شىن مانىندە, الدىڭعى قاتارلى مەملەكەتتەر قاتارىنان بەرىك ورىن الۋىمىز ءۇشىن ءبىرىنشى كەزەكتە ازاماتتارىمىزدىڭ جاڭاشا ويلاي بىلۋگە, ۋاقىت تالابىنا ساي جاسامپازدىققا ۇمتىلعانى ابزال. بۇل ورايدا, باسقاسىن ايتپاعاندا, ءبىلىم مەن عىلىم, مادەنيەت, رۋحانيات سالالارىن دامىتۋ ماقساتىندا كۇش بىرىكتىرۋ ءوز جەمىسىن بەرەدى. سوندىقتان, ادامي كاپيتالعا يەك ارتىپ, ەڭبەكقور, تالانتتى ازاماتتاردى بارىنشا قولداۋ, ولاردىڭ الەۋەتىن ءتيىمدى پايدالانۋ ماڭىزدى. وسى تۇستا باتىل شەشىم قابىلداي بىلەتىن, وزىق, تىڭ امال-تاسىلدەردى قولدانا وتىرىپ قوعام دامۋىنا وڭ اسەرىن تيگىزىپ, پايدا كەلتىرىپ جۇرگەن وتانداستارىمىزدى كوپكە ۇلگى ەتۋ, سول ارقىلى ادال دا بەلسەندى ازاماتتارىمىزدىڭ قاتارىن كوبەيتۋ قاجەت. بۇل ساناتتاعى ادامداردىڭ ءۇنى قوعامداعى كەرىتارتپا, باردى جوق دەپ زارلايتىن, اتقارىلعان يگى ىستەردەن كەمشىلىك ىزدەپ بايبالام سالاتىن كەيبىرەۋلەردىڭ ايقايىنىڭ استىندا قۇمىعىپ قالماۋعا ءتيىس.
سوڭعى كەزدەرى ەلىمىزدە كرەاتيۆتى يندۋستريانى دامىتۋ, ونى زامان سۇرانىسىنا ساي ىلگەرىلەتۋ ءىسى جاندانىپ كەلەدى. بۇعان دالەل رەتىندە قوعامىمىزدىڭ مادەني-رۋحاني ءومىرىن جانداندىرىپ, ونىڭ بويىنا قان جۇگىرتىپ, ءوز ەلىمىزدىڭ اۋقىمىنان شىعىپ, الەمدىك دەڭگەيدە تانىلا باستاعان وتانداستارىمىزدىڭ تابىستارىن ايتۋىمىزعا بولادى. كينو, مۋزىكا, ادەبيەت, سونداي-اق ونەردىڭ باسقا دا باعىتتارى بويىنشا ەلىمىزدىڭ جاسامپازدىق الەۋەتىن, ءىس-قيمىلىن الەمدىك كەڭىستىككە تانىتىپ جۇرگەن ورەندەرىمىز ءبىزدىڭ ءاردايىم ماقتانىشىمىز بولا بەرمەك.
بۇگىنگى جاس تولقىننىڭ الەۋەتى, قابىلەتى, ادال نيەتى بولاشاققا دەگەن سەنىمىمىزدى ارتتىرىپ وتىر. جاسامپاز ىسكە ۇمتىلعان جاستارىمىزدىڭ بۇگىنگى قادامى, قارىمى ەلىمىزدى دامۋدىڭ داڭعىل جولىنا ءتۇسىرىپ, ودان ءارى ىلگەرىلەي بەرۋىمىزگە تولىق مۇمكىندىك بەرەتىندەي.
قازىرگى تاڭدا ۇلتىمىزدىڭ جاڭا ساپاسىن قالىپتاستىرۋ, جاڭعىرعان, جاڭاشىل قوعام قۇرۋ مىندەتى كۇن تارتىبىندە تۇر. وسى ماسەلەدە تابىسقا جەتۋ, ءتيىمدى جولعا تۇسۋدە «ادال ازامات» ۇعىمىنا ەكپىن تۇسىرمەي بولمايدى. ەلدىك, ۇلتتىق ماسەلەلەردە باتىل قيمىلداۋ, شەشىمتال بولۋ وزەكتى. ال باتىل ءىس-قيمىل, شەشىمتالدىق تەك ادال ازاماتتارعا ءتان. ولاي بولسا, ادىلەتتى قازاقستان يدەياسىمەن تولىق ۇندەسەتىن «ادال ازامات» ۇعىمىن باستى قۇندىلىقتارىمىزدىڭ بىرەگەيى رەتىندە ۇرپاق ساناسىنا ءسىڭىرۋ وتە وزەكتى.
قازىرگى تاڭدا قازاق قوعامىنا سىرتقى كۇشتەردىڭ تەرىس اسەرلەرى از ءتيىپ وتىرعان جوق. ونىڭ كەرى سالدارلارىن سەزىنىپ تە وتىرمىز. سودان كەلىپ ىشكى ۋايىمىمىز دا, الاڭداۋشىلىعىمىز دا ءبىر باسىمىزعا جەتەرلىك. باسقاسىن ايتپاعاندا, جاستارىمىزدىڭ, ءتىپتى ورتا بۋىننىڭ ەداۋىر بولىگى سىرتقى ىقپالدى تاراپتاردىڭ «جۇمساق كۇشىنە» اينالىپ بارادى. ءبىرىمىز جاپون, ءبىرىمىز كورەي, ءبىرىمىز اعىلشىن, تاعى ءبىرىمىز باسقا بولعىمىز كەلەدى. مۇندايلار ءومىر ءسۇرۋ سالتىن, تانىم-تۇسىنىگىن, ءجۇرىس-تۇرىسىن, ءىشىپ-جەمىن الگى ءوزى ەلىكتەپ-سولىقتايتىن ۇلت وكىلدەرىنىكىنە بەيىمدەپ اۋرە. بۇل شىنداپ كەلگەندە ءوزىن سۇيكىمدى كورسەتىپ, سونىڭ ارقاسىندا قوعامىمىزعا ساياسي-ەكونوميكالىق, مادەني-رۋحاني ىقپالىن جۇرگىزىپ, وزدەرى ءۇشىن ءتيىمدى نارىق, ارزان دا انايى كەڭىستىك قۇرۋدى كوزدەيتىن سىرتقى كۇشتەردىڭ ناتيجەلى جۇمىستارىنىڭ كورىنىسى. ولار وسى ماقساتتارىن جۇزەگە اسىرۋ ءۇشىن ءبىزدىڭ جاستارىمىزدى ءوز دارگەيىنە ءيىلدىرىپ, قولبالا قىلىپ الۋعا كىرىسكەندەي. ولارعا الىستان كۇش تارتپاي-اق بالالارىمىزدى, ءوز ادامدارىمىزدى وزىمىزگە قارسى كۇش رەتىندە قولدانعان ءتيىمدى.
مىنە, وسىنداي ۇدەرىستەر ءجۇرىپ جاتقان قازىرگى كەزەڭدە ەل پرەزيدەنتى ۇسىنعان ادىلەتتى قازاقستان يدەياسىمەن ۇندەسەتىن «ادال ازامات» ۇعىمىنا نازار اۋدارۋدىڭ قانشالىقتى ماڭىزدى ەكەنىن ايتقىمىز كەلەدى. ويتكەنى ادال ادام قاشاندا ءوز ەلىنىڭ, ءوز حالقىنىڭ تۇپكى مۇددەسىن جۇرەگىمەن تۇسىنە الادى, سونىڭ ارقاسىندا وزگەنىڭ ىقپالىندا قالىپ قويۋعا, باسقانىڭ شوتىن شابۋعا ارى, ادالدىعى جىبەرمەيدى.
سوندىقتان دا ءوزىمىز قالاعان جاسامپازدىق, جاڭاشىلدىق جولىنا ءتۇسىپ, ونىڭ تالاپتارىن جاۋاپكەرشىلىكپەن ورىنداي بىلسەك قانا مارتەبەمىز بيىك, جۇلدىزىمىز جوعارى بولماق.
