سۋرەت: aikyn.kz
حالقىمىز قازاقتى ءبىر ۇلت رەتىندە ۇيىستىرۋ ءۇشىن ورتاق شەشىمگە كەلىپ, حان سايلاعان. باسشىسىز توپ اداسادى. سەبەبى وتباسىنداعى وتاعاسى سياقتى مەملەكەتتىڭ دە باسشىسى بولۋى كەرەك. پرەزيدەنت مەملەكەتتىك بيلىكتىڭ ساياسي جۇيەسى جالپىحالىقتىق رەفەرەندۋمدا تاڭداۋعا تۇسەتىنىن ايتتى. مەملەكەت باسشىسىنىڭ «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» تۇجىرىمداسىنىڭ ءوزى – ەڭ قولايلى ساياسي جۇيە. ونى جۇزەگە اسىرۋ ءۇشىن حالىق ۇنىنە قۇلاق اساتىن مەملەكەتتىڭ ۇكىمەتى مەن اتقارۋشى بيلىگى پرەزيدەنت تاپسىرمالارىن مۇلتىكسىز ورىنداۋعا ءتيىس. سوندا تۇجىرىمداما ناتيجەلى بولادى.
وكىنىشكە قاراي, ەكونوميكالىق-الەۋمەتتىك ماسەلەلەردى شەشۋدە اقساپ جاتقان تۇستار وتە كوپ. بۇل ۇكىمەت پەن اكىمدىكتەرگە سىن. تەك مەملەكەتتىك مىندەتتەر جەر-جەردە شىنايى ءارى ناقتى ورىندالسا, سوندا تۇراقتى دامۋ بولادى ءھام حالىقتىڭ بيلىككە دەگەن سەنىمى ارتا تۇسەدى.
ال پارلامەنتتىڭ رەفورمالانۋى, اۋىل, اۋدان جانە قالا اكىمدەرىنىڭ سايلانۋى, ۇلتتىق قۇرىلتايدىڭ قۇرىلۋى جانە ەڭ باستىسى, زاڭ ۇستەمدىگىنىڭ باسىمدىققا اينالۋى – ساياسي توقىراۋعا ۇشىراماۋعا كەپىلدىك بەرەدى. ەلىمىزدە مەرزىمىنەن بۇرىن پارلامەنت تە, پرەزيدەنت تە سايلاۋى بولمايدى. ال ۇكىمەتتىڭ وتستاۆكاعا كەتۋى – سايلاۋشىلاردىڭ پىكىرى نەگىزىندە پارتيالار قابىلدايتىن شەشىم. بۇعان بايلانىستى پرەزيدەنت ءوز ويىن اشىق جەتكىزدى.
ەلىمىزدىڭ ەڭسەسىن تىكتەيتىن اكىمدەردى حالىق رۋلىق, جۇزدىك دارەجەدە ەمەس, ەلدىك دەڭگەيدە تاڭداسا يگى. سوندا اكىمدەر سايلاۋى دا ناتيجەسىن بەرەدى. ءاربىر سايلانعان اكىم مەن دەپۋتاتتار مەملەكەت ارتقان مىندەتتەردى اسقان جاۋاپكەرشىلىكپەن ىسكە اسىرۋعا ءتيىس. ادىلەتتى قازاقستان جاڭاشا كوزقاراستى كادرلاردىڭ ىسكەرلىگى مەن ادالدىعى ءارى ادىلدىگى ارقىلى قالىپتاسادى.
قايرات بالابيەۆ,
ءماجىلىس دەپۋتاتى
