پايدالانۋعا بەرىلگەن وقۋشى ورنى رەكوردتىق كورسەتكىشكە جەتتى

جىل قورىتىندىسىنا قاراعاندا, پايدالانۋعا بەرىلگەن وقۋشى ورنى رەكوردتىق كورسەتكىشكە جەتكەن. قۇرىلىسى اياقتالعان 257 مەكتەپ – ءۇش اۋىسىمدى 42 مەكتەپتىڭ جانە 148 ەلدى مەكەندە ورنالاسقان 20 اپاتتى مەكتەپ پەن ورىن تاپشىلىعى ماسەلەسىن شەشۋگە مۇمكىندىك بەرىپ وتىر.

وقۋ-اعارتۋ مينيسترلىگىنىڭ ءباسپاسوز قىزمەتى ءمالىم ەتكەندەي, ءۇش اۋىسىمدى وقىتۋ جانە اپاتتى مەكتەپتەر ماسەلەسىن شەشۋ بويىنشا بيۋدجەت قاراجاتى مەن ينۆەستيتسيا ەسەبىنەن جۇيەلى جۇمىستار جۇرگىزىلىپ جاتىر.

مەملەكەت باسشىسى باستاماشىلىق ەتكەن «جايلى مەكتەپ» ۇلتتىق جوباسى شەڭبەرىندە وقۋ جىلىنىڭ باسىنان 254 مىڭ وقۋشى ورنىنا ارنالعان 105 مەكتەپ پايدالانۋعا بەرىلگەن, ونىڭ 40%-دان استامى اۋىلدىق جەرلەردە ورنالاسقان.

ءبىلىم بەرۋ ينفراقۇرىلىمىن قولداۋ قورى بويىنشا 27 مىڭ وقۋشى ورنىنا ارنالعان 25 مەكتەپ قولدانىسقا بەرىلدى. قوسىمشا تاعى 5 مەكتەپ پەن 3,3 مىڭ ورىندىق ينتەرنات قۇرىلىسى ءجۇرىپ جاتىر. ءبىلىم بەرۋ نىساندارىنىڭ باسىم بولىگى جەتىسۋ, قىزىلوردا, باتىس قازاقستان, اقمولا وبلىستارىندا جانە الماتى قالاسىندا سالىنىپ جاتىر. بارلىعى جەمقورلاردان تاركىلەنگەن قاراجات ەسەبىنەن جالپى سانى 100 مىڭ وقۋشى ورىندىق 89 مەكتەپتىڭ قۇرىلىسى قارجىلاندىرىلعان.

سونداي-اق رەسپۋبليكالىق جانە جەرگىلىكتى بيۋدجەت قاراجاتى مەن جەكە ينۆەستيتسيالار تارتۋ ەسەبىنەن 92 مىڭ وقۋشى ورنىنا ارنالعان 127 مەكتەپ قۇرىلىسى جۇرگىزىلدى.

جاڭا نىسانداردى ىسكە قوسۋمەن قاتار قولدانىستاعى ينفراقۇرىلىمدى جاقسارتۋ بويىنشا اۋقىمدى جۇمىستار جۇرگىزىلدى:

• 254 ورتا وقۋ ورنى كۇردەلى جوندەۋدەن ءوتتى;

• 967 مەكتەپكە ارنالعان 1621 زاماناۋي پاندىك كابينەت ساتىپ الىندى;

• زاماناۋي ستاندارتتارعا سايكەس 1 مىڭ اۋىل مەكتەبى جاڭعىرتىلدى;

• 10 مىڭنان استام ءبىلىم بەرۋ ۇيىمىنىڭ قاۋىپسىزدىك جۇيەلەرى مەن تەحنيكالىق جاراقتاندىرىلۋى جاقسارتىلدى.