توتەنشە جاعدايلار ءمينيسترى شىڭعىس ءارىنوۆتىڭ ايتۋىنشا, بىرەگەي قۇتقارۋ ستانساسىنىڭ تمد ەلدەرى اۋماعىندا بالاماسى جوق. قۇرىلىسىنا جوعارى ساپالى ءارى تەز قۇراستىرىلاتىن مودۋلدىك ماتەريالدار قولدانىلدى.
«قۇتقارۋ ستانساسىنىڭ اشىلۋى – اتىراۋ وبلىسى تۇرعىندارىنىڭ قاۋىپسىزدىگىن قامتاماسىز ەتۋ ماقساتىنداعى ماڭىزدى قادام. ونى سالۋ, زاماناۋي جابدىقتارمەن جابدىقتاۋ جىلدامدىعى قۇتقارۋشىلارىمىزدىڭ جوعارى كاسىبيلىگىن كورسەتتى. وسىنداي بولىمشەلەرىمىزدىڭ ينفراقۇرىلىمى مەن جابدىقتالۋىن جاقسارتىپ, تۇرعىنداردى قورعاۋ باعىتىندا يننوۆاتسيالىق, ءتيىمدى شەشىمدەردى ەنگىزۋدى جالعاستىرا بەرەمىز», دەدى ش.ءارىنوۆ.
قۇتقارۋ ستانساسىندا جۇمىس كابينەتتەرى, ديسپەتچەرلىك, قۇتقارۋشىلارعا ارنالعان دەمالىس, كيىم اۋىستىراتىن, اس ىشۋگە ارنالعان, جۋىناتىن بولمەلەر بار. اۋماعىندا ارنايى تەحنيكا مەن ءجۇزۋ قۇرالدارىنا ارنالعان بوكس اشىلدى. جاڭا ستانسانىڭ جانىنان قۇتقارۋشىلاردىڭ وتباسىلارىنا ارنالعان ەكى قاباتتى, 11 بولمەلى جاتاقحانا بوي كوتەردى. وعان ستانسا قىزمەتكەرلەرىنىڭ وتباسىلارى قونىستاندى.
مينيستر جەرگىلىكتى دەپارتامەنتكە اۆاريالىق-قۇتقارۋ جۇمىستارىنا ارنالعان جاڭا كولىكتەردىڭ كىلتىن تابىس ەتتى. وسى زامانعى قۇتقارۋ قۇرالدارىمەن جابدىقتالعان ماشينالاردى ساتىپ الۋعا رەسپۋبليكالىق بيۋدجەت ەسەبىنەن ارنايى قارجى ءبولىنىپتى. سونداي-اق سۋ ايدىندارىندا قۇتقارۋ وپەراتسيالارىن جۇرگىزۋگە بىرەگەي ءجۇزۋ قۇرالى – «Alligator» اەروقايىعى بەرىلدى.
«بىلتىر اتىراۋلىق قۇتقارۋشىلار 559 رەت شاقىرتۋعا بارىپ, 100-دەن استام ادامدى, ونىڭ ىشىندە 70 بالانى قۇتقاردى. اۋقىمدى سۋ تاسقىنى كەزىندە جەدەل-قۇتقارۋ جاساعىنىڭ قىزمەتكەرلەرى 3 مىڭنان استام جەرگىلىكتى تۇرعىندى قاۋىپسىز جەرگە ەۆاكۋاتسيالادى. بيىل جايىق وزەنىنەن 9 تۇرعىن قۇتقارىلدى. ونىڭ ىشىندە 4 بالا بار», دەپ مالىمدەدى وبلىستىق دەپارتامەنتتىڭ يميدجدىك جۇمىس جانە سىرتقى كوممۋنيكاتسيالار توبىنان.
اتىراۋ وبلىسى
