قامشىبەكتىڭ ەل سپورتىنا سىڭىرگەن ەڭبەگى ەرەن. بويى قارسىلاستارىنان الدەقايدا قىسقا بولعانىمەن, اسا اۋىر سالماقتا ايقاسقان سىر بويىنىڭ ساڭلاعى كوپتەگەن بايراقتى باسەكەلەردە ەل نامىسىن ابىرويلى قورعادى. تارقاتىپ ايتساق, ازيا چەمپيوناتىندا ءتورت رەت كۇمىس مەدالدى موينىندا جارقىراتتى. بۇل تابىستارعا تاشكەنتتە (2017), بانگكوكتا (2019), دۋبايدا (2021), امماندا (2022) قول جەتكىزدى. 2022 جىلى حانچجوۋداعى ازيا ويىندارىندا دا ءدال سول مەجەدەن كورىندى. 2017 جىلى گامبۋرگتە, 2019 جىلى ەكاتەرينبۋرگتە ۇيىمداستىرىلعان الەم چەمپيوناتتارىندا دا كۇمىسپەن كۇپتەلدى.
قازاق الىبىنىڭ سپورتتىق مانسابىنداعى ەڭ ءىرى تابىسى – 2021 جىلى توكيودا الاۋى تۇتانعان وليمپيا ويىندارىنىڭ قولا مەدالى. كۇنشىعىس ەلىندە قوڭقاباەۆ ءۇش جەكپە-جەك وتكىزدى. العاشقى اينالىمداردا افريكا ويىندارىنىڭ جەڭىمپازى, افريكا چەمپيونى, مىسىرلىق يۋسري حافەز بەن رەسەيلىك يۆان ۆەرياسوۆتان باسىم ءتۇستى. جارتىلاي فينالدا ونىڭ جولىن امەريكالىق ريچارد توررەس بوگەدى. باسەكە بارىسىندا اۋىر سوققى الىپ قالعان قانداسىمىز جەكپە-جەكتى جالعاستىرا المادى.
سىر بويى ساڭلاعىنىڭ ءدۇبىرلى دودالاردا باس جۇلدە الۋىنا كوبىنە-كوپ كەدەرگى كەلتىرگەن وليمپيادا مەن الەمنىڭ ەكى دۇركىن چەمپيونى باحودير جالولوۆ ەكەنىن جانكۇيەرلەر جاقسى بىلەدى. دەسەك تە ونىڭ وزبەكستاننىڭ الىبىن ۇتقان كەزدەرى دە جوق ەمەس. الەمنىڭ ەڭ مىقتى قوس بوكسشىسى ءوزارا 10 مارتە جۇدىرىقتاسقان ەكەن. سونىڭ ۇشەۋىندە قامشىبەك باسىم تۇسسە, جەتەۋىندە باحودير جەڭىسكە جەتتى. سونىمەن قاتار قانداسىمىز كاسىپقوي رينگتە دە كۇش سىناستى. بارلىعى بەس كەزدەسۋ وتكىزگەن ول بارلىعىندا جەڭىس تويىن تويلادى. ءتورت قارسىلاسىن نوكاۋتقا جىبەردى. ءسويتىپ, قوڭقاباەۆ ءبىرىنشى اۋىر سالماقتاعى WBO Asia مەن WBA Gold نۇسقالارى بويىنشا چەمپيوندىق بەلبەۋلەردى يەلەندى.
بيىلعى پاريج وليمپياداسىندا جانكۇيەرلەر قامشىبەكتەن جۇلدە كۇتكەن ەدى. فينالدا ونىڭ جولى قايتا جالولوۆپەن قيىساتىن شىعار دەپ توپشىلادىق. الايدا فرانتسيانىڭ باس شاھارىندا قازاق بوكسشىسىنىڭ اسىعى الشىسىنان تۇسپەدى. ول تۇساۋكەسەر كەزدەسۋىندە ويدا-جوقتا يسپانيالىق ايۋب گادفاعا ەسە جىبەردى. سودان كەيىن قامشىبەك ءبىراز ۋاقىت كوپشىلىك نازارىنان تىس قالدى. مىنە, ەندى 33 جاستاعى اتاقتى بىلعارى قولعاپ شەبەرىنىڭ ۇلكەن سپورتپەن قوش ايتىسقانى ءمالىم بولدى.
