك جوق. ۇتىكتىڭ ەڭ العاشقى ءتۇرى كادىمگى تاس ەكەن. ءبىر بەتى تەگىستەلگەن جالپاق تاستىڭ استىنا ىلعالدى كيىمدى توسەپ, تولىقتاي كەپكەنشە ۇستىنەن باسقا اۋىر تاستارمەن باستىرىپ قوياتىن بولعان. ناتيجەسىندە, كيىمنىڭ قىرتىسى جازىلىپ, تەگىستەلەتىن. ال ءبىزدىڭ زامانىمىزعا دەيىنگى ءىV–V عاسىرلاردا ەجەلگى گرەكتەر ىستىق مەتالل شىبىقتاردى پايدالانسا, ريمدىكتەر قىزعان تاستى پايدالانعان. ال رەسەي جەرىندە ەرتەدە كيىمدى كادىمگى وقتاۋعا وراپ, ەرسىلى-قارسىلى دومالاتىپ, قىرتىسىن جازاتىن بولعان ەكەن. سول سياقتى ىستىق سۋ قۇيىلعان ءتۇبى تەگىس تەمىر تاباقپەن كيىم ۇستىنەن باسۋ ءادىسى دە قولدانىلعان.
ۇتىك وندىرىسىندە العاش شوق سالاتىن قۇرالدار پايدا بولعان. شوق ۇتىكتەر كوپتەگەن ەلدەرگە تاراپ, اناسىنان قىزىنا مۇرا ەتىپ قالدىرىلاتىن قىمبات بۇيىمعا اينالدى. ايتسە دە ونىڭ سالماعى اسا اۋىر ءارى ۇنەمى شوق سالىپ تۇرۋ قاجەت بولعاندىقتان ىڭعايسىزداۋ ەدى. سوندىقتان گەرمانياداعى ۇتىك شىعارۋشىلار ءحVىىى عاسىردان باستاپ ءسپيرتتى ۇتىك شىعارعان. مۇنداي قۇرالعا سپيرت قۇيىلعان شىنى ساۋىت جالعانىپ, ول تۇتىكشە ارقىلى ۇتىكتىڭ ىشىنە وتەتىن دە, قوسقاندا جانىپ, قىزدىراتىن قاجەتتى جىلۋدى بەرەتىن ەدى. ءسپيرتتى ۇتىكتەر ءوز زامانىندا كادىمگىدەي جاڭالىق بولدى. سەبەبى ول تەز قىزاتىن ءارى سالماعى دا اسا اۋىر ەمەس. الايدا باعاسى ءارى جاناتىن شيكىزاتى قىمبات بولۋىنا بايلانىستى كەڭ تارالا قويماعان.
پوتانين اتىنداعى وبلىستىق تاريحي-ولكەتانۋ مۋزەيىندە تۇرعان «Vionna» ماركالى ۇتىك جاقسى جاعدايدا ساقتالعان. مۇنداي بۇيىمداردى رەسەي جەرى مەن قازاقستان اۋماعىندا ءحVىىى عاسىردىڭ ەكىنشى جارتىسى مەن ءحىح عاسىردىڭ باسىندا اۋقاتتى ادامدار پايدالانىپتى.
پاۆلودار
