مۇنايلى شاھاردان شەكاراعا دەيىن جەتكىزەتىن جولدىڭ قۇرىلىسى «قازاۆتوجول» ۇك» اق تاپسىرىسىمەن جۇرگىزىلىپ جاتىر. ۇلتتىق كومپانيانىڭ ءباسپاسوز قىزمەتى بىلتىر 15 جەلتوقساندا اتالعان باعىتتاعى جولدىڭ قۇرىلىسى اياقتالعانىن حابارلادى. جولدىڭ ۇزىندىعى – 272 شاقىرىم. جوبانى جۇزەگە اسىرۋ ءۇشىن ەۋروپالىق قايتا قۇرۋ جانە دامۋ بانكىنەن نەسيە الىنعان.
«قايتا جاڭارتۋ جۇمىستارىنان كەيىن جول ءۇشىنشى تەحنيكالىق ساناتتان ەكىنشى ساناتقا اۋىستىرىلدى. ەنى 3,75 مەترلىك ەكى جولاقتى قوزعالىسى بار جول سالىندى. جوبا اياسىندا 6 كوپىر, 1 وتكەل, 60 سۋ وتكىزگىش قۇبىر مەن 10 دەمالىس الاڭى اباتتاندىرىلدى. جول بويىندا 650 جارىق تىرەگى ورناتىلىپ, جول پايدالانۋشىلار ءۇشىن قولايلى ءارى قاۋىپسىز قوزعالىس قامتاماسىز ەتىلدى», دەپ حابارلاعان ەدى كومپانيانىڭ ءباسپاسوز قىزمەتى.
حالىقارالىق ستاندارتتارعا سايكەس جوبانى جۇزەگە اسىرۋعا قازاقستان, يتاليا, تۇركيا مەن ازەربايجان رەسپۋبليكاسىنىڭ كومپانيالارى قاتىسقان. جول قۇرىلىسىنا 650 مامان مەن 450 ارنايى تەحنيكا تارتىلعان. اقتوبە وبلىسىنداعى مۇعالجاردان, ماڭعىستاۋ وڭىرىندەگى شەتپە كەنتىنەن تەمىرجول ارقىلى 3,4 ملن توننا ينەرتتى ماتەريال جەتكىزىلگەن. ينەرتتى ماتەريالدار 50 مىڭعا جۋىق جارتىلاي ۆاگونمەن تاسىمالدانىپتى. بيتۋمدى جەتكىزۋگە 2,5 مىڭ تەحنيكا قاجەت بولعان.
الايدا پارلامەنت ءماجىلىسىنىڭ دەپۋتاتى سەرىك ەرۋباەۆتىڭ پىكىرىنشە, اتىراۋ – رەسەي شەكاراسى باعىتىنداعى جولدىڭ قۇرىلىسى ءالى تولىق اياقتالماعان. سول سەبەپتى, ول پرەمەر-ءمينيستردىڭ ءبىرىنشى ورىنباسارى رومان سكلياردىڭ اتىنا دەپۋتاتتىق ساۋال جولدادى.
«مەملەكەت باسشىسى بىلتىر ۇكىمەتتىڭ كەڭەيتىلگەن وتىرىسىندا ەلىمىز ءۇشىن ماڭىزدى استانا – بالقاش – الماتى, اتىراۋ – استراحان, اقتوبە – قاندىاعاش, تالدىقورعان – وسكەمەن باعىتىنداعى جولداردىڭ رەكونسترۋكتسيا مەرزىمى ۇزاققا سوزىلعانىن سىنعا الىپ, جەدەل اياقتاۋدى تاپسىرعان ەدى. كولىك ءمينيسترى م.قاراباەۆ 23 جەلتوقساندا ماجىلىستە وتكەن ۇكىمەت ساعاتىندا اتالعان جولداردى جوندەۋ جۇمىستارى تولىق اياقتالىپ, قولدانۋعا بەرىلگەنىن ايتتى. ونىڭ ىشىندە قۇرىلىسى 2018 جىلى باستالىپ, التى جىل بويى اياقتالماي جاتقان اتىراۋ – استراحان تاسجولى دا بار. الايدا يساتاي اۋدانىندا 17 شاقىرىمدى قۇرايتىن اققىستاۋ – تۇششىقۇدىق اينالما جولى ءالى باستالماعان دەپ ايتۋعا بولادى. كەيبىر ۋچاسكەلەردە ءاسفالتتىڭ سوڭعى قاباتى سالىنباعان. ح.ەرعاليەۆ اۋىلىندا كوپىر قۇرىلىسى بىتپەگەن. كولىكتەر ءالى اينالىپ ءوتىپ ءجۇر. ءبىرىنشى, ەكىنشى جانە ءۇشىنشى لوت بويىنشا 621-753-شاقىرىم ارالىعىنداعى 132 شاقىرىمدا جىلدامدىق شەكتەۋى ساعاتىنا 60 شاقىرىم دەگەن جول بەلگىسى ءالى الىنباعان. بۇل 277 شاقىرىمنىڭ جارتىسىنا جۋىعى – 132 شاقىرىمى تولىق بىتپەدى دەگەن ءسوز», دەيدى س.ەرۋباەۆ.
«قازاۆتوجول» ۇك اق اتىراۋ وبلىستىق فيليالى ديرەكتورىنىڭ ورىنباسارى ازامات قابدىعاليەۆتىڭ مالىمەتىنشە, 621-833-شاقىرىمعا دەيىنگى ۋچاسكەدە نەگىزگى قۇرىلىس-مونتاج جۇمىستارى اياقتالعان. جولدىڭ بۇل بولىگىنە اسفالتبەتون جابىنى توسەلىپ, كوپىر, سۋ وتكىزەتىن قۇبىر, تورلى قورشاۋ, يساتاي اۋدانىنداعى تۇششىقۇدىق جانە اقىستاۋ اۋىلدارىنىڭ تۇسىندا جارىقتاندىرۋ تىرەكتەرى سالىنعان.
«جوبا اياسىندا 10-عا جۋىق دەمالىس ورنى, سانيتارلىق-گيگيەنالىق توراپتار مەن كەمپينگتەر سالىنادى. ح.ەرعاليەۆ اۋىلى ماڭىنداعى باقساي وزەگى ارقىلى وتەتىن كوپىردىڭ قۇرىلىسى اياقتالدى. ەندى توسقاۋىل جانە قورشاۋ ورناتۋ جۇمىستارىن اياقتاۋ جوسپارلانىپ وتىر. يساتاي كەنتىنىڭ ماڭىنداعى 753-833-شاقىرىم ارالىعىنداعى 80 شاقىرىمدىق جول بولىگى پايدالانۋعا بەرۋ ساتىسىندا تۇر. بيىل 132 شاقىرىمدى قولدانىسقا بەرۋ جوسپارلاندى», دەيدى ا.قابدىعاليەۆ.
ونىڭ ايتۋىنا قاراعاندا, بيىل جول بويىندا بىرنەشە جۇمىستى اتقارۋ كوزدەلىپتى. بۇل – جيەگىن نىعايتۋ, ارنايى بەلگىلەردى ورناتۋ, قۇرىلىس جۇرگىزىلگەن اۋماقتاردى رەكۋلتيۆاتسيالاۋ.
«بارلىق كەزەڭدە اتقارىلىپ جاتقان جۇمىستىڭ ساپاسى ۇدايى باقىلاۋعا الىنعان. باقىلاۋدى مەردىگەر كومپانيالار زەرتحاناسى, تەحنيكالىق قاداعالاۋ قىزمەتى مەن جول اكتيۆتەرى ساپاسىنىڭ ۇلتتىق ورتالىعى ماماندارى جۇرگىزىپ كەلەدى. اتىراۋدان رەسەيدىڭ استراحان وبلىسىمەن شەكاراعا دەيىن قاتىنايتىن جولدى قايتا جاڭارتۋ ايماقتىڭ كولىك ينفراقۇرىلىمىنىڭ دامۋىنا جول اشىپ, ەكى ەل اراسىنداعى ەكونوميكالىق, ىسكەرلىك قارىم-قاتىناستى ودان ءارى نىعايتادى. وتاندىق ەكونوميكانىڭ كەڭ قانات جايۋىنا, ەلىمىزدىڭ حالىقارالىق ساۋدا بايلانىسىن جەتىلدىرۋگە دە سەپتەسەدى», دەدى ا.قابدىعاليەۆ.
شەكاراعا دەيىنگى جولدىڭ جوندەلۋىن اسىرەسە, يساتاي جانە قۇرمانعازى اۋدانىنىڭ تۇرعىندارى ۇزاق كۇتتى. تاڭاتار دارەل ۇلىنىڭ ايتۋىنشا, كۇردەلى جوندەۋدەن سوڭ كولىكتىڭ ءجۇرۋ ۋاقىتى ەدەۋىر قىسقارعان.
اتىراۋ وبلىسى
