«مەديتسينا ادامداردى, ۆەتەريناريا ادامزاتتى ەمدەيدى» دەمەكشى, مال دارىگەرلەرىنىڭ ءتۇرلى جۇقپالى ينفەكتسيالىق اۋرۋلارعا قارسى تۇرۋ ادىستەرىن قامتىعان سەمينار ماماندارعا وتە پايدالى بولدى. «GREEN Which» قوناقۇيىنىڭ زالىنا جينالعان ماماندار وزدەرى بىلە بەرمەيتىن ادىستەرمەن تانىسىپ, بۇۇ وكىلدەرىنە كوپتەگەن سۇراق قويدى. سونىمەن بىرگە وزدەرىنىڭ ساقتانۋ شارالارىن تولىق بىلە بەرمەيتىندىكتەرىن بايقادى. مىسالى, ءسىبىر جاراسى بولۋى مۇمكىن دەگەن مالدىڭ ولەكسەسىن ءبىزدىڭ ۆەتەرينارلار سويىپ, سىناماسىن زەرتحاناعا اپارۋعا تىرىسادى. بىراق مۇنداي اۋرۋدان ءولدى دەلىنىپ كۇدىكتەنگەن مالدىڭ ولەكسەسىن سويۋعا مۇلدە بولمايدى ەكەن. تەك جىعىلعان جاعىنداعى قۇلاعىن كەسىپ الىپ, ىشىندە دەزينفەكتسيالىق ەرىتىندىسى بار پەرگامەنتتىك قالتاشاعا سالىپ, ونى تىعىز جابىلعان ىدىسپەن عانا زەرتحاناعا جىبەرگەن دۇرىس كورىنەدى. قۇلاق كەسىلگەن جەردى ينفەكتسيا تاراماس ءۇشىن مىندەتتى تۇردە كۇيدىرۋ كەرەك ەكەن.
سونداي-اق سىناما زەرتحاناعا ءبىر تاۋلىكتىڭ ىشىندە جەتكىزىلگەندە عانا ناتيجە بەرەدى. سىنامانى قاتىرۋدىڭ دا قاجەتى جوق. جۇمىس بارىسىندا مال دارىگەرىنىڭ ۇستىندە حالات, ەكى قابات بەس ساۋساقتى قولعاپ بولۋى مىندەت.
سونداي-اق بۇۇ ماماندارى جانۋارلار مەن قۇستاردان قان الۋدىڭ وزىق تاسىلدەرى تۋرالى دا ايتتى. 5-10 مم قاندى تاڭعى مەزگىلدە, جانۋارلارعا ءالى جەمازىق بەرىلمەگەن ۋاقىتتا الۋ كەرەك. دەنەدەن قان الىناتىن جەردىڭ ءجۇنى قىرىلادى, تەرىسىنە دەزينفەكتسيا جاسالادى. قان تۇتىكشەگە اعۋى شارت, ەگەر تامشىلاپ الىنسا ناتيجە دۇرىس بولمايدى.
ماماندار عانا بىلۋگە ءتيىستى وسىنداي شارتتار تۋرالى كوپ ايتىلدى. ترەنينگتىڭ تاجىريبەلىك بولىگى م.اۋەزوۆ كوشەسىندە ورنالاسقان «پروۆيانت گرۋپپ ديستريبيۋشن» جشس مال سويۋ الاڭىندا ءتىرى جانە سويىلعان مال مەن قۇستان سىناما الۋ ادىستەرىن كورسەتۋمەن جالعاستى.
سەمينار-ترەنينگتىڭ باستى ماقساتى – زەرتحانالىق دياگنوستيكا ۇلگىلەرىن جيناۋ, وراۋ, تاسىمالداۋ, وڭدەۋ تاجىريبەسىن جەتىلدىرۋ ارقىلى ءسىبىر جاراسى, برۋتسەللەز, قۇس تۇماۋى, پاستەرەللەز سياقتى قاۋىپتى اۋرۋلاردىڭ الدىن الىپ, ەپيدەميولوگيالىق قاداعالاۋدى قامتاماسىز ەتۋ.
كاسىبي ترەنينگتىڭ نەگىزگى ءبولىمى تەوريالىق وقىتۋدى, پراكتيكالىق تاجىريبەنى, كاسىبي دايىندىقتى نىعايتۋدى قامتيدى. قاتىسۋشىلار سىناما الۋدىڭ ۇلتتىق, حالىقارالىق ستاندارتتارىمەن تانىسىپ قانا قويماي, ۇلگى ساپاسىن ساقتاۋدىڭ وزىق ادىستەرىن ۇيرەنىپ, بيولوگيالىق قاۋىپسىزدىك ستاندارتتارى شارالارىن ۇيرەندى. سونداي-اق اسا قاۋىپتى ۇلگىلەرمەن جۇمىس ىستەۋگە داعدىلانىپ, زوونوزدىق ينفەكتسيالاردىڭ ءورشۋىن بولدىرماۋدىڭ ءتيىمدى مۇمكىندىكتەرىنە ماشىقتاندى. كەشەندى ءتاسىل تەك تەوريالىق ءبىلىم عانا ەمەس, سونىمەن قاتار اقپاراتتى تاجىريبەمەن بەكىتۋگە مۇمكىندىك بەرىپ, مامانداردىڭ ەپيدەميولوگيالىق سىن-قاتەرلەرگە جىلدام ارەكەت ەتۋگە دايىندىعىن ايتارلىقتاي ارتتىردى.
سولتۇستىك قازاقستان وبلىسى
