«قالادا جاڭادان سالىنعان «مودەرن» جانە «لاتيفا» تۇرعىن ءۇي كەشەندەرىنەن بەرىلگەن جاڭا پاتەرلەرگە اپاتتى ۇيلەردى پانالاپ كەلگەن, الەۋمەتتىك تۇرمىسى تومەن وتباسىلار مەن كەزەكتە تۇرعان تۇرعىندار قونىستاندى. بۇل – تۇرعىنداردىڭ ءال-اۋقاتىن ارتتىرۋعا باعىتتالعان مەملەكەتتىك باعدارلامالاردىڭ جەمىسى», دەيدى ش.كەيكين.
سونداي-اق اتىراۋ قالاسىنىڭ ماڭىنداعى دامبى جانە اسپا اۋىلدارىنان بىرنەشە وتباسى جاڭا قونىسقا كوشىرىلدى. زاروسلىي اۋىلىنداعى جاڭادان سالىنعان جەكە ۇيگە يە بولعانداردىڭ قاتارىندا اسپا ەلدى مەكەنىنىڭ تۇرعىنى ءدارميا شىڭعاليەۆا دا بار. ونىڭ ايتۋىنشا, كوكتەمگى سۋ تاسقىنى كەزىندە اتالعان ەلدى مەكەنگە قاۋىپ تونگەن.
جاڭا جىل تاياعان ساتتە تاعى 91 وتباسى جاڭا پاتەرگە يە بولىپ, قۋانىشقا كەنەلدى. ەندى ولار 2025 جىلدى جاڭا قونىستا قارسى الاتىن بولدى.
«جاڭا جىل قارساڭىندا 91 وتباسىنا جاڭا پاتەر بەرىلىپ وتىر. جاڭا قونىسقا كوشكەندەردىڭ اراسىندا الەۋمەتتىك تۇرمىسى تومەن, كوپبالالى جانە اسىراۋشىسىنان ايىرىلعان وتباسىلار مەن مۇمكىندىگى شەكتەۋلى جاندار, ەرەكشە بالالاردى تاربيەلەپ وتىرعاندار بار. اتا-انا قامقورلىعىنان تىس قالعان جاستارعا دا پاتەر بەرىلدى. جەرگىلىكتى اكىمدىك وسىنداي ساناتتاعى تۇرعىنداردىڭ تۇرمىسىن جاقسارتۋدى جالعاستىرا بەرەدى», دەيدى ش.كەيكين.
جاڭا باسپانا «اياگوز» جانە «لاتيفا» تۇرعىن ءۇي كەشەنىنەن بەرىلگەن. ەكى جانە ءۇش بولمەلى پاتەرلەر بارلىق زاماناۋي تالاپقا ساي سالىنعان. جاڭا پاتەرگە يە بولعان تۇرعىننىڭ ءبىرى – ەلميرا سادىقوۆا. ونىڭ كۇيەۋى مۇمكىندىگى شەكتەۋلىلەر ساناتىنداعى ءى توپ مۇگەدەگى.
ء«بىز بۇل باسپانانى كوپ جىل كۇتتىك. تۇرعىن ءۇي كەزەگىندە 10 جىلدان بەرى تۇرامىز. سوندا دا ءۇمىت ۇزبەدىك. مىنە, جاڭا جىل قارساڭىندا سول ءۇمىتىمىز اقتالىپ, باسپاناعا قول جەتكىزدىك», دەيدى ە.سادىقوۆا.
اتىراۋ وبلىسى
