سۋرەتتەردى تۇسىرگەن – اۆتور
داستۇرگە اينالعان بۇركىتشىلەر سايىسى بيىل دا حالىقارالىق دەڭگەيدە ۇيىمداستىرىلىپ, ۇلان اۋدانىنا قاراستى بوزانباي اۋىلىنىڭ كوگىندە قىران سامعاپ, توسىندە تازى جۇگىردى. شاباندوز جىگىتتەر اساۋ ءمىنىپ, اۋىزدىقپەن الىستى. ۇلت رۋحانياتىن ۇلىقتاعان تارتىستى دوداعا قىتاي, موڭعوليا, ماجارستان, قىرعىز رەسپۋبليكاسى مەن رەسەي فەدەراتسياسىنىڭ قۇسبەگىلەرى قاتىستى. وسىنداعى قىزىقتى ءساتتى قالت جىبەرمەگەن فوتوجۋرناليستەر اۋقىمدى شارانىڭ نۇكتەسىن قويعانداي بولدى بۇگىن. مولبەرتكە قاز-قاتار تىزىلگەن فوتوسۋرەتتەرگە كوز جۇگىرتسەڭىز, بىرىندە قۇسبەگى بالا بولسا, ەندى بىرىندە تازىسىن ەرتىپ اڭعا شىققان اقساقال كادرعا ىلىنگەن. شۇرىپپەنى ءدوپ باسقان فوتوگرافتار قايتالانباس ساتتەردى بەينەلەگەن. ءتىپتى قويانعا تۇسە بەرگەن بۇركىتكە دەيىن اپ-انىق تارتىلعان. ۇرەيلى قويان, تەگەۋرىندى بۇركىت. قويان ءۇشىن سوڭعى دەم بولسا, قىران ءۇشىن ولجا.
– كورمە وتكىزۋدىڭ ءساتى بيىل تۇسكەن ەكەن. ايتپەسە جىلدا جوسپارلايتىنبىز. مۇنداعى ماقسات سۋرەتتەرىمىزدى الەۋمەتتىك جەلىدە عانا ەمەس, ۇلكەن فورماتتا كورەرمەنگە ۇسىنعىمىز كەلدى. ونىڭ ۇستىنە, نەشە جىل وتسە دە, «شىعىس سالبۋرىنى» فەستيۆالىن كورمەگەندەر بار ەكەن. سولار كورمەگە كەلىپ, تاڭدانىستارىن ءبىلدىرىپ جاتىر, – دەيدى فوتوجۋرناليست اياۋجان وتەۋلينوۆا.
فەستيۆالدىڭ وتۋىنە مۇرىندىق بولعان قۇسبەگىلەر دە ورتامىزدان تابىلدى. بوزانباي اۋىلىنىڭ تۇرعىنى ماركس ناجيتبان قۇسىن كوتەرىپ, قىزىن ەرتىپ, كورمەنى تاماشالاۋعا كەلىپتى. كىشكەنتاي قىزى ايزەرە دە قانسوناردا قۇس ۇشىرىپ جۇرگەن ناعىز بۇركىتشى. ءتىپتى بۇركىتتىڭ ۇياسىنا ءتۇسىپ, بالاپاندارىن دا العانى بار.
قايتا جاڭعىرعان قۇسبەگىلىك ونەردى ناسيحاتتاپ جۇرگەن فوتوجۋرناليستەردىڭ ەرەكشە كورمەسىن تاماشالايمىن دەگەندەرگە, كىتاپحانا ەسىگى ايقارا اشىق.
شىعىس قازاقستان وبلىسى
