ءىس-شارانى ۇيىمداستىرۋعا وقۋ-اعارتۋ, مادەنيەت جانە اقپارات مينيسترلىكتەرى مەن جەتىسۋ وبلىستىق اكىمدىگى قولداۋ كورسەتتى.
ءفيلمنىڭ رەجيسسەرى – ەرلان وشاقباەۆ. بۇل تۋىندىدا جاس مۇعالىمنىڭ تۋعان اۋىلىنا ورالۋى, ءوزى ءبىلىم العان مەكتەپتە جۇمىسقا ورنالاسۋى, وقۋشىلارمەن بايلانىسى, مۇعالىم بەدەلىن نىعايتۋعا دەگەن تالپىنىسى, ۇستازدىقتىڭ قيىندىعى مەن قىزىعى كورىنىس تاپقان. سونداي-اق فيلمدە زاماناۋي پەداگوگيكانىڭ وزەكتى ماسەلەلەرى دە قوزعالعان. تانىستىرىلىم بارىسىندا وقۋ-اعارتۋ ءمينيسترى عاني بەيسەمباەۆ مادەنيەت جانە اقپارات مينيسترلىگىمەن بىرلەسىپ, ءفيلمدى ەلىمىزدىڭ تەلەارنالارىندا كورسەتۋ تۋرالى باستاما كوتەردى.
«مەملەكەت باسشىسى پەداگوگتەردىڭ قوعامىمىزدا ماڭىزدى ءرول اتقاراتىنىن اتاپ وتكەن بولاتىن. بۇل سوزدەر پەداگوگتەردى قولداۋعا جانە ءبىلىم ساپاسىن ارتتىرۋعا باعىتتالعان ناقتى قادامدارمەن بەكىتىلدى. العاشقى جانە ماڭىزدى قادامداردىڭ ءبىرى 2019 جىلى «پەداگوگ مارتەبەسى تۋرالى» زاڭنىڭ قابىلدانۋى بولدى, ول پەداگوگتەردىڭ جۇمىس جۇكتەمەسىن ازايتۋ, ارتىق فۋنكتسيالاردان بوساتۋ جانە جاڭا ىنتالاندىرۋ شارالارىن ەنگىزۋ ماسەلەلەرىن رەتتەدى. وسى ءفيلمنىڭ نەگىزگى ميسسياسى – پەداگوگتىڭ تەك ماماندىق ەمەس ەكەنىن كورسەتۋ. ولاردىڭ قوعامداعى ءرولىن تەرەڭ تۇسىنۋگە, جاس مۇعالىمدەر ءۇشىن جاۋاپكەرشىلىكتى سەزىنۋگە جانە كاسىبي دامۋعا شابىتتاندىراتىن ماڭىزدى سەبەپ بولاتىنىنا سەنەمىن», دەدى مينيستر.
ءفيلمنىڭ يدەيا اۆتورى – بەلگىلى جۋرناليست بەيسەن قۇرانبەك, ستسەناريىن جازعان – گۇلميرا قادىرقىزى. كەيىپكەرلەردىڭ ءرولىن جەتىسۋ وبلىستىق دراما تەاترى مەن وقۋشىلار سارايىنىڭ اكتەرلەرى سومداعان.
ايتا كەتەيىك, «ۇستاز» ءفيلمى جەتىسۋ تەلەارناسىنىڭ قولداۋىمەن تۇسىرىلگەن. ەندى بۇل تۋىندى ەلىمىزدىڭ باستى تەلەارنالارىنان كورسەتىلمەك. بۇل فيلم – مۇعالىم ماماندىعىنىڭ بەدەلىن ارتتىرۋعا ءارى ونىڭ قوعامداعى ورنىن ايشىقتاۋعا باعىتتالعان ەرەكشە جوبا.
