بۇل تاپسىرما بەرىلگەلى بەرى دە 3 جىل ءوتتى. وسى كەزەڭدە تۇرعىندار جۇيكەسىنە تيگەن ەلەكتر جەلىسىندەگى تۇيتكىلدى وڭ شەشۋ بارىسىندا نە ىستەلدى؟ «اتىراۋ جارىق» اق پرەزيدەنتىنىڭ ورىنباسارى قۋانىشبەك جۇميەۆتىڭ ايتۋىنشا, وتكەن جىلى اتىراۋ قالاسىنداعى قوسالقى ستانسادا ەلەكتر سىمدارىن, جىلىوي اۋدانىنداعى ەكى ەلەكتربەكەتتىڭ نىساندارىن اۋىستىرۋ كوزدەلگەن. الايدا كوكتەمگى تابيعي سيپاتتاعى توتەنشە جاعدايعا بايلانىستى قۇرىلىس ۋاقىتشا توقتاتىلعان.
«سۋ تاسقىنىنىڭ بەتى قايتقان سوڭ جۇمىس قايتا جانداندى. ماۋسىم ايىندا اتىراۋ قالاسىنداعى اقجار ەلدى مەكەنى مەن «الماگۇل» شاعىن اۋدانىنداعى قوسالقى ستانسالار, جىلىوي اۋدانىنىڭ جاڭاقاراتون كەنتىندەگى ەنەرگەتيكالىق نىساننىڭ قۇرىلعىسى اۋىستىرىلدى. ەندى وبلىستىق اكىمدىكپەن اراداعى كەلىسىمشارتقا بايلانىستى اپاتتىق جاعدايداعى 1409 باعانانى جاڭارتۋ قولعا الىنىپ جاتىر», دەدى ق.جۇميەۆ.
قالالىق ەلەكتر جۇيەلەرىنىڭ باس ينجەنەرى نۇرجان جۇماباەۆتىڭ پىكىرىنە سۇيەنسەك, شاھارداعى «نۇرسايا», «جەرۇيىق» شاعىن اۋداندارىندا ەلەكتر جەلىسىنىڭ ءجيى ىستەن شىعاتىنى بايقالادى. بۇل كەلەڭسىزدىكتى جويۋ ماقساتىندا 32 شاقىرىم ەلەكتر جەلىسىن جاڭارتۋ جوسپارلانعان. وسى كەزگە دەيىن «نۇرسايا» شاعىن اۋدانىنداعى 20 شاقىرىمدى قۇرايتىن جەراستى ەلەكتر جەلىسى جاڭارتىلعان.
«قازىر اتالعان شاعىن اۋدانداعى 60-قا جۋىق كوپقاباتتى ءۇي مەن «تۇلپار», «بولاشاق», «سۇڭقار» تۇرعىن ءۇي كەشەندەرىنىڭ جەراستى كابەلى اۋىستىرىلدى. سوڭعى جىلدارى «نۇرسايا» شاعىن اۋدانى تۇرعىندارىنان جارىق ماسەلەسىنە قاتىستى شاعىم كوپ تۇسەدى. وعان سەبەپ, 16 جىل بۇرىن قولدانىسقا بەرىلگەن تۇرعىن ۇيلەردىڭ ەلەكتر كابەلى ەسكىرگەن. وسىعان بايلانىستى اۆاريالىق جاعدايدا كابەلگە جالعاناتىن مۋفتالار شامادان تىس كوبەيگەن. ناقتىراق ايتقاندا, جەراستى ەلەكتر كابەلىنە جالعانعان مۋفتا سانى نورماتيۆتەن اسىپ كەتىپ وتىر. سونىڭ سالدارىنان ەلەكتر ەنەرگياسى ناشارلاپ, تۇرعىنداردىڭ شاعىمدانۋىنا اكەلىپ سوقتىردى. بۇل ماسەلەنىڭ سەبەبىن زەردەلەي كەلە, جەراستى ەلەكتر جەلىسىن پوليەتيلەنمەن قاپتالعان ءوزىن-ءوزى وقشاۋلاعىش زامانۋي كابەلگە اۋىستىردىق», دەپ مالىمدەدى ن.جۇماباەۆ.
ناتيجەسىندە, قازىر «نۇرسايا» شاعىن اۋدانى تۇرعىندارىنان 109 بايلانىس ورتالىعىنا جارىق ماسەلەسىنە قاتىستى تۇسەتىن شاعىم سانى 4 ەسەگە ازايىپ وتىر. ايتالىق, مامىر-قىركۇيەك ايلارىنىڭ ارالىعىندا اتالعان ورتالىققا 2169 شاعىم تۇسكەن. ال سوڭعى 3 ايداعى شاعىم سانى – 559.
ەلەكتر جەلىسى تەك اتىراۋ قالاسىندا عانا ەمەس, اۋدانداردا دا توزعان. اتىراۋ وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسى ينجەنەرلىك ينفراقۇرىلىمدى دامىتۋ ءبولىمىنىڭ باس مامانى ادىلەت باقتىعاليەۆتىڭ ايتۋىنشا, يساتاي اۋدانىندا ورنالاسقان تومان اۋلىنداعى ەلەكتر جەلىسى توزعانى انىقتالىپتى. مۇنداي تۇيتكىل اۋىل تۇرعىندارىنىڭ رەنىشىن تۋدىرعان.
«بۇل ماسەلە وڭ شەشىمىن تاپتى دەۋگە بولادى. قازىر اۋىلداعى ەلەكتر جەلىسى قايتا جاڭعىرتىلىپ, ح.ەرعاليەۆ اۋلىنداعى №83 «نوۆوبوگات» 110/10 كۆت قوسالقى ترانسفورماتورىنان 30 شاقىرىم ەلەكتر جەلىسى تارتىلىپ جاتىر. «ايكوم Ltd» جشس قوسالقى ستانساعا ۇياشىق قويىلىپ, ەلەكتر جابدىقتارىن ورناتۋدى جۇرگىزىپ جاتىر. تۇرعىندارعا ۋاقىتشا كەرنەۋ وسى ايدىڭ اياعىندا پايدالانۋعا بەرىلەدى. بۇل جۇمىستى تولىقتاي ىسكە قوسۋ جىل سوڭىنا جوسپارلانىپ وتىر», دەدى ءا.باقتىعاليەۆ.
اتىراۋ وبلىسىنىڭ ەنەرگەتيكالىق كەشەنى ءباسپاسوز قىزمەتىنىڭ مالىمەتىنە سۇيەنسەك, «اتىراۋ جارىق» اق 32 ترانسفورماتوردى جاڭاسىنا اۋىستىرعان. ماسەلەن, جىلىوي مەن ماقات اۋدانىنىڭ ارقايسىسىندا وسىنداي 6 ترانسفورماتور ورناتىلعان. اتىراۋ قالاسى مەن قىزىلقوعا اۋدانىنا – 4, ماحامبەت, يساتاي, يندەر, قۇرمانعازى اۋداندارىنا 3 ترانسفورماتوردان بولىنگەن.
«2024-2029 جىلدار ارالىعىندا «ىنتالاندىرۋ» جوباسىنا سايكەس تۇرعىنداردى ساپالى, ءارى تۇراقتى ەلەكتر ەنەرگياسىمەن قامتاماسىز ەتۋ جوسپارلانعان ەدى. وسىعان وراي ەلەكتر ەنەرگياسىن جەتكىزۋشى كاسىپورىن بالانسىنداعى 742,058 شاقىرىم اۋە, 1,745 شاقىرىم كابەل جەلىسىنە, 14 قوسالقى ستانساعا, 76 ترانفورماتورعا كۇردەلى جوندەۋ جۇرگىزىلدى. بۇعان قوسا, ەلەكتر تاراتاتىن بەكەتتەر دە جوندەلدى. ەندى الداعى جىلى 473,271 شاقىرىمعا جۋىق اۋە, 1,215 شاقىرىم كابەل جەلىسىنە, 9 قوسالقى ستانسا مەن 66 ترانسفورماتورعا, تاراتۋشى بەكەتتەرگە كۇردەلى جوندەۋ جۇرگىزۋ جوسپارلانىپ وتىر», دەپ حابارلادى كەشەننىڭ ءباسپاسوز حاتشىسى ەلۆيرا راحىمجانقىزى.
اتىراۋ قالالىق تۇرعىن ءۇي-كوممۋنالدىق شارۋاشىلىق جانە تۇرعىن ءۇي ينسپەكتسياسى ءبولىمىنىڭ سەكتور مەڭگەرۋشىسى ولجاس حاسانوۆتىڭ ايتۋىنشا, ءبولىم بالانسىندا 548 ترانسفورماتور بار. بيىل ەلەكتر كەرنەۋىن رەتتەيتىن 30 ترانسفورماتور جاڭارتىلعان.
«ترانسفورماتورلاردى جىل سايىن جاڭارتۋ كەزەڭ-كەزەڭىمەن جۇرگىزىلىپ كەلەدى. ەلەكتر ەنەرگياسىمەن جابدىقتاۋشى كاسىپورىنمەن ەكىجاقتى كەلىسىم اياسىندا ۇزىندىعى 32 شاقىرىم جەراستى جەلىسى اۋىستىرىلۋعا ءتيىس. وسى كەزگە دەيىن جوسپارلانعان جۇمىستىڭ 70 پايىزى اتقارىلدى. ەندى «جۇلدىز», «جۇلدىز-3», «ۆودنيكوۆ» شاعىن اۋداندارى مەن ب.امانشين, ب.قۇلمانوۆ كوشەلەرىندەگى, ق.ساتباەۆ داڭعىلىنداعى ەلەكتر جەلىسىن اۋىستىرامىز», دەيدى و.حاسانوۆ.
مۇنايلى ءوڭىردىڭ رەسەي فەدەراتسياسىمەن شەكارادا ورنالاسقان قۇرمانعازى اۋدانىنداعى اۋىلداردا دا ەلەكتر جەلىسىن جاڭارتۋ قولعا الىنىپ وتىر. اۋدان اكىمدىگىنىڭ ءباسپاسوز قىزمەتى ۇسىنعان اقپاراتقا قاراعاندا, 17 اۋىلدىق وكرۋگتە 1445 جارىق شامى, 1100 باعانا مەن 3 ترانسفورماتور ورناتىلعان. ەلەكتر ەنەرگياسىنا جەتكىزەتىن 26400 مەتر ەلەكتر جەلىسى اۋىستىرىلعان.
«بيىل «وڭىرلەردى دامىتۋ» باعدارلاماسى اياسىندا سۇيىندىك, جاڭاتالاپ, سافون, ماقاش, كوپتوعاي, بوكەي حان اۋىلدارى تولىقتاي جارىقتاندىرىلدى. تۇرعىندار سانى كوپ اقكول اۋلىندا 54 شاقىرىم ەلەكتر جەلىسى تارتىلىپ, كوشەلەرگە جارىق شامى ورناتىلدى. بۇل اۋىلداعى قوسالقى ستانسانىڭ قۇرىلىسى دا جاقىندا اياقتالادى. قازىر اۋىلدا 605 ەلەكتر باعاناسى ورناتىلىپ, 23 شاقىرىم كابەل, اۋە جەلىسى تارتىلدى», دەدى اۋدان اكىمىنىڭ ءباسپاسوز حاتشىسى گۇلحات حامزا.
يندەر اۋدانىندا دا وسىنداي يگى ىستەر قولعا الىنىپ جاتىر. اۋدان اكىمدىگىنىڭ ءباسپاسوز قىزمەتىنىڭ مالىمەتىنشە, 7 اۋىلدىق وكرۋگتە 54 باعانا مەن 995 زاماناۋي led شامى ورناتىلىپتى. جاڭادان 2 مىڭ مەتر ەلەكتر جەلىسى جۇرگىزىلگەن. ناتيجەسىندە, ورلىك, بودەنە, كوكتوعاي اۋىلدارىندا, ەلتاي اۋىلدىق وكرۋگىنە قاراستى اققالا, جارسۋات وكرۋگىندەگى قۇرىلىس, قىزىلجار, اقتان ەلدى مەكەنىندە كوشە جارىعى ماسەلەسى تولىقتاي شەشىمىن تاپقان. ەندى بيىل كوكتوعاي اۋلىنداعى 14 كوشەگە زاماناۋي اقىلدى شامدار ورناتۋدى جوسپارلانىپ وتىر. جارسۋات اۋلىنا led شامدارى, يندەربور كەنتىنە 20-عا جۋىق باعانا ورناتىلادى.
اتىراۋ وبلىسى
