شالعايداعى مەكتەپتەر قالاي جاڭارادى؟

وقۋ-اعارتۋ مينيسترلىگىنىڭ دەرەگىنە سۇيەنسەك, اۋىل مەكتەپتەرىنىڭ الەۋەتىن دا­مىتۋ ماقساتىندا 2023 جىلدان باستاپ «اۋىل مەكتەبى – ساپا الاڭى» رەسپۋب­ليكالىق جوباسى ىسكە اسىرىلىپ جاتىر. الماتى وبلىسىندا 2023-2024 وقۋ جىلىندا 50 مەكتەپتى قامتيتىن جاراتىلىستانۋ-ماتەماتيكالىق باعىتىنداعى پاندەر بو­يىنشا ءبىلىم ساپاسىن ارتتىرۋ ماقساتىندا ء«بىلىم-يننوۆاتسيا» ليتسەيلەرىنىڭ تاجىري­بەسىنە نەگىزدەلگەن جوبا «قازاقستان حالقى­نا» قورىنىڭ قارجىلاي قولداۋىمەن قولعا الىندى. ال اقتوبە وبلىسىندا 2023-2024 وقۋ جىلىندا وقۋ-اعارتۋ مينيسترلىگى, وبلىس اكىمدىگى جانە «قازاقستان حالقىنا» قوعامدىق قورى بىرلەسىپ «تسيفرلىق تەحنولوگيالاردى پايدالانا وتىرىپ, اۋىل مەكتەپتەرىنىڭ الەۋەتىن ارتتىرۋ» جوباسىن جۇزەگە اسىردى. جوباعا 12 تىرەك جانە 134 شاعىن جيناقتى مەكتەپ, 11 مىڭنان اسا ءبىلىم الۋشى مەن 3,5 مىڭعا جۋىق پەدا­گوگ قاتىستى. جوبا اياسىندا تىرەك مەك­تەپتەرىنىڭ ماتەريالدىق-تەحنيكالىق بازا­سى تولىعىمەن جاڭارتىلىپ, شاعىن جي­ناقتى مەكتەپتەر پاندىك جانە تسيفر­لىق كابينەتتەرمەن جابدىقتالدى. مەكتەپتەر جىلدامدىعى جوعارى ينتەر­نەتپەن قامتاماسىز ەتىلدى. جوبا اياسىندا جۇرگىزىلگەن كەشەندى جۇمىستار شاعىن جيناقتى مەكتەپتەردەگى ءبىلىم ساپاسىنىڭ ارتۋىنا ىقپال ەتتى. بۇل 6,8 جانە 10 سىنىپتارداعى وقۋ ۇلگەرىمىنىڭ جاقسارعانىنان كورىندى.

وسىعان قاتىستى وقۋ-اعارتۋ مينيستر­لىگىنە قاراستى ورتا ءبىلىم كوميتەتى تو­ر­ا­عاسىنىڭ ورىنباسارى ءاليا چوكۋشە­ۆا دا: «وقۋ ۇدەرىسىندە تسيفرلىق شەشىم­دەر, سونىڭ ىشىندە تىرەك مەكتەپتەر وقى­تۋشىلارى وزىق تەحنولوگيالاردى ءتيىمدى پايدالانۋدى, وقۋشىعا وڭاي جەتكىزۋدى جۇزەگە اسىردى. جوبانى ىسكە اسىرۋ ناتيجەسىندە مەكتەپتەر ونلاين-وقىتۋعا ارنالعان 155 جاڭارتىلعان تسيفرلىق كابينەتتەر مەن زەرتحانالىق جۇمىستاردى جۇرگىزۋگە ارنالعان عىلىم كابينەتتەرىن الدى. سونداي-اق 1000-نان اسا پەداگوگ ءبىلىم باعدارلامالارى بويىنشا وقۋدان ءوتتى. وقۋ جەتىستىكتەرى مونيتورينگىنىڭ ناتيجەلەرى وقۋشىلاردىڭ بارلىق ءپان بويىنشا ۇلگەرىمىندە وڭ ديناميكانى كورسەتتى», دەپ پىكىر ءبىلدىردى.

وقۋ-اعارتۋ مينيسترلىگى ۇلتتىق ۇيلەس­تىرۋشى رەتىندە اۋىل مەكتەپتەرىنىڭ دامۋ ستراتەگياسىن ازىرلەدى. ەندى اكىمدىكتەر ستراتەگيا نەگىزىندە جوبانى ماسشتابتاۋ جۇمىستارىن كەزەڭ-كەزەڭىمەن ىسكە اسىرۋدى قامتاماسىز ەتۋى قاجەت. بيىل جوباعا اقمولا, قوستاناي, پاۆلودار, باتىس قازاقستان جانە سولتۇستىك قازاقستان وبلىس­تارىنداعى 10 تىرەك جانە 30 شاعىن جيناقتى مەكتەپ تارتىلىپ جاتىر. 2025 جىلدىڭ قاڭتارىنان باستاپ جوباعا 17 ءوڭىردىڭ 192 تىرەك جانە 759 شاعىن جيناقتى مەكتەبى قاتىسادى. ال ءۇشىنشى كەزەڭدە وسى جوباعا قالعان شاعىن جيناقتى مەكتەپتەردىڭ بارلىعى تولىعىمەن قامتى­لۋعا ءتيىس.

اقتوبە وبلىسى ايتەكە بي اۋدانىنداعى تالدىساي مەكتەپ ديرەكتورىنىڭ ورىنباسارى اسەل ءىزباساروۆا جوبا ناتيجەسىندە وقۋشىلاردىڭ ساباققا قىزىعۋشىلىعى ايتارلىقتاي ارتقانىن ايتتى.

«2023 جىلى قىركۇيەك ايىنان باس­تاپ اتالعان جوبامەن ءبىزدىڭ مەكتەپ جۇ­مىس جۇرگىزدى. 2023 جىلى وقۋ وشاعى «تسيفرلىق تەحنولوگيالاردى پايدالانىپ, اقتوبە وبلىسىنىڭ شاعىن جيناقتى اۋىلدىق مەكتەپتەرىنىڭ الەۋەتىن دامىتۋ» قاناتقاقتى جوباسى اياسىندا ماگنيتتىك مەكتەبى رەتىندە بەكىتىلدى. سونىمەن قاتار جوبا اياسىندا «قازاقستان حالقىنا» جانە ء«بىلىم بەرۋ سالاسىن تۇراقتى دامىتۋ» قورىنان 2 كابينەت جابدىقتالدى. وعان قوسا ءۇش ءپان, ياعني ماتەماتيكا, حيميا, بيولوگيا بويىنشا 5 مۇعالىم ونلاين ساباق بەرەدى. جوباعا قاتىساتىن مەكتەپتەرگە «BilimLand», «Daryn Online», كۇندەلىك, «Roqed Science»,»TopIQ» سەكىلدى تسيفرلىق ءبىلىم بەرۋ پلاتفورمالارى قولداۋ كورسەتىپ وتىر, ءپان مۇعالىمدەرى اتالعان پلاتفورمالاردى ساباق بارىسىندا قولدانادى. بۇل پلاتفورمالاردىڭ بەينەساباقتارى مەن قۇراستىرىلعان تاپسىرمالارى زەرتحانالىق جۇمىستاردى, ساباقتاردا دەمونستراتسيالاردى كورسەتۋگە وتە ىڭعايلى, ساپالى جاسالعان. وقۋشىلار ساباققا اسا قىزىعۋشىلىقپەن قاتىسىپ, تاپسىرمالاردى وزگە مەكتەپتەردىڭ وقۋشىلارىمەن جارىسا ورىنداپ وتىرaدى. اۋىل مەكتەپتەرى اراسىندا باسەكەلەستىك قالىپتاستى. وسى از عانا ۋاقىتتىڭ ىشىندە وقۋشىلاردىڭ ءبىلىم ساپاسىنا دا وڭ سەپتىگىن تيگىزدى. وقۋ جىلىنىڭ قورىتىندىلارى بويىنشا اتالعان پاندەردەن ءبىلىم ساپاسىندا وڭ ديناميكا بايقالدى. جالپى, وتكەن جىلمەن سالىستىرعاندا وقۋشىلاردىڭ ۇلگەرىمى جاقسارا ءتۇستى», دەدى ءا.ءىزباساروۆا.

ونىڭ ويىنشا, كەيبىر اۋىل مەكتەپ­تەرىندە ينتەرنەت جەلىسى ناشار بولاتىن, وسى جوبا شەڭبەرىندە كوپتەگەن اۋىل ساپالى ينتەرنەت جەلىسىمەن قامتىلدى. بۇل سايكەسىنشە وقۋشىلاردىڭ ءوز بەتىمەن زاماناۋي ءبىلىم الۋىنا, ءبىلىم ساپاسىن ارتتىرۋ ءۇشىن تسيفرلىق تەحنولوگيالاردى پايدالانۋعا مول مۇمكىندىك بەردى. اتالعان جوبانىڭ ناتيجەسىندە اۋىل مۇعالىمدەرى ۆيرتۋالدى مۇعالىمدەردەن كوپتەگەن تىڭ مالىمەت الىپ, ءادىس-تاسىلدەرىن ءبولىسىپ, تاجىريبە الماسۋعا مول مۇمكىندىكتەر تۋعىزدى. پەداگوگتەردىڭ ءارى قاراي ءبىلىمىن تەرەڭ جەتىلدىرۋ ماقساتىندا بىلىكتىلىك ارتتىرۋ كۋرستارى ۇيىمداستىرىلدى. بۇگىندە مەكتەپ وقۋشىلارى مەن اۋىل مۇعالىمدەرى ءۇشىن دە بەرەرى كوپ جوبانىڭ تيىمدىلىگى دالەلدەندى. جوبا ەندىگى جەردە رەسپۋبليكا كولەمىندە جالعاسىن تاپسا, وقۋ جۇيەسىنىڭ دامۋىنا جاڭاشا سەرپىن اكەلەدى.

الماتى وبلىسى ىلە اۋدانىنىڭ بايسەركە اۋلىنداعى №28 مەكتەپ-گيمنازياسىندا ءبىلىم الاتىن 2 وقۋشىنىڭ اناسى قىمبات بەيسەمباەۆا مەكتەپتە كابينەتتەردىڭ جاڭاشا جابدىقتالعانى ءبىلىم ساپاسىنا اسەر ەتەتىنىن جەتكىزدى.

«اۋىلىمىزداعى مەكتەپتە 3-ءشى جانە 5-سىنىپتا ەكى بالام وقيدى. بيىل بالا­لارىم ءبىلىم الاتىن وقۋ وشاعىندا جاڭا جوبامەن مەكتەبىمىزدىڭ جيھازدارى جاڭارتىلىپ, جوندەۋ جۇمىستارى جۇر­گىزىلدى. فيزيكا, حيميا, ماتەماتيكا, بيولوگيا, گەوگرافيا, ينفورماتيكا, جاراتىلىس­تانۋ كابينەتتەرى زاماناۋي قۇرالدارمەن جابدىقتالدى. ينتەراكتيۆتى پانەلدەر مەن زەرتحانالىق جابدىقتار ورنا­تىلدى. STEM زەرتحاناسى مەن روبوتتەح­نيكا كابينەتى سىناقتارعا كەرەكتى گيد­رو­پونيكا زەرتحاناسىمەن, ۆيرتۋال­دى شىندىق كابينەتتەرىمەن جانە باسقا دا ءتۇرلى كۇرالدارمەن, ماتەريالدار­مەن جابدىقتالان. ينفورماتيكا كابي­نەتى زاماناۋي تەحنولوگيالارعا سايكەس كومپيۋتەرلىك تەحنيكالارمەن جاڭار­تىلدى. جاڭادان پارتالار بەرىلدى. باس­تاۋىش سىنىپتا وقۋشىلارىنا ارنايى كيىم شەشەتىن جەكە شكافتارمەن ورناتىلدى. دالىزگە ىڭعايلى, جايلى, جاڭاشا ورىندىقتار قويىلدى. بالا­لارىمىزدىڭ وسىنداي جايلى جاعدايدا وقىپ جۇرگەنىنە اتا-انا رەتىندە ەرەكشە قۋانىشتىمىز. سەبەبى وقۋشى ءبىلىمدى تەك تەوريالىق تۇرعىدا الماي, ءىس-تاجىريبە جۇزىندە كوزبەن كورىپ, قولمەن ۇستاپ, تەرەڭ ءتۇسىنىپ, جان-جاقتى زەرتتەپ العانى ءجون. قازىر مەكتەپتە پراكتيكالىق جۇمىستار كوپتەپ جۇرگىزىلىپ جاتىر. بۇل – بالاعا قۇندى ازىق. وسىنىڭ ناتيجەسىندە وقۋشىلاردىڭ وقۋ ۇلگەرىمى جاقسارادى», دەدى اتا-انا ق.بەيسەمباەۆا.