فوتو: اقوردا
قاسىم-جومارت توقاەۆ يتاليادا وتكەن الەمدىك دودا ەلىمىز ءۇشىن وتە تابىستى بولعانىنا توقتالدى. جاھاندىق باسەكەدە وتانداسىمىز ەربول حاميتوۆ التىن جانە قولا مەدال جەڭىپ الدى.
«ناعىز چەمپيون اتانىپ, ەلىمىزدىڭ مەرەيىن ۇستەم ەتتى, كوك تۋىمىزدى بيىكتە جەلبىرەتتى. بۇل – قازاق پاراسپورتى ءۇشىن تاريحي جەتىستىك. ەربول قازاقتىڭ قايسار, ءور رۋحتى ءارى نامىستى ۇلت ەكەنىن كۇللى الەمگە پاش ەتتى. سوندىقتان, ەڭ الدىمەن, ساعان جانە باپكەرلەرگە شىنايى ريزاشىلىعىمدى بىلدىرەمىن. پاراليمپيادا ويىندارىنا اتتانار ساتتە مەن ەلىمىزدىڭ كوك تۋىن ساعان تابىستادىم. سول ارتىلعان سەنىمدى تولىق اقتاپ, قازاقستانعا جەڭىسپەن ورالدىڭ. كەرەمەت ناتيجەگە جەتتىڭ! سونىڭ ارقاسىندا ەلىمىز كوماندالىق ەسەپتە 18-ءشى ورىنعا تابان تىرەدى. ۇزدىكتەردىڭ ىشىنەن العا شىعىپ, چەمپيون بولۋ وڭاي ەمەس. بۇل – جىلدار بويعى تىنىمسىز دايىندىق پەن قاجىرلى ءارى تاباندى ەڭبەكتىڭ جەمىسى ەكەنى انىق», دەدى پرەزيدەنت.
پرەزيدەنت باپكەرلەرگە, دەمەۋشىلەرگە, دارىگەرلەرگە جانە پاراسپورتشىلارمەن جۇمىس ىستەيتىن بارشا مامانعا ريزاشىلىعىن ءبىلدىردى.
مەملەكەت باسشىسى ەربول حاميتوۆتىڭ جەتىستىككە جەتۋ جولىندا ونىڭ باپكەرلەرى ايرىقشا ءرول اتقارعانىنا نازار اۋداردى.
«سىزدەر ەربول حاميتوۆقا بىلگەندەرىڭىزدى ۇيرەتىپ, تاجىريبەلەرىڭىزبەن بولىستىڭىزدەر. ونىڭ چەمپيونعا ءتان تاباندىلىق تانىتىپ, بيىك ماقساتقا ۇمتىلاتىن كۇرەسكەر مىنەزىن شىڭدادىڭىزدار. وليمپيادا جىلناماسىنا ەسىمىن جازعان بەلگىلى, كورنەكتى سپورتشى بولۋىنا كۇش سالدىڭىزدار. سىزدەرگە العىس ايتامىن. ورايلى ءساتتى پايدالانىپ, باپكەرلەرگە, دەمەۋشىلەرگە, دارىگەرلەرگە جانە پاراسپورتشىلارمەن جۇمىس ىستەيتىن بارشا مامانعا ريزاشىلىعىمدى جەتكىزگىم كەلەدى. اتلەتتەرىمىزدىڭ جەتىستىگى – وسكەلەڭ ۇرپاققا ۇلگى-ونەگە. تابىسقا جەتۋ فورمۋلاسىن ءبارى بىلەدى. الايدا اسقاق مۇراتقا قول جەتكىزۋ ءۇشىن كوپتەگەن يگىلىكتەن جانە ءومىردىڭ قىزىعىنان باس تارتىپ, قيىن جولدى ەڭسەرۋگە ەكىنىڭ ءبىرى تاۋەكەل ەتپەيدى. الەم بىرىنشىلىكتەرىندە جەڭىپ العان ءار مەدال ەلىمىزدەگى بۇقارالىق سپورتتىڭ دامۋىنا زور سەرپىن بەرەدى. بۇل وتە ماڭىزدى. ويتكەنى سپورتپەن شۇعىلداناتىن, ءوز-ءوزىن قامشىلاپ, كۇن سايىن شىڭدايتىن, سونداي-اق تەمىردەي تارتىپكە ۇيرەنگەن ادامدار تىرشىلىكتىڭ تاۋقىمەتىنە مويىمايتىنىن ءومىردىڭ ءوزى كورسەتىپ وتىر. بۇل رەتتە پاراليمپياداشىلاردىڭ ءجونى تىپتەن بولەك. ولاردىڭ ءومىرى – ناعىز ەرلىكتىڭ, قايتپاس قايسارلىق پەن مۇقالماس ەرىك-جىگەردىڭ ۇلگىسى», دەدى قاسىم-جومارت توقاەۆ.
ايتا كەتەيىك, وتانداسىمىز پارا بياتلون جارىسىندا جەڭىس تۇعىرىنىڭ ەڭ بيىك ساتىسىنا كوتەرىلدى. ەربول حاميتوۆ 4,5 شاقىرىمدىق ءىز كەسۋ جارىسىندا (وتىرىپ جارىسۋ ساناتى) ۇزدىك ناتيجە كورسەتىپ, چەمپيون اتاندى.
جارىستا قارا ۇزگەن جەڭىمپاز ۋكراينالىق تاراس رادتى, قىتايلىق تسزىسيۋي ءليۋدى شاڭ قاپتىردى.
سونداي-اق ول وسى پاراليمپيادا ويىندارىندا پارا شاڭعى جارىسىنان قولا مەدالدى جەڭىپ العان ەدى. وسىلايشا قازاقستاندىق سپورتشى ءبىر جارىستىڭ وزىندە ەكى جۇلدەنى قورجىنعا سالدى.
