ءومىرىن فوتوونەرمەن ەگىز ورگەن اعايىدى سامات, ماقسات, ازامات قۇسايىنوۆتار – ەلىمىزدىڭ بەلدى باسىلىمدارىندا قىزمەت ەتىپ جۇرگەن تانىمال فوتوتىلشىلەر. بۇگىنگى اڭگىمەنىڭ وزەگى فوتوونەر الەمىنە العاش قادام باسقان ءۇيدىڭ ۇلكەنى – سامات قۇسايىنوۆ. ونىڭ وبەكتيۆىنە ىلىنگەن تاقىرىپتاردىڭ اياسى كەڭ. قازاق حالقىنىڭ ادەت-عۇرپى, سالت-ساناسى, دالا ءداستۇرى, ۇلتتىق ويىندارى مەن قوناقجايلىعىن ارقاۋ ەتكەن مىڭداعان سۋرەتتىڭ ونە بويىنان ءوز ءىسىن قۇلاي سۇيگەن شەبەردىڭ قولتاڭباسىن كورەسىز. «انا ءتىلى», «قازاق ادەبيەتى» «ادەبيەت ايدىنى», «ساقشى», «پرەزيدەنت جانە حالىق», «الماتى اقشامى» گازەتتەرىندە, «پاراسات», «ايگولەك», «التىن بەسىك» جۋرنالداردارىندا تاباندى قىزمەت ەتكەن «اقپارات سالاسىنىڭ ۇزدىگى» جەمىستى ەڭبەگى ءۇشىن پرەزيدەنتتىڭ العىس حاتىمەن ماراپاتتالدى.
قىراعى فوتوگرافتىڭ جۇمىستارى تەك ەلىمىزدە عانا ەمەس, گەرمانيانىڭ شتۋتگارد, تۇركيانىڭ ىستانبۇل, وڭتۇستىك كورەيانىڭ تەگۋ قالالارىندا كورمەگە قويىلعان. قازاق دالاسىنىڭ باي تابيعاتىن پاش ەتەتىن تۋىندىلارىنىڭ تاعى ءبىر لەگى تاياۋدا تۇركيانىڭ «انادولى وركەنيەتتەرى مۇراجايىندا» سالتانات قۇرعان « ۇلى دالا مادەنيەتى» كورمەسى ارقىلى تۋىسقان حالىقتارعا جول تارتتى.
– مەنىڭ ماقساتىم – قازاق مادەنيەتىن, ۇلتتىق ويىنداردى, ادەت-عۇرىپتى سۋرەت ونەرى ارقىلى دارىپتەۋ. تۇركى مەملەكەتتەرىنىڭ ىنتىماقتاستىعىن تۋ ەتكەن شارا تۇركسوي ۇيىمىنىڭ جانە ءوزىم قىزمەت ەتىپ جۇرگەن «AIatau Aqparat» مەدياحولدينگىنىڭ قولداۋىمەن ءوتتى. سۋرەتتەرىمدە ءتۇبى ءبىر تۋىسقان حالىقتارعا ورتاق قۇندىلىقتاردى دا كورسەتۋگە تىرىستىم. فوتوسۋرەت – ءاربىر ءساتتى ۇستاۋ. ءبىراز جىل بۇرىن استاناداعى ۇلتتىق كىتاپحانادا «سايىن دالانىڭ – سالت ءداستۇرى» دەپ اتالعان فوتوكورمەمدى وتكىزدىم. سول كورمەگە كەلگەن شەتەلدىكتەردىڭ قىزىعۋشىلىعىن كورىپ, تاعى دا شابىت الا ءتۇستىم. جۋرناليست ءاربىر ماقالانى اشۋ ءۇشىن قالاي ىزدەنەتىن بولسا, فوتوگرافيا دا ۇلكەن ىزدەنىستى قاجەت ەتەدى. ءبىر سۋرەتپەن ءبىر ماقالانى اشۋعا بولادى. فوتواپپاراتتىڭ ىشىنەن, وبەكتيۆتىڭ ار جاعىنان ءومىردى كورىپ تۇرۋىڭ كەرەك. مەنىڭ ۇعىمىمدا سۋرەتكە ءتۇسىرۋ – ونەر. سۋرەتكە تۇسىرگەن كەزدە ادامنىڭ پورترەتىنەن ءتىرى دۇنيە شىعارۋىڭ قاجەت. پەيزاج بەن پورترەت جانىما جاقىن جانرلار, – دەيدى س.قۇسايىنوۆ.
ۇنەمى ىزدەنىس ۇستىندە جۇرەتىن فوتوگەردىڭ «سارىسۋدىڭ سىرلى سۋرەتى», «سارىسۋ سايالى مەكەنىم», «مەرەيلى ولكە – مويىنقۇم» اتتى فوتو جيناقتارى كوپشىلىككە جول تارتتى. ساكەڭنىڭ جەكە پروديۋسەرلىگىمەن جارىق كورگەن «30-دان اسىپ بارامىن», ء«بىزدى كۇتەر ءبىر باقىت» تولىق مەتراجدى فيلمدەرى دە – ۇلكەن ەڭبەكتىڭ جەمىسى. ەردىڭ جاسى ەلۋدى ەڭسەرگەن ارىپتەسىمىزگە تولايىم تابىس تىلەيمىز!
الماتى
