جيىرماعا جەتە بەرگەندە ومارعالي ەسىمدى ازاماتپەن قوسىلىپ, كەلىن اتاندى. ون بالانى دۇنيەگە اكەلدى, ۇشەۋى قايتىس بولىپ كەتتى. قازىر 20-نىڭ ۇستىندە نەمەرە, 30-دان استام شوبەرە سۇيگەن باقىتتى ورىنباسار اجە ميزامباەۆانىڭ ومىردە ۇمىتىلماس ساتتەرىنىڭ ءبىرى – قانىش ساتباەۆتى كوزى كورگەنى عانا ەمەس, سول ۇلى ادامنىڭ ايالى الاقانىمەن ءوزىنىڭ ماڭدايىنان سيپاپ, باتاسىن بەرگەنى. بۇل بىلاي بولعان ەدى.
«توعىز-ون جاستاعى كەزىم ەدى. ءۇيىمىز جەزدىدە تۇراتىن. ويتكەنى مارگانەتس كەنى تابىلىپ, جاقىن ماڭداعى اۋىلداردىڭ ادامدارى كەنىشكە جۇمىسقا تۇرىپ جاتتى. سونىڭ ءبىرى – ءبىزدىڭ ءۇي. قانىش اعانى كۇن سايىن كورىپ تۇراتىن ەدىك. بىردە مەن ول كىسىگە مينەرالدار سالاتىن شاعىن قالتا تىگىپ اپارىپ بەردىم. كەرەمەت ريزا بولىپ قالدى. «وركەنىڭ ءوسسىن, اينالايىن!» دەپ ماڭدايىمنان سيپاپ, باتاسىن بەردى. ال مۇنداي ءسات ۇمىتىلا ما؟» دەيدى ورىنباسار اجەي.
كەيىن اجەنىڭ قوساعى ومارعالي اعا قانەكەڭ باسقاراتىن گەولوگيالىق پارتيادا شارۋاشىلىق مەڭگەرۋشىسى بولىپ ەڭبەك ەتتى. «سول شاقتاردا قانىش يمانتاي ۇلى, الكەي مارعۇلان ءتارىزدى ۇلتىمىزدىڭ ۇلى ادامدارى شاڭىراعىمىزعا ءجيى كەلەتىن, داستارقانىمىزدان ءدام تاتاتىن. مەن ءبىر بالامدى الكەي اتامىز كەلگەندە بوسانىپ, سول كىسىنىڭ قۇرمەتىنە مارعۇلان دەپ اتاعانمىن» دەپ ەسكە الادى اجەي.
قازىر سول مارعۇلاننىڭ قولىندا تۇراتىن ورىنباسار اجەيگە مەكتەپ وقۋشىلارى ءجيى قوناق بولىپ كەلەدى. ويتكەنى ولار اجەلەرىنەن كەشەگى كۇندەردىڭ تاريحىنا قاتىستى ەستەلىكتەرىن تىڭدايدى.
جاقىندا اجەيگە «№6 تىرەك مەكتەبى رەسۋرستىق ورتالىعى» جانىنداعى «مۇراگەر» ولكەتانۋ مۋزەيىنىڭ جەتەكشىسى گۇلجانات ابىلاەۆا باستاعان «جاس زەرتتەۋشىلەر» كلۋبىنىڭ مۇشەلەرى قوناققا كەلدى. ولار اجايگە كەيىنگى جىلدارى جارىق كورگەن «وزبەكالى جانە مادەني مايدان», «قانىش جانە عىلىمي مايدان» كىتاپتارىن سىيعا تارتتى. بالالاردىڭ مۇنداي سىيلىعىن اجەي قۋانا قابىلدادى.
ء«ازىر كوزىمنەن قالا قويعان جوقپىن, جاقسى كىتاپتار اكەلىپسىڭدەر, راحمەت اينالايىندار. ۇلى تۇلعالاردىڭ ءومىر جولدارىن ۇلگى تۇتىڭدار, بىلىمگە ۇمتىلىڭدار», دەگەن اجەي بالالارعا باتاسىن بەردى.
ۇلى قانىش ساتباەۆتىڭ باتاسى دارىعان, ءوسىپ-ونگەن, ۇلگىلى شاڭىراقتىڭ وتاناسى اتانعان اجەنىڭ باتاسىن يەلەنۋ دە بىلە بىلگەنگە زور باقىت ەمەس پە؟ اسىرەسە قانىش اتالارىنىڭ بيىلعىداي مەرەيتويى تۇسىندا...
ۇلىتاۋ وبلىسى
