سۋرەتتەردى تۇسىرگەن – اۆتور
ايتتى-ايتپادى, قاۋىپ تۋرالى ەسكەرتۋ, شەكتەۋلەرگە قاراماستان جولعا شىعىپ كەتەتىن جۇرگىزۋشىلەر از ەمەس. سوندىقتان دا عوي, وسكەمەن-التاي باعىتىنداعى قاۋىپتى جولدا كوشكىن ءجۇرىپ, قىرىق شاقتى كولىك كەپتەلىپ قالعان. ايتەۋىر, جولاۋشىلار امان.
– قاردىڭ شامادان تىس جاۋىپ, كوشكىن ءجۇرۋ قاۋپى تۋرالى ەسكەرتۋلەرگە قاراماستان, وبلىس تۇرعىندارى الىس ساپارلارعا شىعىپ, جولدىڭ كۇردەلى ۋچاسكەلەرىندە بوگەلىپ قالعان, – دەپ حابارلايدى شقو پد ءباسپاسوز حاتشىسى گۇلنۇر ءتۇسىپوۆا.
پوليتسيا قىزمەتكەرلەرى جەرگىلىكتى بيلىكپەن بىرلەسىپ, تۋىنداعان قيىن جاعدايدا جولاۋشىلار مەن جۇرگىزۋشىلەرگە جەدەل كومەك كورسەتتى. جىلىنۋ پۋنكتەرى اشىلىپ, جولاۋشىلار سوندا جەتكىزىلدى. وقيعا ورنىندا ارنايى كومەككە مۇقتاج جاندار ءۇشىن مەديتسينالىق بريگادالار كەزەكشىلىگى قۇرىلعان.
جولاۋشىلار كۇن رايى جاقسارىپ, تاسجول اشىلعان سوڭ عانا باعىتتارىن جالعاستىردى. ايتا كەتۋ كەرەك, بوران-شاشىندى كۇندەرى شەكتەۋلەردىڭ بولىپ تۇرۋى ابدەن مۇمكىن. تەك, سوعان قۇلاق اسۋ كەرەك. ايتپەسە, قولدانىلاتىن جازا دا بار. ول تۋرالى قۇقىق قورعاۋ ورگاندارى جۇرگىزۋشىلەر ەسىنە ءجيى سالىپ ءجۇر.
– «وسينوۆ» اسۋى مەن التاي جانە سەرەبريانسك سياقتى جاقىن جەردەگى ەلدى مەكەندەردە 30 توسەكتىك ورىنمەن جابدىقتالعان جىلىتۋ پۋنكتتەرى جۇمىس ىستەپ تۇر. ول جەردە تاماق ازىرلەۋگە كەرەكتى قۇرال-جابدىقتىڭ ءبارى بار. اۋىزسۋمەن دە قامتىلعان. ءىشى جىلى, جايلى. جولدا قالعان جولاۋشىلار سانى كوبەيگەن جاعدايدا قوسىمشا تاعى 10 توسەكتىك ورىنعا دا ەسەپتەۋگە بولادى, – دەدى التاي اۋدانى پوليتسيا ءبولىمى باستىعىنىڭ مىندەتىن اتقارۋشى دەنيس ەريمبەسوۆ.
جىلىتۋ پۋنكتىندە جاسالعان جاعداي تۋرالى رەسەيدىڭ سوناۋ نوۆوسيبيرسكى قالاسىنان كەلە جاتقان جولاۋشى دا ايتىپ, تاڭداندى. قىزمەتكەرلەر قوناق كۇتكەندەي كۇتىپ الدى دەسەدى.
– اۋىلعا, اتا-اناما قاراي جولعا شىققانمىن. الدىن الا كوشكىن ءجۇرۋ قاۋپىنە بايلانىستى جول جابىق دەگەن حابارلاما العانىممەن, ءوتىپ ۇلگەرەتىن شىعارمىز دەدىك. الايدا ءبىزدى پوليتسيا قىزمەتكەرلەرى توقتاتىپ, جولدىڭ اشىلعانىن كۇتۋ كەرەكتىگىن ايتتى. ءسويتىپ, جىلىتۋ بەكەتىنە ورنالاستىق, – دەيدى سەرگەي سەمەنوۆ.
جىلىتۋ بەكەتى جۇمىس ىستەپ تۇرعانىمەن, تابيعاتتىڭ تىلسىم كۇشىن دە ەستەن شىعارماعان ابزال. بوراندى كۇنى بەكەتكە جەتىپ جىعىلاتىنىڭىزعا ەشقانداي كەپىلدىك جوق. ياعني ارنايى مامانداردىڭ ەسكەرتۋلەرىن ەسكەرىپ, شەكتەۋلەرگە قۇلاق اسقان ءجون. ول دەگەن – ءسىزدىڭ قاۋىپسىزدىگىڭىز.
شىعىس قازاقستان وبلىسى
