يننوۆاتسيالىق تەحنولوگيالارعا قىزىعۋشىلىعى بالا جاستان ويانعان راۋان «Python» باعدارلامالاۋ ءتىلىن ءوز ەركىمەن ۇيرەنىپ, تاپسىرمالاردى اۆتوماتتاندىرۋ, دەرەكتەردى جيناۋ مەن وڭدەۋ ءۇشىن سكريپتتەر جازۋدى, سونىمەن قاتار «SQLite» دەرەكتەر بازاسىمەن جۇمىس ىستەۋدى ەركىن مەڭگەرگەن. جاس تالاپ ۆەب-ازىرلەمەدە دە جوعارى دەڭگەيدە, «HTML», «CSS», «JavaScript» تىلدەرىن بىلەدى, سول ارقىلى ۆەب-بەتتەردى جاساۋ جانە باپتاۋمەن اينالىسادى. بۇدان باسقا, ول رۋتينالىق ۇدەرىستەردى اۆتوماتتاندىرۋعا ارنالعان شەشىمدەر ازىرلەپ, ۆەب-سايتتاردان دەرەكتەردى جيناۋ قۇرالدارىن قولدانۋدا دا ءبىراز تاجىريبە جيناعان. ماتەماتيكا مەن فيزيكانى قۇلشىنا وقيتىن ول, بولاشاقتا ەلىمىزدىڭ تەحنيكا, ەكونوميكا عىلىمدارىنا, IT سالاسىنا ءوز جاڭالىعىمدى اكەلسەم دەگەن ارمانىن جەتكىزدى.
«جەر جۇزىندە پايدا بولىپ جاتقان تەحنولوگيالىق جەتىستىكتەر كوپتەگەن ماماندىقتىڭ جويىلۋىنا اكەلىپ وتىر. ۇلكەن ۇجىممەن جابىلىپ جاسايتىن جۇمىستاردى ءبىر عانا كومپيۋتەر اتقارادى. تەحنولوگياسى دامىعان ەلدەر – ەڭ باي مەملەكەتتەر. مەنىڭ دە ماقساتىم – ەل عىلىمىنىڭ دامۋىنا ءوز ۇلەسىمدى قوسۋ. IT سالاسىنا قىزىعۋشىلىعىم مەنى ۇنەمى دامۋعا ۇمتىلدىرادى, جاڭا تەحنولوگيالاردىڭ سوڭعى جاڭالىقتارىن قالت جىبەرمەي قاداعالاپ وتىرامىن. ۇستازدارىمنىڭ باعىت-باعدارى, اتا-انامنىڭ قولداۋى ارماندارىما جەتۋىمە قاناتتاندىرادى. ول ءۇشىن تالماي ىزدەنۋ, ەڭبەكتەنۋ قاجەت ەكەنىن جاقسى تۇسىنەمىن. وقۋىمدى ويداعىداي اياقتاپ, ماسساچۋسەتس تەحنولوگيالىق ينستيتۋتىندا ءبىلىم السام دەيمىن. ولاردىڭ تەحنولوگياداعى وزىق بىلىمدەرىن يگەرىپ, ۇيرەنگەنىمدى ءوز ەلىمنىڭ يگىلىگىنە, دامۋىنا جۇمساسام دەگەن نيەتىم بار. سەبەبى بىزدە تەحنولوگيا سالاسىنداعى ۇلكەن كەڭىستىك بوس تۇر, تالاي جوبالاردى جۇزەگە اسىرۋعا بولادى», دەيدى راۋان نۇرلىبەك.
تالابىمەن تانىلعان كەيىپكەرىمىز «اقبوتا», «رۋسسكي مەدۆەجونوك» سەكىلدى ينتەللەكتۋالدى بايقاۋلاردا بىرنەشە رەت جەڭىمپاز اتانعان. جاقىندا الماتى قالاسىنداعى №134 ليتسەيدە وتكەن وليمپيادادا ينفورماتيكا پانىنەن 190 ۇپاي جيناپ, ءى ورىنعا يە بولدى. رەسپۋبليكالىق جانە حالىقارالىق وليمپيادالارعا بەلسەندى دايىندالىپ جاتقان وقۋشى 6-سىنىپتان باستاپ كۇردەلى تاپسىرمالاردى وڭاي شەشەتىن ەرەكشە قابىلەتىمەن كوزگە تۇسكەن. ول ءوزىن ماتەماتيك, فيزيك جانە IT مامانى دەپ سانايدى.
شاحمات ويناعاندا قارسىلاس شاق كەلتىرمەيتىن تالاپكەردىڭ لوگيكالىق ويلاۋ قابىلەتىنىڭ جوعارىلىعىنا ۇستازدارى دا سۇيسىنە قارايدى. «تالاپتىڭ وتى ارىنداپ» تۇرعان شاعىندا الدىنا بيىك ماقسات قويىپ, تابىسقا تالپىنعان وقۋشىعا تولاعاي جەتىستىك تىلەگىڭ كەلەدى.
الماتى
