سۋرەت: Zakon.kz
وقيعا سەمەي قالاسىنىڭ ورتالىق الاڭىندا جاڭا جىلدىق شىرشانى قۇرۋ جانە بەزەندىرۋ كەزىندە 21 جەلتوقسان كۇنى ورىن العان. وبلىستىق ءبىلىم باسقارماسىنىڭ دەرەگىنە سەنسەك, سول كۇنى ساعات 15.00-دە مۇعالىمدەردى جاڭا جىلدىق شىرشانى بەزەندىرۋگە تارتۋ فاكتىسىنە قاتىستى شۇعىل كەڭەس وتكىزىلگەن. كەڭەستە وبلىس اكىمى وقيعانىڭ بارلىق ءمان-جايىن انىقتاۋ ءۇشىن قىزمەتتىك تەكسەرىس جۇرگىزۋدى, ال دەنساۋلىق ساقتاۋ باسقارماسىنا زارداپ شەككەن سەمەي قالاسىنداعى №49 مەكتەپتىڭ قازاق ءتىلى مەن ادەبيەتى ءپانىنىڭ مۇعالىمى قۋات ايتقاليەۆتىڭ جاعدايىن باقىلاۋعا الۋعا تاپسىرما بەرگەن.
زاڭسىز جۇمىسقا تارتۋ فاكتىسى بويىنشا قىزمەتتىك تەكسەرىس قورىتىندىسىنا سايكەس قالاداعى ءۇش بىردەي مەكتەپتىڭ, اتاپ ايتار بولساق №49, №40 جانە №19 مەكتەپ ۇستازدارىن شىرشانى بەزەندىرۋگە قاتىستىرعانى ءۇشىن اتالعان وقۋ ورىندارىنىڭ ديرەكتورلارى قاتاڭ سوگىس الدى. بۇعان قوسا, سەمەي قالالىق ءبىلىم ءبولىمىنىڭ باسشىسى ءبىرجان زامانبەك ۇلى قىزمەتىنەن بوساتىلدى. جاعدايدى ۇيلەستىرگەن قالا اكىمىنىڭ ورىنباسارى ارايبەك حامزاەۆقا قاتاڭ سوگىس جاريالاندى.
اباي وبلىسى ءبىلىم باسقارماسىنىڭ باسشىسى نۇرجان احمەتقاليەۆتىڭ سوزىنشە, بۇل مۇعالىمدەر قۇقىن بۇزۋ مەن زاڭ تالاپتارىنا قايشى ارەكەت ەكەنى انىقتالعان. جاعداي وبلىس باسشىسىنىڭ قاتاڭ باقىلاۋىندا تۇرعانىن دا ەسكەرتتى باسقارما باسشىسى.
وقىس وقيعاعا دۋشار بولعان قۋات ايتقاليەۆ ۇستازدىق قىزمەتىمەن بىرگە وقىرماندارىنا جىلى شىعارمالارىمەن تانىلعان جاس قالامگەر. قۋات ايتقاليەۆتىڭ شىر-پىر بولىپ شىندىق ىزدەگەن زايىبى سىمبات ايانقىزى مۇعالىمدى دەمالىس كۇنى زاڭسىز جۇمىسقا تارتۋ پەداگوگ قۇقىعىن اياققا باسۋ دەپ ەسەپتەيدى. شىرشانى قۇرىپ جاتىپ, 4-5 مەتر بيىكتەن قۇلاعان مۇعالىمنىڭ ايەلى جۋرناليستەرگە بەرگەن سۇحباتىندا سول كۇنى كۇيەۋىنە «الاڭعا بارىپ, شىرشا قۇراسىڭدار» دەگەن بۇيرىق مەكتەپ ديرەكتورىنان تۇسكەن. ال مەكتەپ باسشىسىنا بۇل نۇسقاۋ قالالىق ءبىلىم بولىمىنەن بولعان كورىنەدى.
«سەمەي قالاسى اكىمنىڭ شىرشاسىن قۇرۋ مەن بەزەندىرۋگە 30 ملن تەڭگە بولىنگەن, ال ونى مۇعالىمدەر قۇردى. جولداسىم 4-5 مەتر بيىكتەن قۇلاعان. ءالىبي دەگەن دوسى ءارى ارىپتەسى حابارلاسىپ مەكتەپتىڭ ديرەكتورى گۇلفاريزا توقتاۋبايقىزىنىڭ: «ەرتەڭ تاڭعى ساعات 08.00-09.00 ارالىعىندا الاڭعا بارىپ, شىرشا قۇراسىڭدار» دەگەن بۇيرىق بەرگەنىن ايتتى. كۇيەۋىم تاڭعى ساعات 09.30 كەزىندە الاڭعا جەتىپ, شىرشا قۇرۋعا كىرىسكەن», دەيدى سىمبات ايانقىزى.
قازىر اۋىر جاراقات العان مۇعالىم جانساقتاۋ بولىمىندە ەسىن جيعان. باسسۇيەگىنە زاقىم كەلگەن. وقيعا بولعان كۇنى شۇعىل وتا جاسالعان. الايدا ءۇش اي وتكەن سوڭ ەكىنشى كۇردەلى وتا جاساۋ جوسپاردا بار دەيدى دارىگەرلەر.
22 جەلتوقسان كۇنى ءوزىنىڭ فەيسبۋكتەگى جەكە پاراقشاسىندا وقۋ-اعارتۋ ءمينيسترى عاني بەيسەمباەۆ وسى وقيعا بويىنشا ويىن ورتاعا سالىپ, اۋىر جاعدايعا تاپ بولعان مۇعالىمنىڭ جاعدايى قاتاڭ باقىلاۋعا الىنعانىن جەتكىزدى.
«سەمەي قالاسىندا مۇعالىمدەردى جاڭاجىلدىق شىرشانى بەزەندىرۋگە تارتۋ جانە ارىپتەسىمىزدىڭ وسى ءىس بارىسىندا جاراقات الۋى – زاڭ بۇزۋشىلىقتىڭ ايقىن كورىنىسى.
پەداگوگتەردىڭ كاسىبي مىندەتتەرىنە جاتپايتىن مۇنداي جۇمىستارعا تارتۋ – «پەداگوگ مارتەبەسى تۋرالى» زاڭدى ورەسكەل بۇزۋ دەپ سانايمىن. بۇل وقيعاعا بايلانىستى وبلىس باسشىلىعى ءادىل ءارى جان-جاقتى تەكسەرۋ جۇرگىزىپ, الداعى ۋاقىتتا مۇنداي كەلەڭسىزدىكتەردىڭ قايتالانۋىنا جول بەرمەۋ ءۇشىن ءتيىستى شارالار قابىلدايدى دەپ ۇمىتتەنەمىن.
قۋات ايتقاليەۆتىڭ وتباسىنا شىنايى قولداۋ بىلدىرە وتىرىپ, ونىڭ تەزىرەك ساۋىعۋىن تىلەيمىن. قازىرگى ۋاقىتتا وعان بارلىق قاجەتتى مەديتسينالىق كومەك كورسەتىلىپ جاتىر. بۇل جاعداي ەرەكشە باقىلاۋعا الىندى», دەيدى مينيستر.
مەملەكەت باسشىسى پەداگوگتەردىڭ قوعامداعى رولىنە ەرەكشە ءمان بەرۋ كەرەكتىگىن باستى نازاردا ۇستاپ كەلەدى. ولاردىڭ قۇقىقتارىن «پەداگوگ مارتەبەسى تۋرالى» زاڭ اياسىندا مۇعالىمدەرگە ۇلكەن قولداۋ ەكەنى بەلگىلى. ولاردى قوعامدىق جۇمىسقا تارتۋ, زاڭسىز ەڭبەككە ماجبۇرلەۋ زاڭ شەڭبەرىنەن شىعۋ, زاڭدى بۇزۋ فاكتىسىن ايگىلەيدى.
ءبىلىم سالاسىندا بيىككە كوتەرىلىپ, عىلىمنان عيبرات ىزدەگەن, ادەبيەتتى بار ءومىرىنىڭ مانىنە اينالدارعان جاس پەداگوگتىڭ كەلەشەكتەگى جاعدايى نە بولماق دەگەن ساۋال جاقىن جاناشىرلارىن الاڭداتىپ وتىر. اياق-قولى سىنىپ ەمەس, باسسۇيەگى سىنىپ, ميىنا زاقىم كەلگەندىكتەن اپتالداي ازاماتتىڭ اۋىر ءحالى الدىمەن وتباسىنا اۋىر سالماق ەكەنى ايتپاسا دا ايقىن جايت. تۋىستارى سوتقا ارىزدانىپ, ناقتى كىنالىلەردى جازاعا تارتىلۋىن تالاپ ەتپەك.
